Last updated on March 24th, 2026 at 09:55 am
ಬಂಟ್ವಾಳ, ಮಾ. 24: ಬಂಟ್ವಾಳ ತಾಲೂಕ್ದ ಸಜಿಪನಡು ಪ್ರದೇಶೊಡು ಪಲ್ಲಿದ ವಿಚಾರೊಡು ರಡ್ಡ್ ಕೂಟೊಲೆನ ನಡುಟು ಲಡಯಿ ಆದಿತ್ತ್ದ್ ತಲ್ವಾರ್, ಸೋಂಟೆ ಬೊಕ್ಕ ಕರ್ಬದ ರಾಡ್ಡ್ ಆಕೊಂದಿನ ನಡಕೆ ಭಾರೀ ಆತಂಕೊಗು ನೆವನ ಆತ್ಂಡ್. ತಲೆಮೊಗೇರ್ ಪಲ್ಲಿದ ಕೈತಲ್ ಲಡಯಿ ಆದಿತ್ತ್ದ್, ಗಡಿಕುಲಾತಿನಕ್ಲೆನ್ ಬಂಟ್ವಾಳ ಸರ್ಕಾರಿ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ನಡತೊಂದುಂಡು.
ಪಲ್ಲಿದ ವಿಚಾರೊಡು ತಕರಾರ್
ಅಬ್ದುಲ್ ನವಾಝ್ (42) ಮೇರ್ ಆರೆನ ಸಂಬಂಧೊದ ದಾವೂದ್ ಪನ್ಪಿನಾರೆನ ಒಟ್ಟುಗು ಪಲ್ಲಿಗ್ ಪೋದು ಪಿರ ಬನ್ನಗ ಶೌಕತ್, ಇಸಾಕ್, ಸಫಿಕ್, ಯಾಕೂಬ್, ಮಹಮ್ಮದ್ ಮುಸ್ತಫಾ, ನಾಸಿರ್ ಬೊಕ್ಕ ನಿಝಾಲ್ ಪನ್ಪಿನಕುಲು ಒಟ್ಟುಗು ಉಂತುದಿತ್ತ್ದ್, ಮೊಕುಲು ಬನ್ನಗ ಪೆದಂಬು ನೆರೊಂದು ಲಡಯಿಗ್ ಬತ್ತ್ದೆರ್ ಪನ್ದ್ ಆರೋಪ ಉಂಡು. ಬೊಕ್ಕ ಕತ್ತಿ, ಸೋಂಟೆಡ್ ಆಕ್ದ್ ಕೆರ್ಪ ಪನ್ದ್ ಪೋಡಿಕಟ್ಟಾದಿನ ಬಗೆಟ್ಲಾ ಆರೋಪ ಕೇನ್ದ್ ಬೈದ್ಂಡ್.
ಈ ಪ್ರಕರಣೊಗು ಸಂಬಂಧಿತ್ದ್ ಕುಡೊರಿ ಆಂಜೊವು ಅಬ್ದುಲ್ ಗಫೂರ್ (48) ಪನ್ಪಿನಾರ್ ಪ್ರತಿದೂರು ಬರೆಪಾದಿತ್ತ್ದ್, ಯಾಕೂಬ್, ಶಫೀಕ್, ಇಸಾಕ್, ಸಫ್ವಾನ್ ಬೊಕ್ಕ ಅಶ್ರಫ್ ಸಾಹೇಬ್ ಕರ್ಬದ ರಾಡ್ಡ್ ಆಕ್ದೆರ್ ಪನ್ದ್ ಆರೋಪ ಮಲ್ತ್ದೆರ್. ಈ ಪೊರ್ತುಡು, ಶೌಕತ್ ಅಲಿ (40) ಪನ್ಪಿನಾರ್ ಬರೆಪಾದಿನ ಕುಡೊಂಜಿ ಒಯಿಲ್ದ ಪ್ರಕಾರ, ದಾವೂದ್, ಜುಬೈರ್, ಸೈದುದ್ದೀನ್, ನವಾಜ್, ಗಫೂರ್, ಶರೀಪ್ ಬೊಕ್ಕ ಆಶಿಕ್ ಪಲ್ಲಿದ ವಿಚಾರೊಡು ಲಡಯಿ ಮಲ್ತ್ದ್ ಆಕ್ದೆರ್ ಪನ್ದ್ ಆರೋಪ ಉಂಡು. ಲಡಯಿ ಉಂತಾಯೆರೆ ಬತ್ತಿನ ಸಫಾನಾ, ನಿಜಾಲ್, ಇಸಾಕ್ ಬೊಕ್ಕ ಆಶ್ರಫ್ನ ಮಿತ್ತ್ಲಾ ದಾಳಿ ಮಲ್ಪರೆ ತೂತೆರ್ಗೆ.
ಒಟ್ಟಾರೆ ನಡಕೆಗ್ ಸಂಬಂಧಿತ್ದ್ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್ಡ್ ದೂರು ಬೊಕ್ಕ ಪ್ರತಿದೂರು ಸೇರ್ದ್ ಒಟ್ಟು ಮೂಜಿ ಬೇತೆ ಬೇತೆ ಪ್ರಕರಣೊಲು ದಾಕಲಾತ. ಪೊಲೀಸೆರ್ ಬಿಎನ್ಎಸ್ ಬೊಕ್ಕ ಶಸ್ತ್ರಾಸ್ತ್ರ ಕಾಯ್ದೆದ ಅಡಿಟ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.
ಪಲ್ಲಿದ ವಿಚಾರೊಡು ಸುರು ಆತಿನ ಈ ಲಡಯಿ ಹಿಂಸಾತ್ಮಕ ರೂಪೊಗು ತಿರ್ಗ್ದಿತ್ತ್ದ್, ಪ್ರದೇಶೊಡು ಉದ್ವಿಗ್ನ ವಾತಾವರಣ ಉಂಡಾತ್ಂಡ್. ಪೊಲೀಸೆರ್ ಪರಿಸ್ಥಿತಿನ್ ಅಂಕೆಗ್ ಕನವರೆ ಕ್ರಮ ಗೆತೊಂದೆರ್.