Last updated on March 17th, 2026 at 01:05 pm
ಕಾಬೂಲ್, ಮಾ.17: ಅಫ್ಘಾನಿಸ್ತಾನ ಬೊಕ್ಕ ಪಾಕಿಸ್ತಾನದ ನಡುತ ಕೊಲಲ ಜೋರಾದಿತ್ತ್ದ್, ಕಾಬೂಲ್ಡ್ ಇಪ್ಪುನ ಅಡಿಕ್ಷನ್ ಟ್ರೀಟ್ಮೆಂಟ್ ಆಸ್ಪತ್ರೆದ ಮಿತ್ತ್ ಪಾಕಿಸ್ತಾನ ಮಲ್ತಿನ ವೈಮಾನಿಕ ದಾಳಿಡ್ ಕಮ್ಮಿಡ್ 400 ಮಂದಿ ತೀರ್ದೆರ್ ಅಂಚೆನೇ 250ರ್ದ್ಲಾ ಎಚ್ಚ ಜನೊಕು ಗಡಿಕುಲಾತ ಪನ್ದ್ ತಾಲಿಬಾನ್ ಸರ್ಕಾರ ತೆರಿಪಾದ್ಂಡ್.
ಸೋಮವಾರ ರಾತ್ರೆ ಸುಮಾರ್ 9 ಗಂಟೆಗ್ ಕಾಬೂಲ್ಡ್ ಇಪ್ಪುನ ‘ಓಮಿದ್’ (Omid) ಪುದರ್ದ 2,000 ಬೆಡ್ ಸಾಮರ್ತಿಗೆದ ಅಡಿಕ್ಷನ್ ಟ್ರೀಟ್ಮೆಂಟ್ ಆಸ್ಪತ್ರೆದ ಮಿತ್ತ್ ಈ ದಾಳಿ ನಡತ್ದ್ಂಡ್. ಆಸ್ಪತ್ರೆದ ಎಚ್ಚಿನ ಕಟ್ವಾನೊಲು ಪೊಡಿ ಆದಿತ್ತ್ದ್, ತೀರ್ದಿನಕಲೆನ ಸಂಖ್ಯೆ ನನಲಾ ಎಚ್ಚ ಆಪಿನ ಸಾಧ್ಯತೆ ಉಂಡು ಪನ್ದ್ ತಾಲಿಬಾನ್ ವಕ್ತಾರೆ ಹಮ್ದುಲ್ಲಾ ಫಿತ್ರತ್ ಪೋಡಿಗೆ ತೂಪಾದೆರ್.
ಆಂಡ ಪಾಕಿಸ್ತಾನ ಈ ಆರೋಪನ್ ಒತ್ತೊಂದಿಜಿ. ಎಂಕ್ಲ ಕಾಲಿ ‘ಭಯೋತ್ಪಾದಕೆರ್ ದೆಂಗ್ದ್ ಕುಲ್ದಿನ ಜಾಗೆಲು ಬೊಕ್ಕ ಮಿಲಿಟರಿ ನಿಲೆಕ್ಲೆನ್’ ಮಾತ್ರ ಈಡ್ ಮಲ್ತ್ದ್ ದಾಳಿ ಮಲ್ತ್ದ ಪನ್ದ್ ಪನ್ಡೊನ್ದುಂಡು. ನಾಗರಿಕೆರೆಗ್ ಒವ್ವೇ ಎಚ್ಚಿಕಮ್ಮಿ ಆತಿಜಿ ಪನ್ದ್ ಪಾಕಿಸ್ತಾನ ಸಮರ್ಥನೆ ಮಲ್ತೊಂದ್ಂಡ್.
ಕರಿನ ಒಂಜಿ ತಿಂಗೊಲುರ್ದಿಂಚಿ ಈ ರಡ್ಡ್ ದೇಶೊಲೆನ ನಡುಟು ಗಡಿ ಸಂಘರ್ಷ ಜೋರಾತ್ಂಡ್. ಅಫ್ಘಾನಿಸ್ತಾನ ತನ್ನ ನೆಲಟ್ ಭಯೋತ್ಪಾದಕೆರೆಗ್ ಆಶ್ರಯ ಕೊರೊಂದುಂಡು ಪನ್ದ್ ಪಾಕಿಸ್ತಾನ ಆರೋಪ ಮಲ್ತೊಂದಿತ್ತ್ಂಡ, ಅಫ್ಘಾನಿಸ್ತಾನ ಪಾಕಿಸ್ತಾನದ ದಾಳಿನ್ ತನ್ನ ಸಾರ್ವಭೌಮತ್ವದ ಉಲ್ಲಂಘನೆ ಪನ್ದ್ ಲೆತ್ತ್ದ್ಂಡ್.