Last updated on April 6th, 2026 at 01:02 pm
ಬೆಳಗಾವಿ, ಏ. 06: ಜಿಲ್ಲೆದ ಬೈಲಹೊಂಗಲ ತಾಲೂಕ್ದ ಅರವಳ್ಳಿ ಗ್ರಾಮೊಡು ಉಡಲ್ ಚುರ್ರ್ ಪನ್ಪಿನ ನಡಕೆ ಒಂಜಿ ನಡತ್ದ್ಂಡ್. ಬೊಡೆದಿ ಉಸಾರ್ ತತ್ತ್ದ್ ತೀರ್ಯಲ್ನ್ಡ, ಆಲ್ ತೀರ್ದಿನ ಸುದ್ದಿ ಕೇನ್ದ್ ಶಾಕ್ಡ್ ಬತ್ತಿನ ಕಂಡನೆ ಬಸ್ದಡಿಕ್ ಬೂರ್ದು ತೀರ್ದೆ. ಈ ನಡಕೆರ್ದಾವರ ಮೂವೆರ್ ಎಲ್ಯ ಜೋಕುಲು ಅಪ್ಪೆ ಅಮ್ಮೆ ದಾಂತೆ ಪರಕ್ಕೊಲಿ ಆತೆರ್.
ಅರವಳ್ಳಿ ಗ್ರಾಮೊದ ನಿವಾಸಿ ಮಧುರಾ ಕರೆಪ್ಪ ಮಾದರ (30) ಕರಿನ ಪಾಕ ವರ್ಸೊರ್ದಿಂಚಿ ಬಾರೀ ಬಂಜಿ ಬೇನೆಡ್ ನರೆಲೊಂದಿತ್ತೆರ್. ಪಾಕ ಕಡೆಟ್ ಮರ್ದ್ ಮಲ್ತ್ಂಡಲಾ ಗುಣ ಆದಿತ್ತಿಜಿ. ಐತಾರ ತಡೆಯೆರಾವಂದಿನಾತ್ ಬಂಜಿಬೇನೆ ಆನಗ, ಜೂವನೊಡು ಜಿಗುಪ್ಸೆ ಆದ್ ಮಧುರಾ ಪಾಂತೆ ಕೆರ್ಪುನ ಮರ್ದ್ ಪರ್ತೆರ್. ಅಪಗನೇ ಆರೆನ್ ಬೆಳಗಾವಿ ಜಿಲ್ಲಾಸ್ಪತ್ರೆಗ್ ಲೆತೊಂದು ಪೋಂಡಲಾ, ಸಾದಿ ನಡುಟೇ ಆರ್ ತೀರ್ದೆರ್.
ಬೊಡೆದಿ ತೀರ್ದಿನ ಸುದ್ದಿ ಕೇನ್ಡಿನ ಕಂಡನೆ ಕರೆಪ್ಪ ಮಾದರ (36) ಮೆರೆಗ್ ಬಾನೊನೇ ತರೆಕ್ ಬೂರ್ಲೆಕ ಆತ್ಂಡ್. ಅವ್ವೇ ಶಾಕ್ಡ್ ಅಮಸರಡ್ ಆಸ್ಪತ್ರೆದಂಚಿ ಬರೊಂದುಪ್ಪುನಗ, ವಿಧಿತ ಗೊಬ್ಬು ಬೇತೆನೇ ಇತ್ತ್ಂಡ್. ಸಾದಿ ಕಡಪುನಗ ಅಮಸರಡ್ ಆಕಸ್ಮಿಕವಾದ್ ಬಸ್ದಡಿಕ್ ಬೂರ್ದು ಕರೆಪ್ಪೆ ಅಲ್ಪನೇ ದಾರುಣವಾದ್ ತೀರ್ದೆರ್. ಒಂಜೇ ದಿನ ಇಲ್ಲದ ಯಜಮಾನೆ ಬೊಕ್ಕ ಯಜಮಾನ್ದಿ ಇರ್ವೆರ್ಲಾ ತೀರ್ದಿನ ಊರುಡು ಬಾರೀ ಬೆಸರ್ ಉಂಡು ಮಲ್ದ್ಂಡ್.
ಕರಿನ ಒರ್ಮ್ಬ ವರ್ಸೊಗು ದುಂಬು ಈ ಜೋಡಿ ಮೋಕೆಡ್ ಸಂಸಾರ ಸುರು ಮಲ್ತಿತ್ತ್ಂಡ್. ಮೊಕಲೆಗ್ ಒರ್ತಿ ಪೊಣ್ಣು ಬೊಕ್ಕ ಇರ್ವೆರ್ ಕೊಂಡಟೊದ ಆಣ್ ಜೋಕುಲು ಉಲ್ಲೆರ್. ದುಂಬುನಾನಿ, ಪನ್ಡ ಶನಿವಾರದಾನಿ ಆತೇ ಈ ದಂಪತಿಲು ಸಂತೆಗ್ ಪೋದು ಇಲ್ಲಗ್ ಬೋಡಾಪಿನ ಸಾಮಾನ್ ಬೊಕ್ಕ ಜೋಕುಲೆಗ್ ಪೊಸ ಕುಂಟು ಮಾತ ಕನತಿತ್ತೆರ್. ಅಪ್ಪೆಅಮ್ಮೆ ಕನತಿನ ಪೊಸ ಕುಂಟು ಪಾಡ್ದ್ ಕುಸಿ ಪಡೆಯೊಡಿತ್ತಿನ ಜೋಕುಲು, ಅಕಲೆನ ಪುನತ ಎದುರು ಕುಲೊಂದು ಬುಲಿನುನೆನ್ ತೂಯೆರ ಆಪುಜಿ.
ಈ ಬಗೆಟ್ ಬೈಲಹೊಂಗಲ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಪೊಲೀಸೆರ್ ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಇಡೀ ಅರವಳ್ಳಿ ಗ್ರಾಮೊನೇ ಕಣ್ಣನೀರ್ಡ್ ಚಂಡಿ ಆದಿತ್ತ್ದ್, ಪರಕ್ಕೊಲಿ ಆತಿನ ಜೋಕುಲೆನ ಭವಿಷ್ಯೊದ ಬಗೆಟ್ ಗ್ರಾಮಸ್ಥೆರ್ ಮಂಡೆಬೆಚ್ಚಡ್ ಉಲ್ಲೆರ್.