Last updated on March 17th, 2026 at 12:39 pm
ನೆಲ್ಯಾಡಿ, ಮಾ. 17: ಕಡಬ ತಾಲೂಕ್ದ ನೆಲ್ಯಾಡಿ ಕೈತಲ್ದ ಪೊಸಮಜಲ್ ನಿವಾಸಿ ಒರಿ ಒಡಿಪು ಪೇಂಟೆದ ಪರ ಸರಕಾರಿ ಬಸ್ಸ್ ಉಂತಡೆದ ಕೈತಲ್ ಲಾಡ್ಜ್ದ ಅದೆಟ್ ಫ್ಯಾನ್ಗ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ನಡಕೆ ಮಾ.15ತಾನಿ ನಡತ್ದ್ಂಡ್.
ನೆಲ್ಯಾಡಿ ಕೈತಲ್ದ ಕೌಕ್ರಾಡಿ ಗ್ರಾಮೊದ ಪೊಸಮಜಲ್ ಗುಡ್ಡೆ ನಿವಾಸಿ ಮಥಾಯಿ ಪನ್ಪಿನಾರೆನ ಮಗೆ ಜಿನ್ಸನ್ ಪಿ.ಎಂ.(38) ಆತ್ಮಹತ್ಯೆ ಮಲ್ತೊಂದಿನಾರ್.
ಜಿನ್ಸನ್ ಮೇರ್ ಕುಡ್ಲದ ಬರ್ಕೆದ ಕೋಸ್ಟಲ್ಗಾರ್ಡ್ಡ್ ಬೇಲೆ ಮಲ್ತೊಂದಿತ್ತ್ದ್ ಬೊಡೆದಿ ಬೊಕ್ಕ ಇರ್ವೆರ್ ಜೋಕುಲೆನ ಒಟ್ಟುಗು ಅಲ್ಪನೇ ಇತ್ತೆರ್. ಮಾ.14 ತಾನಿ ಮಧ್ಯಾಹ್ನ ಕುಡ್ಲದ ಇಲ್ಲರ್ದ್ ಪೋತಿನಾರ್ 3 ಗಂಟೆದ ಅಂದಾಜಿಗ್ ಬೊಡೆದಿಗ್ ಬೊಕ್ಕ ಬಯ್ಯಗ್ 6 ಗಂಟೆಗ್ ಅಪ್ಪೆಗ್ ಫೋನ್ ಮಲ್ತ್ದ್ ಆರೋಗ್ಯ ವಿಚಾರಿತ್ದಿತ್ತೆರ್.
ಒಡಿಪುಗು ಪೋದಿತ್ತಿನ ಜಿನ್ಸನ್ ಪಿ.ಎಂ. ಮೇರ್ ಒಡಿಪು ಪೇಂಟೆದ ಪರ ಸರಕಾರಿ ಬಸ್ಸ್ ಉಂತಡೆದ ಕೈತಲ್ ಲಾಡ್ಜ್ಡ್ ಅದೆನ್ ಬಾಡಾಯಿಗ್ ಗೆತೊಂದಿತ್ತೆರ್. ಮಾ.15ತಾನಿ ಮಧ್ಯಾಹ್ನ ಆಂಡಲಾ ಅದೆತ ಬಾಕಿಲ್ ದೆಪ್ಪಂದಿನೆನ್ ತೂದು ರೂಮ್ಬಾಯ್ ಪರಿಶೀಲನೆ ಮಲ್ಪುನಗ ಜಿನ್ಸನ್ ಫ್ಯಾನ್ಗ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ತೆರಿದ್ ಬೈದ್ಂಡ್.
ಬೊಕ್ಕ ಜಿನ್ಸನ್ನ ಮೊಬೈಲ್ಡ್ ಇತ್ತಿನ ಆರೆನ ಅಪ್ಪೆನ ಫೋನ್ ನಂಬರ್ಗ್ ಫೋನ್ ಮಲ್ತ್ದ್ ಒಡಿಪು ಪೊಲೀಸೆರ್ ನಡಕೆದ ಬಗೆಟ್ ಒಲವು ಕೊರ್ತೆರ್. ಒಡಿಪು ನಗರ ಪೊಲೀಸ್ ಸ್ಟೇಷನ್ದ ಠಾಣಾಧಿಕಾರಿ ಭರತೇಶ್, ಎಸ್ಐ ನಾರಾಯಣ, ಎಎಸ್ಐ ವಿಜಯ್ ಮೊಕುರು ಜಾಗೆಗ್ ಪೋದು ಮಹಜರ್ ಮಲ್ತೆರ್.
ಸಮಾಜ ಸೇವಕೆ ನಿತ್ಯಾನಂದ ಒಳಕಾಡ್ ಮೇರ್ ಪುನೊನು ಜಿಲ್ಲಾಸ್ಪತ್ರೆದ ಮರಣೋತ್ತರ ಪರೀಕ್ಷಾ ಕೇಂದ್ರೊಗು ಕೊನೊಯೆರ ಸಕಾಯ ಮಲ್ತೆರ್. ಮರಣೋತ್ತರ ಪರೀಕ್ಷೆರ್ದ್ ಬೊಕ್ಕ ಪುನೊನು ಪೊಲೀಸೆರ್ ಇಲ್ಲದಕ್ಲೆಗ್ ಬುಡ್ದು ಕೊರ್ದಿತ್ತ್ದ್ ಮಾ.16 ತಾನಿ ನೆಲ್ಯಾಡಿದ ಇಲ್ಲಗ್ ಕನತ್ದ್ ನೆಲ್ಯಾಡಿ ಚರ್ಚ್ಡ್ ಅಂತಿಮ ಸಂಸ್ಕಾರ ಮಲ್ತ್ದೆರ್.
ವೈಯಕ್ತಿಕ ನೆವನೊಲೆರ್ದಾವ ಜಿನ್ಸನ್ ಪಿ.ಎಂ.ಆತ್ಮಹತ್ಯೆ ಮಲ್ತೊಂದೆರ್ ಪನ್ದ್ ಒಯಿಲ್ ದಾಕಲಾತ್ಂಡ್. ಮೇರ್ ಅಮ್ಮೆರ್ ಮಥಾಯಿ, ಅಪ್ಪೆ ಎಲಿಯಮ್ಮ, ಬೊಡೆದಿ ಮರಿಯ, ಜೋಕುಲು ಜೋವನ್, ಫ್ರಾನ್ಸ್, ಒಪ್ಪ ಪುಟ್ಟಿನ ಜಿನು, ಜಿಜು ಮೊಕಲೆನ್ ಅಗತ್ದೆರ್.