Last updated on March 23rd, 2026 at 04:56 pm
ವಾಷಿಂಗ್ಟನ್: 48 ಗಂಟೆದುಲಯಿ ಹೊರ್ಮುಜ್ ಜಲಸಂಧಿ ಓಪನ್ ಮಲ್ತಿಜಿಂಡ ಇರಾನ್ದ ಇಂಧನ, ಮೂಲಸೌಕರ್ಯೊಲೆನ್ ಪೊಡಿ ಮಲ್ಪುವ ಪನ್ದ್ ಎಚ್ಚರ್ಗೆ ಕೊರ್ದಿತ್ತಿನ ಅಮೆರಿಕ ಅಧ್ಯಕ್ಷೆ ಡೊನಾಲ್ಡ್ ಟ್ರಂಪ್ ಯೂರ್ಟನ್ ಆಕ್ದಿತ್ತ್ದ್, ಇತ್ತೆ ಮಧ್ಯಪ್ರಾಚ್ಯೊದ ಸಂಘರ್ಷೊನು ತೆಕ್ಕಾವುನ ದಿಟ್ಟಿಡ್ ಇರಾನ್ದ ಇಂಧನ ಬೊಕ್ಕ ಮೂಲಸೌಕರ್ಯೊಲೆನ ಮಿತ್ತ್ದ ಮಿಲಿಟರಿ ದಾಳಿಲೆನ್ ಐನ್ ದಿನೊತ ಮಟ್ಟ್ಗ್ ಉಂತಾವ ಪನ್ದ್ ಘೋಷಣೆ ಮಲ್ತ್ದೆರ್.
ಆರೆನ ಟ್ರೂತ್ ಅಕೌಂಟ್ಡ್ ಪೋಸ್ಟ್ ಮಲ್ದಿನ ಟ್ರಂಪ್, “ಇರಾನ್ದ ವಿದ್ಯುತ್ ಸ್ಥಾವರೊಲು ಬೊಕ್ಕ ಇಂಧನ ಮೂಲಸೌಕರ್ಯೊಲೆನ ಮಿತ್ತ್ದ ಒವ್ವೇ ಮಿಲಿಟರಿ ದಾಳಿಲೆನ್ ಐನ್ ದಿನ ದುಂಬು ಪಾಡೆರೆ ಅಮೆರಿಕದ ಸೇನಾ ಇಲಾಖೆಗ್ ಸೂಚನೆ ಕೊರ್ತೆ ಪನ್ದ್ ಉಲ್ಲೇಖ ಮಲ್ತ್ದೆರ್.
“ಕರಿನ ರಡ್ಡ್ ದಿನೊಟು ವಾಷಿಂಗ್ಟನ್ ಬೊಕ್ಕ ಟೆಹ್ರಾನ್ ಮಸ್ತ್ ಪಾತೆರಕತೆ ಮಲ್ತ್ದ” ಪನ್ದ್ ಡೊನಾಲ್ಡ್ ಟ್ರಂಪ್ ತೆರಿಪಾದಿತ್ತ್ದ್, ಇರಾನ್ದ ಇಂಧನ ಮೂಲಸೌಕರ್ಯೊಲೆನ ಮಿತ್ತ್ದ ಮಿಲಿಟರಿ ದಾಳಿಲೆನ್ ತಾತ್ಕಾಲಿಕವಾದ್ ಉಂತಾದ ಪನ್ದ್ ಘೋಷಣೆ ಮಲ್ತ್ದೆರ್.
ಹೊರ್ಮುಜ್ ಜಲಸಂಧಿದ ನಿರ್ಬಂಧೊನು 48 ಗಂಟೆದುಲಯಿ ದೆತ್ತಿಜಿಂಡ ಇರಾನ್ದ ಇಂಧನ ಬೊಕ್ಕ ಮೂಲಸೌಕರ್ಯೊಲೆನ ಮಿತ್ತ್ ದಾಳಿ ಮಲ್ಪುವ ಪನ್ದ್ ಟ್ರಂಪ್ ಎಚ್ಚರ್ಗೆ ಕೊರ್ದಿತ್ತೆರ್. ಇಂದೆಕ್ ಎದುರಾದ್ ಇರಾನ್, ಲಾ ಎಂಕ್ಲೆನ ಮಿತ್ತ್ ದಾಳಿ ಮಲ್ತ್ಂಡ ಗಲ್ಫ್ದ ಕರೆಂಟ್, ನೀರ್ ಶುದ್ದೀಕರಣ ಘಟಕೊಲೆನ್ ನಾಶ ಮಲ್ಪುವ ಪನ್ದ್ ತಿರ್ಗಾದ್ ಪನ್ದಿತ್ತ್ಂಡ್.
ಡೊನಾಲ್ಡ್ ಟ್ರಂಪ್ನ ಈ ಸೋದ್ಯದ ನಡಕೆದ ಬಗೆಟ್ ಇರಾನ್ ಒವ್ವೇ ಪ್ರತಿಕ್ರಿಯೆ ಇತ್ತೆಗ್ ಕೊರ್ತುಜಿ ಪನ್ದ್ ಅಲ್ ಝಜೀರಾ ವರದಿ ತೆರಿಪಾದ್ಂಡ್.