Last updated on March 18th, 2026 at 10:12 am
ಒಡಿಪು, ಮಾ. 18: ಕಮರ್ಷಿಯಲ್ ಸಿಲಿಂಡರ್ದ ಕುಂದೆಲ್ರ್ದಾವರ ಒಡಿಪು ಜಿಲ್ಲೆಡ್ 150ರ್ದ್ಲಾ ಎಚ್ಚ ಹೊಟೇಲ್ಲು ಬಂದ್ ಆತ ಪನ್ದ್ ಜಿಲ್ಲಾ ಹೊಟೇಲ್ ಮಾಲಕೆರೆ ಸಂಘ ತೆರಿಪಾದ್ಂಡ್.
ಕೆಲ ದಿನೊರ್ದಿಂಚಿ ಹೊಟೇಲ್ಲೆಡ್ ಉರ್ಪೆಲರಿತ ಉನ್ಪು, ದೋಸೆ ಸೇರ್ದ್ ಬೇತೆ ತೆಸ್ಲೆನ್ ಉಂತಾದ್ ಹೊಟೇಲ್ ನಡಪಾವೊಂದಿತ್ತೆರ್. ಆಂಡ ಇತ್ತೆ 150ರ್ದ್ಲಾ ಎಚ್ಚ ಹೊಟೇಲ್ಲೆಗ್ ಬೀಗ ಪಾಡ್ದೆರ್. ಗ್ಯಾಸ್ ಸಪ್ಲೈ ಆವಂದಿನೆರ್ದಾವರ ಅನಿವಾರ್ಯವಾದ್ ಹೊಟೇಲ್ ಬಂದ್ ಮಲ್ಪೊಡಾದ್ ಬೈದ್ಂಡ್ ಪನ್ಪಿ ಪಲವೆನ್ಲಾ ಪಾಡ್ದೆರ್. ಡಿಮ್ಯಾಂಡ್ಗ್ ತಕ್ಕ ಸಿಲಿಂಡರ್ ಸಪ್ಲೈ ಆಂಡ ಮಾತ್ರ ಹೊಟೇಲ್ ಓಪನ್ ಮಲ್ಪೊಲಿ ಪನ್ದ್ ಒರಿ ಹೊಟೇಲ್ದ ದನಿ ಪನ್ಡೆರ್.
ಕೆಲ ಹೊಟೇಲ್ಲೆಡ್ ಕನಕ್ದ ದಿಕ್ಕೆಲ್ಡ್ ಆಟಿಲ್ ಮಲ್ತೊಂದಿತ್ತೆರ್, ಆಂಡ ಇತ್ತೆ ಕಾರ್ಮಿಕೆರೆ ಕುಂದೆಲ್ರ್ದಾವರ ಅವೆಕ್ಲಾ ತಲೆಪಾತ್ಂಡ್. ಬೋಡಾಪಿನಾತ್ ಕನಕ್ಲಾ ಇಜ್ಜಿ. ಪೇಂಟೆಡ್ ಕನಕ್ ಮಾರುನಕ್ಲೆನ ಸಂಖ್ಯೆಲಾ ಬಾರೀ ಕಮ್ಮಿ. ಕನಕ್ ಪಿರಿಯಲಾ ಆತ್ಂಡ್. 2 ವಾರೊಗು ದುಂಬು ದಿನೊಕು 2 ರ್ದ್ 3 ಸಾರ ರೂ. ಮೌಲ್ಯೊದ ಕನಕ್ ಮಾರ್ದ್ ಪೋವೊಂದಿತ್ತ್ಂಡ್. ಮುಖ್ಯವಾದ್ ಹಾಲ್ದಕುಲು, ಇಲ್ಲದಕುಲು ಕೊನೊಪೆದೆರ್. ಆಂಡ ಇತ್ತೆ ಹೊಟೇಲ್ದಕ್ಲೆನನೇ ಬಾರೀ ಡಿಮ್ಯಾಂಡ್. ದಿನೊಕು 10 ಸಾರ ರೂಪಾಯಿರ್ದ್ಲಾ ಎಚ್ಚಿಗೆ ಮೌಲ್ಯೊದ ಕನಕ್ ಸೇಲ್ ಆವೊಂದುಂಡು ಪನ್ದ್ ತೆಂಕಪೇಟೆದ ಕನಕ್ ಬೇರದ ಮನೋಜ್ ಪನ್ಡೆರ್. ಇತ್ತೆನೇ ಅಡ್ವಾನ್ಸ್ ಆದ್ ಟನ್ಗಟ್ಲೆ ಕನಕ್ ಬುಕಿಂಗ್ ಮಲ್ದಿನಕುಲ್ಲಾ ಉಲ್ಲೆರ್. ಆಂಡ ಡಿಮ್ಯಾಂಡ್ಗ್ ತಕ್ಕ ಸಪ್ಲೈ ಮಲ್ಪರೆ ಆವೊಂದಿಜ್ಜಿ ಪನ್ದ್ ಆರ್ ಪನ್ಡೆರ್.