Last updated on March 12th, 2026 at 11:18 am
ಕುಂದಾಪುರ, ಮಾ. 12: ಕೊರಗ ಸಮುದಾಯೊದ ಆಂಜೊವು ಒರಿಯನ್ ಸುಮಾರ್ 30 ವರ್ಸೊದಾತ್ ಕಾಲ ಜೀತೊಗು ದೀವೊಂದು ಬೆನ್ಪಾದ್ ದೌರ್ಜನ್ಯ ಮಲ್ದಿನ ಆರೋಪಡ್ ಪೊಂಜೊವು ಒರ್ತಿನ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಕುಂದಾಪುರ ತಾಲ್ಲೂಕ್ ಕನ್ಯಾನ ಗ್ರಾಮೊದ ರಜನಿ ಶೆಟ್ಟಿ ಕೈದಾತಿನ ಪೊಂಜೊವು.
ಕೊರಗ ಸಮುದಾಯೊಗು ಸೇರ್ದಿನ ಕನ್ಯಾನ ಗ್ರಾಮೊದ ನಾಗ (65) ಪನ್ಪಿನಾರೆನ್ ಸುಮಾರ್ 30 ವರ್ಸೊರ್ದಿಂಚಿ ಕುಂದಾಪುರದ ಹೆಮ್ಮಾಡಿದ ಕಬ್ಬೈಲ್ ನಿವಾಸಿ ಸುಬ್ಬಣ್ಣ ಶೆಟ್ಟಿ ಪನ್ಪಿನಾರ್ ಬೇಲೆಗ್ ದೀದಿತ್ತೆರ್. ಸುಬ್ಬಣ್ಣ ಶೆಟ್ಟಿ ತೀರಿಬೊಕ್ಕ ಆರೆನ ಮಗಲ್ ರಜನಿ ಶೆಟ್ಟಿ ಬೊಕ್ಕ ಮರ್ಮಯೆ ಕರುಣಾಕರ ಶೆಟ್ಟಿಲಾ ನಾಗನ್ ಪೆತ್ತ ಮೇಪಯೆರ, ತೋಟೊದ ಬೇಲೆಗ್ ಇಲ್ಲಡೇ ದೀವೊಂದೆರ್.
ನಾಗೆ ಮೆರೆನ್ 30 ವರ್ಸೊರ್ದಿಂಚಿ ಜೀತೊದ ಚಾಕಿರಿಗ್ ದೀವೊಂದು, ಸಮ ಸಂಬಳ ಕೊರಂದೆ, ಕುಲ್ಯೆರ ಜೆಪ್ಪೆರ ಮೂಲ ಸೌಕರ್ಯ ಕೊರಂದೆ, ಪೆತ್ತ ಕಟ್ಟುನ ಕಿದೆಟ್ ಜೆಪ್ಪಾವೆದೆರ್ ಪನ್ದ್ ಒಯಿಲ್ಡ್ ಪನ್ತೆರ್. ತಿನ್ಪುನ ಬಟ್ಟಲ್, ಕುಂಟು, ಮಾತೆನ್ಲಾ ಕಿದೆಟೇ ದೀಯೇರ ಒತ್ತಾಯ ಮಲ್ತೊಂದಿತ್ತ್ದ್, ವನಸ್ಲಾ ಇರೆಟ್ ಪಾಡೆದೆರ್ಗೆ. ಜಾಗೆರ್ದ್ ಪಿದಯಿ ಪೋಯೆರಲಾ ಬುಡಂದೆ ದೌರ್ಜನ್ಯ ಮಲ್ತ್ದೆರ್ ಪನ್ದ್ ನಾಗೆ ಆರ್ ಬರೆಪಾದಿನ ಒಯಿಲ್ಡ್ ಪನ್ತೆರ್. ಕುಂದಾಪುರ ಗ್ರಾಮಾಂತರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಕೈದಾತಿನ ಪೊಂಜೊವುಗು ನ್ಯಾಯಾಂಗ ಕೈದ್ ಕೊರ್ತೆರ್.