Last updated on March 18th, 2026 at 05:39 pm
ರಾಮಕುಂಜ, ಮಾ. 18: ವಿದ್ಯಾಸಂಸ್ಥೆಲೆಗ್ ಪುದರಾತಿನ ರಾಮಕುಂಜಡ್ ಶ್ರೀ ರಾಮಕುಂಜೇಶ್ವರ ದೇಲಂತಡೆದ ಕಡೆರ್ದ್ ಸಮಾಜೊನು ಮುಟ್ಟ ಮಲ್ಪುನಂಚಿನ ಒಂಜಿ ವಿಶೇಷ ಬೇಲೆ ನಡತೊಂದುಂಡು. ಶ್ರೀ ರಾಮಕುಂಜೇಶ್ವರ ದೇಲಂತಡೆದ ಆಡಳಿತ ಸಮಿತಿ, ಅರ್ಚಕೆರ್, ಬೈಲ್ದ ದೇವೆರೆ ಸೇವಕೆರ್, ಭಕ್ತೆರ್ ಮಾತಾ ಒಟ್ಟಾದ್ ಶ್ರೀ ದೇಬೆರೆನ ‘ಗೃಹದರ್ಶನ’ ಪನ್ಪಿನ ವಿಶೇಷ ಕಾರ್ಯಕ್ರಮೊನು, ಇಲ್ಲ್ ಇಲ್ಲ್ಗ್ ಪೋದು ಮಲ್ತೊಂದುಲ್ಲೆರ್.
ರಾಮಕುಂಜ ಬೊಕ್ಕ ಪರನೇರೆಂಕಿ ಗ್ರಾಮೊಲೆಗ್ ಗ್ರಾಮದೇವೆರಾಯಿನ ಶ್ರೀ ರಾಮಕುಂಜೇಶ್ವರನ ಒರುನು ಅರ್ಚಕೆರ್ ಪ್ರತಿ ಇಲ್ಲ್ ಇಲ್ಲ್ಗ್ ಕೊನೊದು, ಇಲ್ಲದ ತುಳಸೀ ಕಟ್ಟೆದ ಎದುರು ದೀದ್, ಇಲ್ಲದಕಲೆನ ಸಮ್ಮುಖೊಡೆ ಪೂಜೆ ಮಲ್ತ್ದ್, ಪ್ರಸಾದ ಕೊರ್ಪೆರ್. ಒಟ್ಟುಗು ಶ್ರೀ ಮದ್ಭಗವದ್ಗೀತೆ ಮಸ್ತಿರೆನ್ ಪ್ರಸಾದರೂಪೊಡು ಕೊರ್ದು ದಿನೊಲ ಒಂತೆ ಒಂತೆ ಆಂಡಲಾ ಓದುಲೆ ಪನ್ಪಿ ಪ್ರೇರಣೆ ಕೊರೊಂದುಲ್ಲೆರ್.
ಮಾರ್ಚ್ 15 ಕ್ ಸುರು ಆತಿನ ಶ್ರೀ ದೇವೆರೆನ ಗೃಹದರ್ಶನ ಮೀಯಾಳ, ಕಾಜರುಕ್ಕು, ಎಂಜಿರ, ಕಂಡಿಗ, ಅರ್ವೆ, ನೀರಾಜೆ, ಆತೂರು, ಗೋಕುಲನಗರ, ಪೆರ್ಜಿ, ಕೊಂಡ್ಯಾಡಿ, ಸಂಪ್ಯಾಡಿ, ಗಾಣಂತಿ,ಕುಂಡಾಜೆ, ಗೋಳಿತ್ತಡಿ, ಶಾರದಾನಗರ, ಕೆದಿಲ ಭಾಗೊಲೆಡೆ ನಡತ್ದ್ಂಡ್. ಮಾರ್ಚ್ 18 ಬೊಕ್ಕ 19 ಗ್ ಬರೆಮೇಲ್, ಇರ್ಕಿ, ಬಾಜಳ್ಳಿ, ಬಾರಿಂಜ & ಗಾಂದಾರಿಮಜಲ್, ಕಟ್ಟಪುಣಿ, ಅರ್ಬಿ, ಕಲ್ಲೇರಿ, ಬಾಂತೊಟ್ಟು ಭಾಗೊಲೆಡೆ ನಡಪರೆಗುಂಡು.
ಶ್ರೀ ರಾಮಕುಂಜೇಶ್ವರ ದೇಲಂತಡೆಡ್ ತಿಂಗೊಲ್ದ ಚೌತಿ ಪೂಜೆದ ಲೆಕ್ಕೊಡುಉಂದೇ ಬರ್ಪಿನ ಮಾರ್ಚ್ 22, 2026 ನೇ ಐತಾರದಾನಿ ಕಾಂಡೆ 7:45ರ್ದ್ ಶ್ರೀ ಗಣಪತಿ ಹೋಮ ಬೊಕ್ಕ ಬಯ್ಯ 7 ಗಂಟೆರ್ದ್ ಶ್ರೀ ದುರ್ಗಾ ಪೂಜೆ ನಡಪರೆಗುಂಡು ಪನ್ದ್ ದೇಲಂತಡೆದ ಪ್ರಕಟಣೆ ತೆರಿಪಾದ್ಂಡ್.