Last updated on March 24th, 2026 at 01:30 pm
ಬೋಲ್ತೇರ್, ಮಾ. 24: ಸುದೆಕ್ ಕಜವು ತ್ಯಾಜ್ಯ ದಕ್ಕ್ದ್ ಪರಿಸರ ಮಾಲಿನ್ಯ ಮಲ್ಪುನಕ್ಲೆನ ಮಿತ್ತ್ ಕ್ರಮ ಗೆತೊನರೆ ಬೋಲ್ತೇರ್ ತಾಲ್ಲೂಕ್ದ ನಾವೂರು ಗ್ರಾಮ ಪಂಚಾಯತ್ ಪೊಸ ಪುನೆಪುಗು ಕೈ ಪಾಡ್ದ್ಂಡ್.
ಸುದೆತ ಬರಿಟ್ ಪಾಡ್ದಿನ ಸೂಚನಾ ಪಲವೆಡ್, ಕಜವು ದಕ್ಕುನಕಲೆಗ್ ರೂ. 5,000 ದಂಡ ಪಾಡುವ ಪನ್ದ್ ಎಚ್ಚರ್ಗೆ ಕೊರ್ತೆರ್. ಅತ್ತಂದೆ, ಅಂಚಿನ ಜನೊಕ್ಲೆನ್ ಪತ್ತೆರೆ ಒಲವು ಕೊರ್ನಕಲೆಗ್ ರೂ. 1,000 ಬಹುಮಾನ ಕೊರ್ಪ ಪನ್ದ್ ಘೋಷಣೆ ಮಲ್ತ್ದೆರ್.
ಗ್ರಾಮಸ್ಥೆರೆನ ಪ್ರಕಾರ, ಗಲಸ್ದಿನ ಪ್ಲಾಸ್ಟಿಕ್ ಸೊತ್ತುಲು, ಪೇಪರ್ ಪ್ಲೇಟ್ಲು, ಪ್ಲಾಸ್ಟಿಕ್ ತೊಟ್ಟೆಲು, ಬಾಟಲಿಲು, ಟಂಬ್ಲರ್, ಗಂಗಸರದ ಕುಪ್ಪಿಲು, ಡೈಪರ್ ಅಂಚೆನೇ ಸಲೂನ್ರ್ದ್ ಬರ್ಪುನ ಕುಜಲ್ನ್ ಚೀರಾವುಡು ದಿಂಜದ್ ಕೈಕಂಬ ಸಂಕದಲ್ಪ ಸುದೆಕ್ ದಕ್ಕೊಂದುಲ್ಲೆರ್. ಈ ಸಮಸ್ಯೆನ್ ಗ್ರಾಮಸ್ಥೆರ್ ದುಂಬೇ ಪಂಚಾಯತ್ದ ಗುಮನೊಗು ಕನತಿತ್ತೆರ್.
ಅಂಚಾದ್ ನಾವೂರು ಗ್ರಾಮ ಪಂಚಾಯತ್ ಸಂಕೊದ ಕೈತಲ್ ಸೂಚನಾ ಪಲವೆ ಪಾಡ್ದ್ ಸಾರ್ವಜನಿಕೆರೆಗ್ ಎಚ್ಚರ್ಗೆ ಕೊರ್ತುಂಡು. ತ್ಯಾಜ್ಯ ದಕ್ಕುನಕ್ಲೆನ ವಿರುದ್ಧ ಸಾಕ್ಷಿ ಕೊರ್ನಕಲೆಗ್ ಬಹುಮಾನ ಕೊರ್ಪಿನೆತ ಒಟ್ಟುಗು, ಒಲವು ಕೊರ್ತಿನಕ್ಲೆನ ಗುರ್ತನ್ ದೆಂಗದ್ ದೀಪ ಪನ್ದ್ ಪಂಚಾಯತ್ ತೆರಿಪಾದ್ಂಡ್.