Last updated on March 18th, 2026 at 08:42 am
ಕುಡ್ಲ, ಮಾ. 17: ಜಾಗೆದ ವೈವಾಟ್ಡ್ ಆತಿನ ಎಚ್ಚಿಕಮ್ಮಿಡ್ ಪಗೆ ಕಟೊಂದು ಪಿಸ್ರ್ಡ್ ಆಂಜೊವು ಒರಿ ಕಾರ್ಡ್ ಸ್ಕೂಟರ್ಗ್ ಬೋಡು ಬೋಡೂಂದ್ ಎಡ್ತ್ದ್ ಕೆರ್ಯೆರೆ ತೂತಿನ ನಡಕೆ ಕುಡ್ಲಡ್ ನಡತ್ದ್ಂಡ್. ಪ್ರಕರಣೊಗು ಸಂಬಂಧಿತ್ದ್ ಆರೋಪಿನ್ ಪೊಲೀಸೆರ್ ಕೈದ್ ಮಲ್ತ್ದ್, ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್.
ಗಡಿಕುಲಾತಿನ ಆಂಜೊವುನು ಮಲ್ಲಿಕಟ್ಟೆ ನಿವಾಸಿ ಮೋಹನ್ ದಾಸ್ ಶೆಟ್ಟಿ (56) ಪನ್ದ್ ಗುರ್ತ ಪತ್ತ್ದೆರ್. ಆರೋಪಿನ್ ಮಹಮ್ಮದ್ ಶರೀಫ್ ಪನ್ದ್ ಗುರ್ತ ಪತ್ತ್ದಿತ್ತ್ದ್, ಮೊಕುಲಿರ್ವೆರೆ ನಡುಟು ಜಾಗೆದ ವೈವಾಟ್ಗ್ ಸಂಬಂಧಿತಿನ ವಿವಾದ ಇತ್ತ್ಂಡ್. ತೊರ್ತಲ್ ಬೊಕ್ಕ ವಾಮಂಜೂರ್ಡ್ ಸುಮಾರ್ 2 ಕೋಟಿ ರೂಪಾಯಿ ಇನ್ವೆಸ್ಟ್ ಮಲ್ದಿನ ವಿಚಾರೊಡು ಉಂಡಾತಿನ ಅಸಮಾಧಾನೊನೇ ಈ ನಡಕೆಗ್ ನೆವನ ಪನ್ದ್ ತೆರಿದ್ ಬೈದ್ಂಡ್.
ಅಂಗಾರೆ ಕಾಂಡೆ ಸುಮಾರ್ 11:30 ಗಂಟೆದ ಅಂದಾಜಿಗ್ ಪೇಂಟೆದ ಆರ್ಯ ಸಮಾಜ ಸಾದಿದ ಕೈತಲ್ ಇರ್ವೆರೆ ನಡುಟು ಪಾತೆರಕತೆ ನಡತ್ದ್ಂಡ್. ಈ ಪೊರ್ತುಡು ಆರೋಪಿ ಮೋಹನ್ ದಾಸ್ ರೆನ ಮೊಬೈಲ್ನ್ ಒಯ್ತೊಂದೆ. ಬೊಕ್ಕ ಮೋಹನ್ ದಾಸ್ ಶೆಟ್ಟಿ ಆರೆನ ಸ್ಕೂಟರ್ಡ್ ಪೋವೊಂದುಪ್ಪುನಗ, ಆರೋಪಿ ಆಯನ ಇನೋವಾ ಕ್ರಿಸ್ಟಾ ಕಾರ್ನ್ ಬೀಸ ಬುಡೊಂದು ಬತ್ತ್ದ್, ಪಿರವುರ್ದ್ ಸ್ಕೂಟರ್ಗ್ ಎಡ್ತ್ದ್ ಕೆರ್ಯೆರ ತೂತೆ ಪನ್ದ್ ಒಯಿಲ್ಡ್ ಬರೆತೆರ್.
ಈ ಬಗೆಟ್ ಮೂಡಾಯಿ ಕುಡ್ಲ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ದ್, ಜಡ್ತೆ ಮಲ್ತಿನ ಪೊಲೀಸೆರ್ ಆರೋಪಿನ್ ಕೈದ್ ಮಲ್ತ್ದೆರ್. ಪ್ರಕರಣೊದ ನನದ ಕ್ರಮೊಕು ನ್ಯಾಯಂತಡೆಗ್ ಲೆತೊಂದು ಪೋತ ಪನ್ದ್ ಪೊಲೀಸ್ ಪ್ರಕಟಣೆ ತೆರಿಪಾದ್ಂಡ್.