Last updated on March 17th, 2026 at 05:19 pm
ಕುಡ್ಲ, ಮಾ. 17: ಬೆದ್ರ ಪೊಲೀಸ್ ಇನ್ಸ್ಪೆಕ್ಟರ್ ಸಂದೇಶ್ನ ಮಿತ್ತ ಪೊಂಜೊವು ಒರ್ತಿ ಮಲ್ದಿನ ಆರೋಪಲು ಸತ್ಯೊಗು ದೂರ ಆಯಿನವು ಪನ್ದ್ ಆ ಪೊಂಜೊವುನ ಸ್ವಂತ ಪಲಿ ಪ್ರಪುಲ್ಲಾ ನಾಯಕ್ ಪಾತೆರ ಪನ್ತೆರ್. ಕುಡ್ಲಡ್ ಪತ್ರಿಕಾಗೋಷ್ಠಿ ಮಲ್ತ್ದ್ ಪಾತೆರ್ನ ಆರ್, ಈ ಪ್ರಕರಣೊದ ಪಿರವು ಮಲ್ಲ ಪಿತೂರಿ ಉಂಡು ಪನ್ದ್ ಆರೋಪ ಮಲ್ತ್ದೆರ್.
ಸುದ್ದಿಗೋಷ್ಟಿಡ್ ಪಾತೆರ್ನ ಆರ್, ಎನ್ನ ಕೌಟುಂಬಿಕ ಲಡಯಿದ ಬಗೆಟ್ ಬೆದ್ರ ಸ್ಟೇಶನ್ಡ್ ಒಯಿಲ್ ಬರೆಪಾನಗ, ಎನ್ನ ಕಂಡನ್ಯನ ಪರವಾದ್ ಆಲ್ ಸ್ಟೇಷನ್ಗ್ ಬತ್ತಿತ್ತಲ್. ಸ್ಟೇಷನ್ಡ್ ಬೊಬ್ಬೆ ಪಾಡ್ದ್ ಪಾತೆರ್ನೆಕ್ ಇನ್ಸ್ ಪೆಕ್ಟರ್ ನೆರ್ದಿತ್ತೆರ್, ಆ ಪೊರ್ತುಡು ಆಲೆನ ಮಗೆ ವಿಡಿಯೋ ಮಲ್ತಿನೆಕ್ ಜೋರು ಪಾತೆರ್ದಿತ್ತೆರ್. ಬೊಕ್ಕ, ಆಲೆನ ಮಗೆ ಎಂಕ್ ಆಕೆರೆ ಬನ್ನಗ ಇನ್ಸ್ಪೆಕ್ಟರ್ ಸಂದೇಶ್ ಆಯಗ್ ರಡ್ಡ್ ಬುಡ್ದು ಸ್ಟೇಶನ್ಡ್ ಕುಲ್ಲಾದಿತ್ತೆರ್.
ಇನ್ಸ್ಪೆಕ್ಟರ್ ಸಂದೇಶ್ನ್ ಬೇಲೆರ್ದ್ ದೆಪ್ಪೊಡು ಪನ್ದ್ ಶಪಥ ಮಲ್ದಿನ ಆಲ್, ಈ ಸುಳ್ಳು ಕಥೆ ಉಂಡು ಮಲ್ತ್ದಲ್. ಆಲೆನ ಪಿರವು ಪ್ರಭಾವಿ ನೊಕುಲು ಇತ್ತ್ದ್, ಕಾಸ್ದ ಆಸೆ ತೋಜಾದ್ ಅಧಿಕಾರಿಲೆನ ಮಿತ್ತ್ ಒಯಾಲ್ ಬರೆಪಾವೊಂದುಲ್ಲಲ್” ಪನ್ದ್ ಪ್ರಪುಲ್ಲಾ ಗಂಭೀರವಾದ್ ಆರೋಪ ಮಲ್ತ್ದೆರ್.
ಆಲೆಗ್ ಮದಿಮೆ ಆದ್ ಕಂಡನೆ ತೀರ್ದ್ ಪೋತೆ, 17 ವರ್ಸ ಪ್ರಾಯೊದ ಮಗೆ ಉಲ್ಲೆ. ಆತೇ ಅತ್ತಂದೆ, ಎನ್ನ ಮಗನ್ಲಾ ಆಲೆನ ಒಟ್ಟುಗು ದೀವೊಂದಲ್. ದಾಲ ಬೇಲೆ ಇಜ್ಜಿಂಡಲಾ ಬೆಂಗಳೂರ್ಡ್ ಇತ್ತೊಂದು ಬೋಡಾಯಿನಾತ್ ಕಾಸ್ ಮಲ್ತ್ದಲ್. ಕಾಸ್ದ ಮಲ್ಲಾದಿಗೆಡ್ ಎನ್ನ ಇಲ್ಲ್ನ್ಲಾ ಹಾಲ್ ಮಲ್ತ್ದಲ್. ಎನ್ನ ಕಂಡನ್ಯೆಲಾ ಮೂಜಿ ತಿಂಗೊಳು ಆಲೆನ ಒಟ್ಟುಗು ಇತ್ತ್ದ್, ಆಲೆನ ಅನಾಚಾರ ತೆರಿದ್ ಪಿರ ಬತ್ತ್ದೆರ್. ಸಂದೇಶ್ ಎಡ್ಡೆ ಜನ, ಎನ್ನ ಇಲ್ಲದ ವಿಷಯೊಡೂ ಆಲ್ ಬತ್ತಿನಿ ದಾಯೆ ಪನ್ದ್ ನೆರ್ನ್ಡ ತಪ್ಪಾ ಪನ್ದ್ ಪ್ರಶ್ನೆ ಮಲ್ತೆರ್.
ಸುಮತಿ ಬೇತೆ ಪೊಂಜೊವುಲೆಗ್ ಕಾಸ್ ಕೊರ್ದು ಅಧಿಕಾರಿಲೆನ ಮಿತ್ತ್ ಕಲು ಒಯಿಲ್ ಬರೆಪಾವೊಂದುಲ್ಲಲ್. ಆಲ್ ಪೋಯಿನವೆಟೆ ಮಾತಾ ಪ್ರಾಮಾಣಿಕ ಅಧಿಕಾರಿಲೆನ ಮಿತ್ತ್ ದೂರು ಕೊರ್ಪುನೆನೇ ಚಟ ಮಲ್ತೊಂದಲ್ ಪನ್ದ್ ಪಲಿ ಪಿಸಿರ್ಡ್ ಪನ್ಡೆರ್.