ಕಾಪು ರಂಗತರಂಗ ನಾಟಕ ಕೂಟೊದ ಸ್ಥಾಪಕ ಪದುಕೆ ಸುಜಿತ್ ಶೆಟ್ಟಿ ಪಾದೂರ್ ತೀರ್ಯೆರ್

Last updated on April 3rd, 2026 at 01:09 pm

ಕಾಪು, ಏ. 03: ತುಳು ರಂಗಭೂಮಿ ಕಲಾವಿದೆ, ಕಾಪು ರಂಗ ತರಂಗ ಕಲಾವಿದೆರ್ ಕೂಟೊದ ಸ್ಥಾಪಕ ಪದುಕೆ, ಮಾಜಿ ಸಂಚಾಲಕೆ ಸುಜಿತ್ ಶೆಟ್ಟಿ ಪಾದೂರ್ (54) ಎ. 3 ತಾನಿ ತೀರ್ಯೆರ್.

ಪುಗರ್ತೆದ ರಂಗ ಕಲಾವಿದೆರಾದಿತ್ತಿನ ಮೇರ್ ಕುಸಲ್‌ದ ಬೊಕ್ಕ ಸಾಮಾಜಿಕ ಜಬದರಿದ ಪಾತ್ರೊಲೆನ್ ಬಾರೀ ಪೊರ್ಲುಡು ಗೊಬ್ಬೊಂದು, ತೂಪಿನಕಲೆ ಉಡಲ್ ಗೆಂದ್‌ದಿತ್ತೆರ್. ಕೆ. ಲೀಲಾಧರ ಶೆಟ್ರೆನ ಸಾರಥ್ಯೊದ ಕಾಪು ರಂಗ ತರಂಗ ಕಲಾವಿದೆರ್ ಕೂಟೊದ ಸ್ಥಾಪಕ ಪದುಕೆರಾದ್, ಕುಟೊದ ಸಮಗ್ರ ನಿರ್ವಹಣೆದ ಜಬದರಿನ್ ಬಾರೀ ಎಡ್ಡೆ ರೀತಿಡ್ ನಡಪಾಯಿನಾರ್. ಒಂತೆ ಸಮೆರ್ದಿಂಚಿ ಉಸಾರ್ ತತ್ತ್‌ದ್ ನಟನೆರ್ದ್ ದೂರ ಉಂತುದಿತ್ತೆರ್.

ಸುಜಿತ್ ಶೆಟ್ರೆನ ಅಗಪುಗು ಶಾಸಕೆ ಗುರ್ಮೆ ಸುರೇಶ್ ಶೆಟ್ಟಿ, ಮಾಜಿ ಸಚಿವೆ ವಿನಯ್ ಕುಮಾರ್ ಸೊರಕೆ, ಮಾಜಿ ಶಾಸಕೆ ಲಾಲಾಜಿ ಆರ್. ಮೆಂಡನ್, ಜೆಡಿಎಸ್ ಜಿಲ್ಲಾಧ್ಯಕ್ಷೆ ಯೋಗೀಶ್ ಶೆಟ್ಟಿ ಬಾಲಾಜಿ, ಗಣ್ಯೆರಾಯಿನ ಕೆ. ವಾಸುದೇವ ಶೆಟ್ಟಿ, ಮನೋಹರ ಎಸ್. ಶೆಟ್ಟಿ, ನಡಿಕೆರೆ ರತ್ನಾಕರ ಶೆಟ್ಟಿ, ಕಾಪು ರಂಗ ತರಂಗ ಕಲಾವಿದೆರೆ ಕೂಟೊ ಬೊಕ್ಕ ತುಳು ರಂಗ ಭೂಮಿದ ಕಲಾವಿದೆರ್ ಸಂತಾಪ ತೂಪಾದೆರ್.

ಮೇರ್ ಬೊಡೆದಿ ಶಶಿಪ್ರಭಾ ಶೆಟ್ಟಿ ಬೊಕ್ಕ ಮಗಲೆನ್ ಅಗತ್‌ದೆರ್.