Last updated on March 19th, 2026 at 01:46 pm
✍🏻 ಕುವಿಕು ಕಣ್ವತೀರ್ಥ
ಕೋಡೆ ಕುಡ್ಲಗ್ ಪೋಯಿನಾಲ್ ಯಾನ್ ಅಲ್ತು ಸೀದಾ ಪುತ್ತೂರುಗು ಪೋದು ಬರ್ಕ. ಮೆಗ್ದಿನ್ಲಾ ಜೋಕ್ಲೆನ್ಲಾ ತೂಯಿಲೆಕಲಾ ಆಂಡ್, ಪುತ್ತೂರು ಜಾತ್ರೆಗ್ ಪೋಯಿಲೆಕಲಾ ಆಂಡ್ಂದ್ ಬಯ್ಯ ನಾಲರೆಕ್ ಜ್ಯೋತಿದಲ್ಪ ಪುತ್ತೂರು-ಸುಳ್ಯ ಬರೆತಿನ ಕೆಂಪು ಬಸುಕು ಬರ್ತ್ಯೆ.
ಪಿರವುಡೆ ಒಂಜೇ ಬಾಕಿಲ್ ಇತ್ತಿನ ಆ ಬಸುತ ಉಲಯಿ ಪೋದಾನಗ ದಾದೆನ್ ತೂಪುನಿ! ಒರಗ್ ಎಂಕೇ ಆಜಿರ ಆಂಡ್! ಯಾನ್ ಒಲ್ಲಾ ಶಾಲೆದ ಬಸುಕು ಪೊಗ್ಯೆನಾ! ಒರ ಕಣ್ಣ್ ಪಿಲಿ ಪಿಲಿ ಮಂತ್ ಅಂಚಿಂಚಿ ತೂಯೆ.
ಇಜ್ಜಪ್ಪಾ… ಶಾಲೆ ಬುಡ್ನ ಪೊರ್ತತ್ತಾ ಅಂಚ ಜೋಕುಲು, ಅವುಲು ಮೂಲು ಇಡೆ ಇಡೆಟ್ ಒಂಜಿ ರಡ್ಡ್ ಬೆರಕೆ ಬುಡುಂಡ ಬಸು ನಿಲಿಕೆ ಕೊಲೇಜಿದ ಜೋಕುಲು. ಕುಲ್ಲೆರೆ ಬುಡಿ ಉಂತೆರೆಲಾ ಜಾಗೆ ಇಜ್ಜಿ! ನನ ಪನೀ ನಡ್ಪತ್ತ್ಗ್ ಪೋಯೀಂದ್ ಒಂತೆ ದುಂಬು ಪೋಯೆರೆ ನುರ್ಕ್ಯೆ.
ಯಾನ್ ಸುರುವೇ ಪನಿ ತೋರ, ಒಟ್ಟಿಗೆ ಒಂಜಿ ಚೀಲಲಾ ಉಂಡು. ಜವನೆರ್ ಜೋಕುಲು ಒಂಜಿ ನಮುನೆ ತೂಯೆರ್. ಪನಿ ಬರಿಕುಂತುಲೆ ಪನ್ನಗ “ನನ ಓಡೆ ಬರಿಕ್” ಒರಿ ಹುಡುಗೆ ಪನೊಡಾ… ಮೆಲ್ಲ ದುಂಬು ಬತ್ತೆ.
ಎಂಕೊಂಜಿ ಪ್ರಾಯದಲೆಗ್ ಏರಾಂಡ ಪನಿ ಕುಲ್ಲೆರೆ ಜಾಗೆ ಕೊರುವೆರಾಂದ್ ಆಸೆಡ್ ಕುಲ್ಲುದಿನ ಜೋಕ್ಲೆನ ಮೋನೆ ತೂಯೆ… ಎಬ್ಬೇ… ಒಂಜೆತೆ ಮೋನೆಡಾಂಡಲಾ ಆ ಲಕ್ಷಣ ತೋಜುಜಿ.
ನನ ಬಿ.ಸಿ.ರೋಡು ಮುಟ್ಟ ಉಂದುನನೇ ಗತೀಂದ್ ಕಂಬಗ್ ಎರಗ್ದ್ ಉಂತ್ಯೆ.
ಬಸು ಜ್ಯೋತಿದಲ್ತು ಕಂಕನಾಡಿಗ್ ಎತ್ತೆರೆನೇ ಅರ್ಧಗಂಟೆ ತಾಗ್ಂಡ್. “ಅಯ್ಯೋ ದೇವೆರೇ… ಉಂದು ಪುತ್ತೂರುಗು ಎತ್ನಗ ಎನ್ನ ಗಂಟ್ ಬೇನೆದ ಕಾರ್ ನ್ ಕೊನೊಯೆರೆ ಬೊರ್ದಗಾಡಿ ಬೋಡಾವು!” ಎನ್ನಿದ್ ನನ ಪೊರ್ತು ಪೋವೊಡೇ ದಾದ.
ಮನ್ಪುನಿ…? ಏರೆಡಾಂಡ ಪಾತೆರ್ಗ ಪಂಡ, ಏರೆಡ್ ಪಾತೆರುನಿ. ಈ ಕೊಲೇಜಿದ ಜೋಕುಲು ಮಲ್ಲ ದಿಮಾಕ್ ತೋಜಾವ. ಓವಾ… ಲೋಕರ್ದ್ ಬತ್ತಿನಲೆನ್ ತೂಪಿಲೆಕ ತೂಪ ಎನನ್ಂದ್ ಎಂಕಾಪುಂಡು. ಮನೀಪಂದೆ ಉಂತ್ಯೆ.
ಮೆಲ್ಲ ಬರಿತ ಸೀಟ್ ಡ್ ಕುಲ್ದಿನ ಮೂಜಿ ಪೊಣ್ಣುಲೆನ್ ತೂಯೆ. ಮೂವೆರ್ಲಾ ಮೊಬೈಲ್ದ ಬಲ್ಲ್ನ್ ಕೆಬಿಕ್ ತಿಕ್ಕಾದ್ ದಾದನಾ ತೂವೊಂದುಲ್ಲೆರ್. ಈ ಪುಡೆಕ್ ನಿಲ್ಕ್ಯೆ.
ರಡ್ಡ್ ಗಡ್ಡ ಮೀಸೆ ಕೊಡಿಪುನ ತುಂಡು ಜವನೆರ್ ಮೊಬೈಲ್ಡ್ ದಾದನಾ ಗೊಬ್ಬು ಗೊಬ್ಬೊಂದುಲ್ಲೆರ್. ಒರಿಯನ ಮೊಬೈಲ್ಡ್ ಬೈಕ್ ಬಲಿಪುಂಡು… ಬೇಡಿ ಪುಡವುಂಡು… ಡಿಸಿಂ ಡುಸಿಂ…
ನನ ಎದುರುದ ಜೋಕುಲು ದಾನುವೆರ್ ತೂಕಾಂದ್ ಆ ಸೀಟ್ ಗ್ ನಿಲ್ಕ್ಯೆ.
ರಡ್ಡ್ ಆಣ್ ಜೋಕುಲು ಕೆಬಿಕ್ ದಾದನಾ ತಲ್ಲ್ದ್ ತರೆ ಅಡಿಕ್ ಪಾಡ್ದ್ ಕುಲ್ಲುದ! ಪಾಪ ಕೆಬಿ ತೋರುಂಡು ತೋಜೊಡು ಎನ್ಯೊಲಿಯಾ… ಅತ್ತಪ್ಪಾ… ಇತ್ತೆದ ಕೆಬಿಕ್ ತಿಕ್ಕಾದ್ ಪದ ಕೇನುನ ಕೊಡಂಗೆ ಅವು…
ಒಂಜಿ ಮೆಯಿಟೆ ಸೆಕೆ, ಒಂಜಿ ಮೆಯಿಟೆ ಬಸುಟು ಉಪ್ಪಡಚ್ಚಿಲ್ ಮಂಡೆಗ್ ಒತ್ತುದು. ದಿಂಜಾಯಿಲೆಕ ದಿಂಜಿದಿನ ಬಸು. ಅಯಿಕ್ ತಕ್ಕ ಮಾರ್ಗಡ್ ಬಯ್ಯದ ಪೊರ್ತು, ಗಾಡಿಲೆದ ತುರ್ತ. ಅವುಲವುಲು ಬ್ಲೋಕ್. ಎಂಚಾಂಡಲ ಪಂಪೈಲ್ ಎತ್ನಗ ಎಂಕ್ ಸಾಕಾಂಡ್.
ನನ ಒಂತೆ ಬಸು ಬೀಸ ಪೋಪು. ಮಾರ್ಗದ ಬ್ಲೋಕ್ ಕಮ್ಮಿಯಾಂಡ್. ಪನೀ ಕಂಡಿಡೆ ಗಾಳಿ ಬೀಜುಂದು ಎನ್ನಿದ್ ಒಂಜಿ ಸೇಂಕೆ ಬುಡ್ಯೆ.
ಆತಾನ ಎನ್ನ ಬರೀಟ್ ಉಂತುದಿನ ಜವಾಂದಿ ಪೊಣ್ಣನ ಪೋನು ರಿಂಗಾಂಡ್. ಪೋನು ದೆತ್ದ್ ಪಾತೆರ್ರೆ ಸುರುಮಂತಲ್, ಕುಸು ಕುಸು ತೆಲಿಕೆ ಕೇನ್ನಗ ಏರಾ ಅಲೆನ ಮುಟ್ಟದಕುಲೂಂದು ತೋಜುಂಡು, ಕಜಿಪು, ಗಂಜಿ, ಕೋಡೆದ ಇನಿತ, ಮುರನಿದ ಮಾತಾ ಆದ್ ಕುಡುಮದ ಮದಿಮೆ ಇಲ್ಲೊಕ್ಕೆಲ್, ಬೂತ, ಕೋಲ ಇಂಚ ಏತೊಂಜಿ ಸುದ್ದಿ…, ಪಾತೆರಕತೆ, ತೆಲಿಕೆ—ಆವೊಂದೇ ಇತ್ತ್ಂಡ್…
ಆತಾನಗ ಯಾನ್ ಉಂತುನಲ್ತು ಮೂಜಿ ಸೀಟ್ ದುಂಬುಡು ಕಂಡಿದ ಬರಿಟ್ ಕುಲ್ದಿನ ಪೊಣ್ಣುಲ ಅಲೆನ ಬರಿಟ್ ಒತ್ತ ಕುಲ್ದಿನ ಜವನೆಲ ಪಾತೆರ್ರೆ ಸುರುಮಂತೆರ್. ಮೆಲ್ಲ ಎನ್ನ ಕೆಬಿ ಅಂಚಿ ಪೋಂಡು… ದಾದಾಂಡ ಎಂಕ್ ಅರ್ಥ ಆವೊಡೇ… ಟಸ್ಕ್ ಪುಸ್ಕ್ ಇಂಗ್ಲಿಷ್! ಕೇನ್ನಗ ಒರ ಕೊಸಿಯಾಂಡ್—ನಮ್ಮ ಊರುದ ಜೋಕುಲುಲಾ ಏತ್ ಪೊರ್ಲು ಇಂಗ್ಲಿಷ್ ಪಾತೆರ್ವೆರ್!
ಅಕ್ಲೆನ ಪಾತೆರ ನಡತೊಂದೇ ಇತ್ತ್ಂಡ್. ಇತ್ತೆ ಬಸು ಪಡೀಲ್ ದ ರೈಲ್ ಮಾರ್ಗದ ಅಡಿತ ಮಾಟೆಡೆ ನೂರೊಂದು ಆಮೈಟೆ ಪಿದಯಿ ಬತ್ತ್ಂಡ್. ಬಸು ಇತ್ತೆ ಬೀಸ ಬಲಿಪೆರೆ ಸುರುವಾಂಡ್.
ಕಂಡೆಕ್ಟರ್ ಟಿಕೇಟ್ ಕೊರ್ಯೆರೆ ಬತ್ತೆ. ಒರಿ ಒರಿ ಜೋಕುಲೆಡ್ ನಾಲ್ ನಾಲ್ ಸರ್ತಿ ಕೇನೊಡು. ಪಾಪ ಅಯನ ಅವಸ್ಥೆ ತೂದು ಎಂಕೇ ಬೇಜಾರಾಂಡ್. ಇಡೀ ಲೋಕನೇ ಮೊಬೈಲ್ದ ಉಲಯಿ ನೀಂದೊಂದು ಉಪ್ಪುನಗ, ಅಕ್ಲೆನ್ ಬೊಟ್ಟುದು ಮುಟ್ಟುದು ಟಿಕೇಟ್ ಕೊರ್ಪುನ ಅಯನ ಕರ್ಮ ತೂದು ಬಂಜಿಪೊತ್ತ್ಂಡ್.
ಚಿಲ್ಲರೆ ಕೇಂಡೆ, ಮೋಡೆ ಏರು ತೂಯಿಲೆಕ ಆಯನ್ ತೂಪುನ ಜೋಕ್ಲೆನ್ ತೂನಗ ದಾದ ಪನೊಡೂಂದೆ ತೆರಿಯುಜಿ. ಪಾಪ ಕಂಡೆಕ್ಟರ್ ಎನ್ನ ಮೋನೆ ತೂದು ಪಂಡೆ: “ಮುಕ್ಲೆಗ್ ಮೊಬೈಲ್ ದ ಉಲಯಿ ಬೂರುಂಡ ಟಿಕೇಟ್ದ ಕಾಸ್ ಕೇಂಡ ಕೇನುಜಿ. ಬೇತೆ ದಾದಾಂಡ ಆಂಡ ಪಕ್ಕ ಕೇನುಂಡು.”
ಎನಡ್ “ಈರ್ ದೂರಾ?” ಕೇಂಡೆ. ಯಾನ್ “ಪುತ್ತೂರುಗಣ್ಣಾ, ಸೀಟ್ ಒಂಜಿ ತಿಕ್ದುಂಡ ಎಡ್ಡೆ ಇತ್ಂಡ್. ಗಂಟ್ ಬೇನೆಡ್ ದಿಂಜ ಉಂತೆರೆಲಾ ಆಪುಜಿ,” ಪಂಡೆ.
“ಮುಲ್ಪನೆ ಉಂತುಲೆ, ಬಿ.ಸಿ.ರೋಡುಗೆತ್ತ್ಂಡ ಮೂಲು ರಡ್ಡ್. ಸೀಟ್ ಕಾಲಿಯಾಪುಂಡು,” ಪಂಡೆ. ಅಂಚ ಅವುಲೇ ಉಂತೊಂಡೆ.
ಬಸು ಇತ್ತೆ ರುಮು ಕೂಟುದು ಪೋವೊಂದುಂಡು.
ಕಂಕನಾಡಿಡ್ ಪಾತೆರ್ರೆ ಸುರುಮಂತಿನಾಲ್ ಪಾತೆರೊಂದೇ ಉಲ್ಲಲ್. ಮೊಬೈಲ್ ಪತೊಂದು ತೂಪುನಕುಲು ಅಕ್ಲೆನನೇ ಲೋಕಡ್ ಉಲ್ಲೆರ್.
ಪಿರವುರ್ದು ಕಂಡೆಕ್ಟರ್ ನ ದೊಂಟೆ ಕೇನುಂಡು: “ಬಿ.ಸಿ ರೋಡ್… ಬಿ.ಸಿ.ರೋಡ್…”
ಆತಾನಗ ಆ ಪೊಣ್ಣು, “ಬಿ.ಸಿ.ರೋಡು ಎತ್ತ್ಂಡ್, ಪೋನು ದೀಪೇವಾ…” ಪನೊಂದುಲ್ಲಲ್.
ಎಂಕ್ ಆಚಿರ ಆಂಡ. ಕುಡ್ಲರ್ದ್ ಬಿ.ಸಿ ರೋಡು ಮುಟ್ಟ ಪಾತೆರೊಡಾಂಡ ಆ ಮೊಬೈಲ್ ಗ್ ಏತು ರೂಪಾಯಿ ದ ರಿಚಾರ್ಜ್ ಮಂತ್ದುಪ್ಪೊಡು… ಅತ್ತ್ಂಡ ಈತ್ಲಾ ಪಾತೆರೊಡಾಂಡ ಏತ್ ಇಸಯ ಉಪ್ಪೊಡೂ!!!
ಬಿ.ಸಿ.ರೋಡು ಎತ್ತಿನೆಟಾಂಡ್ ನನಲಾ. ಒಂತೆ ದೂರ ಇತ್ತುದುಂಡ ನನಲಾ ಪಾತೆರ್ದುವಲಾ ದಾನ್ನ…!!
ದಾದ ಅವಸ್ಥೆಯೇ… ಲೋಕದ ಪರಿವೆನೇ ಇಜ್ಯಂದೆ. ಈತ್ ಮಾತಾ ಪಾತೆರೊಡಾಂಡ ಇತ್ತೆದ ಜೋಕುಲು ವಾ ಲೋಕಡ್ ಉಲ್ಲೆರ್.
ಈ ಮೊಬೈಲ್ದ ದಾದ ಮಹಿಮೆಪ್ಪಾ…
ಬಸುಟು ಉಪ್ಪುನಗ ಪೋನು ಬತ್ತ್ಂಡ್: “ಯಾನ್ ಬಸುಟುಲ್ಲೆ, ಬೊಕ್ಕ ಮನ್ಪುವೆ,” ಪಂಡ್ದ್ ಮೊಬೈಲ್ ಕಟ್ಟ್ ಮನ್ಪುನ ಎನ್ನಂಚಿನಕುಲು ಓಲು ಈ ಜೋಕುಲು ಓಲು.
ಬಸುಟು ಬರಿಟಿತ್ತಿನಕ್ಲೆಡ್ ಪಾತೆರೊಂದು ಜಪ್ಪುನಡೆ ಎತ್ತ್ನಗ ಅಕ್ಲೆಡ್ “ಬರ್ಪೆ” ಪಂಡ್ದ್ ಜಪ್ಪುನ ಆ ಕಾಲ ಓಂಡು. ಮೊಬೈಲ್ ಕಟ್ ಮಂತ್ದ್ ಜಪ್ಪುನ ಈ ಕಾಲ ದಾದ.
ಬಸುಕು ಬರ್ತಿನಲ್ತು ಜಪ್ಪುನಡೆ ಮುಟ್ಟದ ಒಂಜೊಂಜಿ ಸ್ಟೋಪ್ನ್ಲಾ ಕಣ್ಣ ಬಾಯಿ ಬುಡ್ದು ತೂದು, ಆ ಜಾಗದೆ ಗುರ್ತ, ಪುದರ್ ನೆಂಪು ದೀಪುನ ಆ ಕಾಲ ಓಂಡು.
ಸ್ಟೊಪ್ ಎತ್ತ್ನಗ ಕಂಡೆಕ್ಟರ್ನ ಲೆಪ್ಪುಗು ಅಲ್ಕ್ ಬೂರ್ದು ಜಪ್ಪೆರೆ ಬಲಿಪುನ ಈ ಕಾಲ ಓಂಡು.
ಒಟ್ಟಾರೆ ನರಮಾನಿ ಮೊಬೈಲ್ ಪನ್ಪುನ ಮಾಯಾ ಜಾಲದ ಉಲಯಿ ತಿಕೊಂದು ಆತ್ಂಡ್.
ಮನಸ್ಡ್ ಎನ್ಯೊಂದು ಇಂಗ್ಲೀಷ್ ಪಾತೆರುನ ಜೋಕುಲೆ ಬರಿತ ಸೀಟ್ ಬಿ.ಸಿ ರೋಡುಡು ಕಾಲಿ ಆದಾನಗ ಯಾನ್ ಪೋದು ಅವುಲು ಕುಲ್ಯೆ.
ಬಸು ಅಲ್ತು ಪಿದಡ್ಂಡ್. ಬರಿಟ್ ಕುಲ್ದಿನ ಜೋಕುಲೆನ ಇಂಗ್ಲೀಷ್ ಸುರುವಾಂಡ್. ಎಂಚಿನ ಇಂಗ್ಲಿಷಪ್ಪಾ…!!
ಆನಿ ಪರೆಂಗಿಲು ನಮ್ಮ ದೇಶ ಬುಡ್ದು ಪೋನಗ ಮೂಲು ಬಿರ್ಕ್ದ್ ಪೋತಿನ ಬಿತ್ತ್ ಇತ್ತೆ ಎಡ್ಡೇನ ಕೊಡ್ತ್ದ್ಂಡ್. ಕೋಡೆ ಪುಟ್ಟಿನ ಬಾಲೆರ್ದ್ ತರೆ ನರೆದ್ ಕೂಲಿ ತಾಲ್ದಿನ ಪರಬೇರ್ ಮುಟ್ಟಲಾ ಇಂಗ್ಲೀಸ್ದ ಉಲಾಯಿ ಸೇರೊಂದೆರ್.
ಓಡೆ ಮುಟ್ಟ ಪಂಡ ಅಪ್ಪೆ ಭಾಷೆ ಒಂಜಿ ಉಂಡು ಪನ್ಪುನಲಾ ಮರತಿಲೆಕ, ಅಂಚಪಂಡ್ದ್ ನಮ್ಮ ಜೋಕ್ಲೆಗ್ ಇಂಗ್ಲೀಷ್ ಬೊರ್ಚೀಂದ್ ಅತ್ತ್. ಅಕುಲು ಮಾತಾ ಭಾಷೆಲ ಕಲ್ಪೊಡು, ಲೋಕ ಮಾತಾ ತೆರಿಯೊಡು.
ಅಂಡ ನಮ ನಮ ಪಾತೆರ್ನಗ ಇಂಗ್ಲಿಷ್ ಬೋಡಾ…? ಎನ್ನ ಮಂಡೆಡ್ ಸಾರ ಅಲೆಚನೆ ಬರೊಂದು ಪೋವೊಂದು ಉಂಡು.
ಪಾಣೇರ್ ಸಂಕ ಕರಿದ್ ಮಾರ್ಗದ ಬೇಲೆದ ಗೌಜಿಡ್ ದೂಳುದ ಉಲಯಿಡೆ ಬಸು ರಕ್ಕಸಲೆಕ ಬಲಿತೊಂದುಂಡು. ದೇವಿ ಮಹಾತ್ಮೆದ ಮೈಸಾಸುರೆ ಬತ್ತಿಲೆಕ, ಕುಡ ಅವುಲವುಲು ಗುರಿಕ್ ಬೂರೊಂದು ಲಕ್ಕೊಂದು, ಬರಿಟ್ಟಿತ್ತಿನ ಗಾಡಿದಾಯಗ್ ನೆರೊಂದು.
ಎಂಚಲಾ ಬಸು ಒಂಜಿರಡ್ಡ್ ತಿಕ್ಡ್ ಉಂತುದು ಮಾಣಿಗ್ ಎತ್ನಗ ಬಂಜಿ ಮಸಲೆರೆ ಸುರುವಾತ್ಂಡ್!!!
ಆತಾನಗ ಬರಿಟಿತ್ತಿನ ಇಂಗ್ಲಿಷ್ ಜೋಕುಲೆನೆಟ್ ಪೊಣ್ಣನ ಪೋನು ರಿಂಗ್ ಆಂಡ್. ಪೊಣ್ಣು ಪೋನು ದೆತ್ತಲ್…
ಯಾನ್ ನೆಂತೆ ಇತ್ತೆ ಪೋನುಡು ಇಂಗ್ಲಿಷ್ ಪಾತೆರುವಲ್ಂದ್. ಆಂಡಾ ಆಲ್ ಪಾತೆರ್ನ ಕೇಂದ್ ಎಂಕ್ ಸೋದ್ಯ ಮಾರ್ರೆ!!!!!
“ಹಲೋ… ಅಮ್ಮಾ… ಎಂಕ್ಳು ಬುಸುಟ್ ಉಳ್ಳೊ… ಬೋತ್ರಿ, ಬೋತ್ರಿ… ಓಡೆ ಎತ್ತ್ಂಡ್ತೊ ಗೊತ್ತಾಪ್ರಿ, ಕಲ್ಲಡ್ಕ ಕಡತ್ ಬತ್ತೊ…”
ಏತ್ ಪೊರ್ಲು ದ ಬಿರಣೆರೆ ತುಲು! ಜೋಕುಲೆಗ್ ಟಸ್ ಪುಸ್ ಇಂಗ್ಲಿಷ್ ಪಾತೆರೊಂದು ಮಾಣಿಗ್ ಎತ್ತಿನನೇ ಗೊತ್ತಾತಿಜಿ.
ಆಂಡಲಾ ಮಲ್ಲೆಜ್ಜಿ… ತುಲುಟು ಅಕ್ಲೆನ ಅಪ್ಪೆ ಭಾಷೆಡ್ ಪಾತೆರ್ಯೆರತ್ತಾ… ಎನ್ನ ಉಡಲ್ ತಲ್ಮೆನ ಆಂಡ್.
ಮೆಲ್ಲ ಪಂಡೆ: “ಮಾಣಿ ಕರಿದ್ ಮಿತ್ತೂರು ಎತ್ತ್ಂಡ್, ನನ ಪುತ್ತೂರುಗು ಕಾಲ್ ಗಂಟೆದ ಸಾದಿ.”
ಅಯಿನ್ ಕೆಂದ್ ಪೊಣ್ಣು ಪೋನುಡು ಪನ್ಪುಂಡು:
“ಅಮ್ಮಾ… ಎಂಕ್ಳ್ ಪುತ್ತೂರು ಮುಟ್ಟೊ ಎತ್ಯೊ… ನನ ಕಾಲ್ ಗಂಟೆಡ್ ಅವುಳ್ಪೊ… ನಿಕ್ಲ್ ಬಳ್ಳೇ… ಜಾತ್ರೆ ಸೂದ್ ಪೋಯಿ…”
ಪೊಣ್ಣು ಪಾತೆರೊಂದಿತ್ತಳ್. ಎಂಕ್ ಬೊಲ್ವಾರ್ಡ್ ಬಸು ಜಪ್ಪೊಡಾಂಡ್, ಯಾನ್ ಜತ್ತೆ.
ಮೊಬೈಲ್ ನಮನ್ ಏತ್ ಬದಲ್ ಮಂತ್ಂಡ್! ಓಲೇ ಪೋಂಡಲಾ ಈ ಮಾಯದ ಜಿಕಿಣಿ ಪೆಟ್ಟಿಗೆ ಇಜ್ಜಿಂಡ ಸಾಧ್ಯನೇ ಇಜ್ಜಿ ಪನ್ಪುನಡೆ ಮುಟ್ಟ ಎತ್ತ್ದ.
ದುಂಬುದ ಲೆಕ ಬಸುಟು ಬರಿಟಿತ್ತಿನಕ್ಲೆಡ್ ಪಾತೆರುನ ಇಜ್ಜಿ. ಪಿದಯಿ ಏತ್ ಮಾತಾ ಊರುಲು ಉಲ್ಲಂದಾವಡ್, ಆ ಊರುದ ಪುದರ್ಲೆನ್ ಅಂಗಡಿದ ಬೊರ್ಡುಡಾ, ಬಸ್ಟೇಂಡ್ ಡಾ ಓದುನಾವಡ್ ಒಂಜಿಲ ಇಜ್ಜಿ.
ಮಾತಾ ಮೊಬೈಲ್ ಲೋಕ. ಅತಿಮೀರ ಏರಾಂಡ ಪಾತೆರ್ಯೆರ್ಂಡಲಾ ನಂಕ್ ಅಕ್ಲೆಡ ಪಾತೆರ್ರೆ ಪೋಡಿಗೆ ಆಪುನ ವಿಷಯಲಾ ಉಂಡು.
ಬರಿಟ್ ಕುಲ್ಲುದು ಪಾತೆರ್ ಪಾತೆರ್ದ್ ಒಂಜಿ ಪೊಲಿಸಿ ಮನ್ಪಾಲೆ, ಇರೆಗ್ ಸಪುರ ಆವೊಡೂಂದು ಉಂಡೇ… ಎಂಕ್ಲೆನ ಒಂಜಿ ಪ್ರೋಡೆಕ್ಟ್ ಉಂಡು… ಇರೆಗ್ ಗಂಟ್ ಬೇನೆ ಉಂಡೇ… ಎಡ್ಡೆ ಎಣ್ಣೆ ಉಂಡು… ಪನ್ಪುನಕುಲು ಉಲ್ಲೆರ್.
ಒರೊರ ಪಾಪ ತೋಜುಂಡು, “ಬಂಜಿದ ಪಡಿಕ್ ನಾ ನಾ ಏಸ.” ಆಂಡ ಅಕುಲು ಮಾತ್ರೆ ತತ್ತ್ದ್ಲಾ ಬೇತೆ ಭಾಷೆಡ್ ಪಾತೆರುಜೆರ್—ಕನ್ನಡ, ತುಲು, ಮಲಿಯಾಳ ಅತ್ತ್ಂಡ ಹಿಂದಿ—ನಮ್ಮ ಭಾರತದ ಮಣ್ಣ್ದ ಭಾಷೆ.
ಬದಲಾಪುನ ಕಾಲದ ಒರುತ ಒಟ್ಟಿಗೆ ನಮಲಾ ಬದಲಾವೊಡೇ ಆಪುಂಡು. ಬೇತೆ ನಿಮುರ್ತಿ ಇಜ್ಜಿ. ಅಂಚ ಪಂಡ್ದ್ ನಮ್ಮ ಅಪ್ಪೆ ಭಾಷೆನ್ ಬುಡ್ಪುನಾತ್ ನಮ ಬದಲಾಯೆರೆ ಬಲ್ಲಿ. ನಮ ನಮ್ಮ ಜೋಕ್ಲೆಗ್ ಮಾತಾ ಭಾಷೆ ಕಲ್ಪಾಗ ಅಯಿತ ಒಟ್ಟಿಗೆ ಅಪ್ಪೆ ಭಾಷೆಡ್ ಪಾತೆರ್ಗ.
಼಼಼಼಼಼಼಼಼಼಼಼಼಼಼಼಼
ಕುವಿಕು ಕಣ್ವತೀರ್ಥ