Last updated on March 24th, 2026 at 09:01 am
ಹಾಸನ, ಮಾರ್ಚ್ 24 : ಕಾಲಿ 7 ಸಾರ ರೂಪಾಯಿ ಕಾಸ್ಗ್ ಬೋಡಾದ್ ದೋಸ್ತಿನೇ ಕಿಡ್ನಾಪ್ ಮಲ್ತ್ದ್, ಗಾಂಜಾದ ಅಮಲ್ಡ್ ಅಮಾನುಷವಾದ್ ಆಕ್ದ್ ಕೆರ್ತಿನ ಭೀಕರ ನಡಕೆ ನಡತಿತ್ತ್ದ್, ಈ ಪ್ರಕರಣೊಗು ಸಂಬಂಧಿತ್ದ್ ಹಾಸನ ಪೊಲೀಸೆರ್ ಐವೆರ್ ಆರೋಪಿಲೆನ್ ಕೈದ್ ಮಲ್ತ್ದೆರ್.
ಅರಸೀಕೆರೆ ತಾಲ್ಲೂಕ್ದ ಕಾಡಯ್ಯನಕೊಪ್ಪಲು ಗ್ರಾಮೊದ ವರುಣ್ (22) ತೀರ್ದಿನ ಜವನೆ. ಇತ್ತೆ ಪ್ರಕರಣೊಗು ಸಂಬಂಧಿತ್ದ್ ಸತೀಶ್, ಉಮರ್, ವಿಜಯ್, ಚೇತನ್ ಬೊಕ್ಕ ಮನು ಪನ್ಪಿನ ಐವೆರ್ ಆರೋಪಿಲೆನ್ ಪತ್ತ್ದಿತ್ತ್ದ್ ಪ್ರಕರಣೊದ ಪ್ರಮುಖ ಆರೋಪಿ ಶಶಾಂಕ್ ಬೊಕ್ಕ ಬೇತೆ ಒಂತೆ ಜನಕ್ ಪೊಲೀಸೆರ್ ಬೇಪು ಪಾಡ್ದೆರ್.
ತೀರ್ದಿನ ವರುಣ್ ಬೆಂಗಳೂರ್ಡ್ ಡೆಲಿವರಿ ಬಾಯ್ ಆದ್ ಬೇಲೆ ಮಲ್ತೊಂದಿತ್ತೆ. ಕರಿನ ಆಜಿ ತಿಂಗೊಲುಗು ದುಂಬಾತೇ ಅಮ್ಮೆರೆನ್ ಕಲೆಯೊಂದಿನ ವರುಣ್, ಯುಗಾದಿ ಪರ್ಬೊದ ಲೆಕ್ಕೊಡು ಅಪ್ಪೆ ಇತ್ತಿನ ಊರ್ಗ್ ಬತ್ತ್ದೆ. ಮಾರ್ಚ್ 10ತಾನಿ ಬೈಕ್ ರಿಪೇರಿ ಮಲ್ಪಾಯೆರೆ ಪೋತಿನಾಯೆ ಇಲ್ಲಗ್ ಪಿರ ಬರಂದೆ ಇತ್ತಿನೆಕ್, ಆಯನ ಅಪ್ಪೆ ಕಲಾವತಿ ಮೇರ್ ಮಾರ್ಚ್ 15ತಾನಿ ಗಂಡಸಿ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಮಾರ್ಚ್ 10ತಾನಿ ಮುಖ್ಯ ಆರೋಪಿ ಶಶಾಂಕ್ ಬೊಕ್ಕ ಆಯನ ಏಳ್ ಜನ ದೋಸ್ತಿಲು ಸೇರೊಂದು ವರುಣ್ ಬೊಕ್ಕ ಆಯನ ದೋಸ್ತಿ ಲೋಹಿತ್ನ್ ಕಿಡ್ನಾಪ್ ಮಲ್ತಿತ್ತೆರ್. ಆರೋಪಿ ಶಶಾಂಕ್, ವರುಣ್ನ ಕೈರ್ದ್, ಗಾಂಜಾ ಗೆತೊನರೆ 7,000 ರೂ ಕಾಸ್ ಕೊರ್ದಿತ್ತೆಗೆ. ಆಂಡ, ವರುಣ್ ಗಾಂಜಾ ಕೊರಂದಿನೆಕ್ ಪಿಸ್ರ್ಡ್ ಶಶಾಂಕ್ ತನ್ನ ಗ್ಯಾಂಗ್ದ ಒಟ್ಟುಗು ಸೇರೊಂದು ಈ ಬೇಲೆ ಮಲ್ತ್ದೆ. ಕಿರಣ್ ಪನ್ಪಿನಾಯನ ತೋಟದಿಲ್ಲಡ್ ವರುಣ್ನ್ ಪತ್ತ್ರ್ದ್ ಪಾಡ್ದ್ ಮಾರ್ಚ್ 12 ಮುಟ್ಟ ಬುಡಂದೆ ರಡ್ಡ್ ದಿನ ತಾರಾಮರ ಆಕ್ದ್ ಕೆರ್ತೆರ್.
ವರುಣ್ನ ಕೈರ್ದ್ ಗಾಂಜಾ ಗೆತೊನರೆ ಶಶಾಂಕ್ 7 ಸಾರ ರೂ ಕಾಸ್ ಕೊರ್ದಿತ್ತೆ. ಆಂಡ ವರುಣ್ ಗಾಂಜಾ ಕೊರ್ದಿಜ್ಜಂಡ್. ಅಂಚಾದ್ ಶಶಾಂಕ್ ತನ್ನ ದೋಸ್ತಿಲೆ ಒಟ್ಟು ಸೇರ್ದ್ ಈ ಬೇಲೆ ಮಲ್ತ್ದೆಗೆ. ಈ ಬಗೆಟ್ಲಾ ಜಡ್ತೆ ಮಲ್ತೊಂದುಲ್ಲ ಪನ್ದ್ ಎಸ್ಪಿ ಶುಭಾನ್ವಿತ ಪನ್ತೆರ್.
ಆಜಿ ತಿಂಗೊಲುಗು ದುಂಬು ಅಮ್ಮೆ ತೀರಿನೆರ್ದಾವರ ಬೇಲೆಗ್ ಪನ್ದ್ ಬೆಂಗಳೂರು ಸೇರ್ದಿತ್ತಿನ ವರುಣ್, ಡೆಲಿವರಿ ಬಾಯ್ ಆದ್ ಬೆನೊಂದಿತ್ತೆ. ಯುಗಾದಿ ಗ್ ಊರ್ಗ್ ಬತ್ತಿನಾಯೆ, ಬೈಕ್ ರಿಪೇರಿ ಮಲ್ಪಾಯೆರೆ ಪೋದು ಪಿರ ಬೈದಿಜೆ. ಒರ್ಮೆಲಾ ನಾಡ್ದ್ ತಿಕ್ಕಂದಿಬೊಕ್ಕ ಅಪ್ಪೆ ಕಡೆಕ್ ನಾಪತ್ತೆ ಕೇಸ್ ಬರೆಪಾದೆರ್. ಆಂಡ ಆತೆಟ್ ಶಶಾಂಕ್ ಬೊಕ್ಕ ಗ್ಯಾಂಗ್ ವರುಣ್ ಬೊಕ್ಕ ಆಯನ ದೋಸ್ತಿ ಲೋಹಿತ್ನ್ ಕಿಡ್ನ್ಯಾಪ್ ಮಲ್ತ್ದ್ ಕೆರ್ದೇ ಪಾಡ್ದೆರ್