Last updated on March 12th, 2026 at 03:15 pm
ಲಕ್ನೌ, ಮಾ. 12: ಸಾದಿದ ಗುಂಡಿಲು(Pothole) ಜೂವ ದೆತ್ತಿನ ನಿದರ್ಶನೊಲೇ ಎಚ್ಚ, ಆಂಡ ಮುಲ್ಪ ಒಂಜಿ ಕಡೆಟ್ ಪೋಯಿನ ಜೂವ ಸಾದಿದ ಗುಂಡಿರ್ದಾವರ ಕುಡ ಬೈದ್ಂಡ್. ಬೊಂಡು ನಿಷ್ಕ್ರಿಯ ಆದಿತ್ತಿನ ಪೊಂಜೊವುಗು ಸಾದಿದ ಗುಂಡಿರ್ದಾವರ ಕುಡ ಜೂವ ಬೈದ್ಂಡ್. ಈ ನಡಕೆ ಬರೇಲಿ-ಹರಿದ್ವಾರ ರಾಷ್ಟ್ರೀಯ ಪೆರ್ಸಾದಿ-74ಟ್ ನಡತ್ದ್ಂಡ್. ಫೆಬ್ರವರಿ 22ತಾನಿ ಇಲ್ಲಡ್ ದಾದನಾ ಬೇಲೆ ಮಲ್ತೊಂದುಪ್ಪುನಗ ವಿನೀತಾ ಶುಕ್ಲಾ ಪನ್ಪಿನಾರ್ ಒರರ್ದ್ ಒರಾನೆ ಮತಿ ತತ್ತ್ದ್ ಬೂರ್ದೆರ್. ಉಚ್ಚು ತುಚ್ಚಿದೊಪ್ಪುಡು ಪನ್ದ್ ಅಂದಾಜಿ ಮಲ್ತಿತ್ತೆರ್.
ಆಸ್ಪತ್ರೆಡ್ ಆರೆನ ಬೊಂಡು ನಿಷ್ಕ್ರಿಯ ಆತ್ಂಡ್, ನನ ಬದ್ಕ್ದ್ ಒರಿಪುನ ಡೌಟ್ ಪನ್ದ್ ಡಾಕ್ಟರ್ನಕುಲು ಪನ್ಡಿಬೊಕ್ಕ ಫೆಬ್ರವರಿ 24ತಾನಿ ಆರೆನ ಅಂತ್ಯಕ್ರಿಯೆ ಮಲ್ಪೆರ ಆರೆನ್ ಇಲ್ಲಗ್ ಪಿರ ಲೆತೊಂದು ಬರೊಂದಿತ್ತೆರ್. ಆರ್ ಶ್ವಾಸ ದೆತ್ತೊಂದಿಜ್ಜಂಡ್, ತಿಗಲೆ ಸಮ ಆಕೊನೊಂದುಲಾ ಇಜ್ಜಂಡ್. ವಿನೀತಾನ ಇಲ್ಲದಕುಲು ಆರೆನ್ ಪೊತ್ತಾಯೆರ ಮಾತಾ ಅಟ್ಟನೆ ಮಲ್ತೊಂದಿತ್ತೆರ್ ಪನ್ದ್ ಆರೆನ ಕಂಡನೆ ಪನ್ತೆರ್.
ಸೋತ್ದ್, ಮೋನೆ ಕಂತ ಪಾಡೊಂದು ವಿನೀತಾನ್ ಲೆತೊಂದು ಪೋವೊಂದುಪ್ಪುನಗ ಆಂಬ್ಯುಲೆನ್ಸ್ದ ಟೈರ್ ಸಾದಿದ ಗುಂಡಿಗ್ ಬೂರ್ನಗ ಕಾರ್ನಿಕ ಒಂಜಿ ನಡತ್ದ್ಂಡ್. ದಾಯೆ ಪನ್ಡ ಗುಂಡಿರ್ದಾವರ ಆತಿನ ಆಘಾತ ಆರ್ ಕುಡ ಶ್ವಾಸ ದೆಪ್ಪುಲೆಕ ಮಲ್ದ್ಂಡ್. ಪಿರ ಆಸ್ಪತ್ರೆಗ್ ಲೆತೊಂದು ಪೋನಗ ಡಾಕ್ಟರ್ನಕಲು ಒರ ಆರೆನ್ ದಾಕಲ್ತೊನರ ಪಿರ ಜಾರ್ದೆರ್, ಆಂಡ ಇಲ್ಲದಕ್ಲೆನ ಒತ್ತಾಯಗ್ ಎಂಚಲಾ ಆರೆನ ಪರೀಕ್ಷೆ ಮಲ್ತ್ದೆರ್.
ಆಂಬ್ಯುಲೆನ್ಸ್ ಹಫೀಜ್ಗಂಜ್ ಎತ್ತೊಂದು ಬತ್ತಿನೇ, ಟೈರ್ ಮಲ್ಲ ಗುಂಡಿಗ್ ಬೂರ್ದು ಒರ ಅಂಕೆ ತತ್ತ್ದ್ ತಾರಾಮರ ಪೋತುಂಡು. ಸುರುಕ್ ತಿಗಲೆ ಆಕೊನುನ ಮೆಲ್ಲ ಆದಿತ್ತ್ಂಡ್, ಆಂಡ ಗುಂಡಿಗ್ ಬೂರ್ನೆಟ್ಟಿಗೆ ಆರ್ ಸಾಮಾನ್ಯವಾದ್ ಶ್ವಾಸ ದೆಪ್ಪೆರೆ ಸುರು ಮಲ್ತ್ದೆರ್ ಪನ್ದ್ ಇಲ್ಲದಕುಲು ಪನ್ತೆರ್.
ಕಂಡನೆ ಅಪಗನೇ ಇಲ್ಲದಕಲೆಗ್ ಅಂತ್ಯಕ್ರಿಯೆದ ಅಟ್ಟನೆನ್ ಉಂತಾಯೆರ ಪನ್ತೆರ್, ವಿನೀತಾನ್ ಪಿಲಿಭಿಟ್ದ ನ್ಯೂರೋಸಿಟಿ ಆಸ್ಪತ್ರೆಗ್ ಲೆತೊಂದು ಪೋದಿತ್ತ್ದ್, ಮನದಾನಿ ಡಿಸ್ಚಾರ್ಜ್ ಆತ್ಂಡ್. ಸುಮಾರ್ 13 ದಿನೊತ ಮರ್ದ್ರ್ದ್ ಬೊಕ್ಕ, ವಿನಿತಾ ಅಲಕ್ಕ ಗುಣ ಆತೆರ್, ಇತ್ತೆ ಸಾಮಾನ್ಯ ಜೂವನ ಕರಿತೊಂದುಲ್ಲೆರ್.
ಆರೆಗ್ ಮರ್ದ್ ಮಲ್ದಿನ ನರಶಸ್ತ್ರಚಿಕಿತ್ಸಕೆ ಡಾ. ರಾಕೇಶ್ ಸಿಂಗ್ ಪಾತೆರ್ದ್, ಆರೆಗ್ ಉಚ್ಚು ತುಚ್ಚಿದುಪ್ಪು ಪನ್ಪಿ ಅನುಮಾನ ಇತ್ತ್ಂಡ್, ಆ ಸಾಧ್ಯತೆದ ಆಧಾರೊಡು, ಬೋಡಾಪಿನ ಅಗತ್ಯ ಮರ್ದ್ದ ಒಟ್ಟುಗು ಆಂಟಿ ವೆನಮ್ ಇಂಜೆಕ್ಷನ್ಲಾ ಕೊರ್ದಿತ್ತ ಪನ್ದ್ ಪನ್ಡೆರ್.