Last updated on March 25th, 2026 at 09:50 am
ಮುಂಬೈ, ಮಾ. 25: ಸಾದಿಯೆ ಪೋಪಿನ ನಾಯಿ ಒಂಜಿ ಪರಂಕ್ದ್ ಆಜಿ ತಿಂಗೊಲು ಕರಿದ್ ಬೊಕ್ಕ ಒರ್ಮ್ಬ ವರ್ಸ ಪ್ರಾಯೊದ ಬಾಲೆ ಒರ್ತಿ ರೇಬಿಸ್ ಸೋಂಕ್ಡ್ ತೀರ್ದಿನ ನಡಕೆ ಮುಂಬೈರ್ದ್ ವರದಿ ಆತ್ಂಡ್. ನಾಲನೇ ಕ್ಲಾಸ್ ಓದೊಂದುಪ್ಪುನ ಕಶಿಶ್ ಸಹಾನಿ ತೀರ್ದಿನ ಪೊಣ್ಣು. ಇಂಜೆಕ್ಷನ್ ಗೆತೊನರೆ ಪೊಣ್ಣನ ಪೋಡಿಗೆ ಬೊಕ್ಕ ಇಲ್ಲದಕಲೆನ ನಾಮಾಸೇ ಈ ಸಾವುಗು ಪ್ರಮುಖ ನೆವನ ಪನ್ದ್ ಪನೊಂದುಲ್ಲೆರ್.
ಆಜಿ ತಿಂಗೊಲುಗು ದುಂಬು ಕಶಿಶ್ ತನ್ನ ಅಜ್ಜನೊಟ್ಟುಗು ಸಾದಿಯೆ ನಡತೊಂದು ಪೋವೊಂದುಪ್ಪುನಗ ತಿರ್ಗುನಾಯಿ ಒಂಜಿ ಆಲೆಗ್ ಪರಂಕ್ದ್ ಗಡಿಮಲ್ತಿತ್ತ್ಂಡ್. ಅಪಗನೇ ಆಲೆನ್ ಕೈತಲ್ದ ಆಸ್ಪತ್ರೆಗ್ ದಾಕಲ್ತ್ಂಡಲಾ, ಇಂಜೆಕ್ಷನ್ ಗೆತೊನರೆ ಪೋಡಿದ್ ಬಾಲೆ ಬುಡ್ತುಜಲ್. ಗಡಿ ಮಿತ್ತ್ರ್ದ್ ಕೂಡೊಂದು ಬತ್ತಿಲೆಕ ತೋಜಿನೆರ್ದಾವರ ಅಪ್ಪೆಅಮ್ಮೆಲಾ ಇಂಜೆಕ್ಷನ್ ಕೊರ್ಪಾವುನಂಚಿ ಗೇನ ಕೊರ್ತುಜೆರ್.
ಆಂಡ, ಕರಿನ ಕೆಲ ದಿನೊರ್ದಿಂಚಿ ಪೊಣ್ಣನ ಆರೋಗ್ಯಡ್ ಬಾರೀ ಎಚ್ಚಿಕಮ್ಮಿ ಆತ್ಂಡ್. ನುಪ್ಪುನೀರ್ ಮುಟ್ಟೆರಾವಂದೆ ಬಂಙ ಬರೊಂದಿತ್ತಲ್ ಅಂಚೆನೇ ಕಣ್ಣ್ಲುಲಾ ಕೆಂಪಾದಿತ್ತ. ರೇಬಿಸ್ದ ಲಕ್ಷಣೊಲು ಎಚ್ಚ ಆವೊಂದಿತ್ತಿಲೆಕನೇ ಆಲೆನ್ ಮುಂಬೈದ ಕಸ್ತೂರಬಾ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ಮಲ್ತ್ಂಡಲಾ, ಮಾರ್ಚ್ 23 ತಾನಿ ಬಾಲೆ ಮರ್ದ್ ಪಲಿಪಂದೆ ತೀರ್ದಲ್.
ಈ ಸಾವುದ ಬೆರಿಟೇ ಲಕ್ಕೊಂಡಿನ ಮುಂಬೈ ಮಹಾನಗರ ಪಾಲಿಕೆ, ತೀರ್ದಿನ ಬಾಲೆದ ಇಲ್ಲದಕುಲು ಬೊಕ್ಕ ಆಲೆನ ಸಂಪರ್ಕೊಡು ಇತ್ತಿನ ನಿರೆಕರೆತಕಲೆನ ವೈದ್ಯಕೀಯ ಪರೀಕ್ಷೆ ಮಲ್ತೊಂದುಲ್ಲೆರ್. ನಾಯಿಲು ಅತ್ತ್ಂಡ ಪುಚ್ಚೆಲು ತುಚ್ಚಿಂಡ ಇಜಿಂಡ ಎಲ್ಯೆಟ್ ಪರಂಕ್ಂಡಲಾ ಅವೆನ್ ಗೋಸ್ಮರಿ ಮಲ್ಪಂದೆ ಕಡ್ಡಾಯವಾದ್ ವೈದ್ಯಕೀಯ ಸಲಹೆ ಬೊಕ್ಕ ವ್ಯಾಕ್ಸೀನ್ ಗೆತೊನೊಡು.