Last updated on April 19th, 2026 at 10:05 am
ತುಮಕೂರ್, ಏ. 19: ಮಗಲ್ ತೀರಿಬೊಕ್ಕ ಆಲೆನ ಲವರ್ನ ಒಟ್ಟುಗು ಕೂಡೊಂದು ಆಲೆನ ಕಂಡನ್ಯನ್ ಅಪ್ಪೆ ಬೊಕ್ಕ ಮೆಗ್ಯೆ ಕೆರ್ತಿನ ನಡಕೆ ತುಮಕೂರ್ದ (Tumakuru) ಮಧುಗಿರಿ ತಾಲ್ಲೂಕ್ದ ದಂಡೀಪುರ ಗ್ರಾಮೊಡು ನಡತ್ದ್ಂಡ್. 32 ವರ್ಸ ಪ್ರಾಯೊದ ನರಸಿಂಹಮೂರ್ತಿ ಸೈದಿನ ಆಂಜೊವು. ಬೊಡೆದಿ ಸುಜಾತಾ ತೀರಿಬೊಕ್ಕ ಸಮ ಪರ್ಯೆರೆ ಸುರು ಮಲ್ತಿನ ಉಂಬ್ಯೆ, ಆಲೆನ ಚಂಗಾಯಿ ಅಪಗಪಗ ಇಲ್ಲಗ್ ಬತ್ತ್ ಪೋಪುನೆತ ಬಗೆಟ್ ವಿರೋಧ ತೂಪಾದಿತ್ತೆ. ಅವೆನೇ ನೆವನ ಮಲ್ತೊಂದು ಸುಜಾತಾನ ಅಪ್ಪೆ, ಮೆಗ್ಯೆ ಬೊಕ್ಕ ಲವರ್, ನರಸಿಂಹಮೂರ್ತಿನ್ ಕೆರ್ತೆರ್ ಪನ್ದ್ ತೀರ್ದಿನಾರೆನ ಇಲ್ಲದಕುಲು ಆರೋಪ ಮಲ್ತ್ದೆರ್. ಈ ಬಗೆಟ್ ಕೊಡಿಗೇನಹಳ್ಳಿ ಪೊಲೀಸೆರ್ ಮೂವೆರೆನ್ಲಾ ಕೈದ್ ಮಲ್ತ್ದೆರ್.
ಸುಜಾತಾನ ಆಣ್ ಬಾಲೆನ್ ತನ್ನನೇ ಬಾಲೆ ಪನ್ದ್ ಎನ್ನ್ದಿತ್ತೆ ಆಲೆನ ಲವರ್
ಕೆಲ ವರ್ಸೊಗು ದುಂಬು ನರಸಿಂಹಮೂರ್ತಿ ಸುಜಾತಾನ್ ಮೋಕೆ ಮಲ್ತ್ದ್ ಇಲ್ಲದಕಲೆನ್ ಒಪ್ಪಾದ್ ಮದಿಮೆ ಆದಿತ್ತೆ. ಮದಿಮೆರ್ದ್ ಬೊಕ್ಕ ಸುಜಾತ ಗಾರ್ಮೆಂಟ್ಸ್ ಬೇಲೆಗ್ ಸೇರ್ದಿತ್ತಲ್. ಈ ಪೊರ್ತುಡು ಆಲೆಗ್ ಅಮರ್ ಪನ್ಪಿನ ಜವನೆ ಗುರ್ತ ಆತೆ. ಬೊಕ್ಕ ಅಕುಲಿರ್ವೆರೆನ ಗುರ್ತ ಅಕ್ರಮ ಸಂಬಂಧೊಗು ತಿರ್ಗ್ದಿತ್ತ್ಂಡ್. ಅವ್ವೇ ಪೊರ್ತುಡು ಸುಜಾತಾ ಒಂಜಿ ಆಣ್ ಬಾಲೆನ್ಲಾ ಪೆದ್ದ್ದಲ್. ಆಂಡ ಉಸಾರ್ದಾಂತೆ ಕೆಲ ತಿಂಗೊಲುಗು ದುಂಬು ಸುಜಾತ ತೀರ್ದಿತ್ತಲ್.
ಬೊಡೆದಿನ್ ಕಲೆವೊಂದಿನ ಬೆಸರ್ಡ್ ನರಸಿಂಹಮೂರ್ತಿ ಸಮ ಪರ್ಯೆರ ಸುರು ಮಲ್ತೆ. ಕುಡೊಂಜಿ ಕಡೆಟ್ ಸುಜಾತಾನ ಆಣ್ ಬಾಲೆನ್ ತನ್ನನೇ ಪನ್ದ್ ಎನ್ನಿನ ಅಮರ್, ಅಪಗಪಗ ಆಲೆನ ಇಲ್ಲಗ್ ಬತ್ತ್ದ್ ಪೋವೊಂದಿತ್ತೆ. ಇಂಚ ಅಮರ್ಗ್ಲಾ ಸುಜತಾನ ಅಪ್ಪೆ ಜಯಮ್ಮ ಬೊಕ್ಕ ಮೆಗ್ಯೆ ನಂದೀಶ್ಗ್ಲಾ ಎಡ್ಡೆ ದೋಸ್ತಿಕತೆ ಬುಲೆದ್ಂಡ್. ಗಡೀಗಡಿ ಅಮರ್ ಇಲ್ಲಗ್ ಬರ್ಪುನೆನ್ ನರಸಿಂಹಮೂರ್ತಿ ತೂತಿನತ್ತಂದೆ, ಜಯಮ್ಮಡ ಈ ವಿಷಯೊಗು ಲಡಯಿಲಾ ಮಲ್ತಿತ್ತೆ. ಈ ಲಡಯಿದ ಬಗೆಟ್ ಅಮರ್ಗ್ ತೆರಿಪಾಯಿನ ಜಯಮ್ಮ, ತನ್ನ ಮಗೆ ನಂದೀಶ್ನ ಒಟ್ಟು ಕೂಡೊಂದು ಕೆರ್ಯೆರ ಪ್ಲಾನ್ ಮಲ್ತ್ದೆರ್ ಪನ್ದ್ ಆರೋಪ ಮಲ್ತ್ದೆರ್.
ಬೊಡೆದಿನ ನೆನೆಪುಡೇ ಪರ್ದ್ ಸೈತೆ ಪನ್ದ್ ತೂಪಾವುನ ಪುನೆಪು!
ಮೂಜಿ ಜನ ಮಲ್ತಿನ ಪ್ಲಾನ್ದ ಲೆಕ ನರಸಿಂಹಮೂರ್ತಿನ್ ಇಲ್ಲಗ್ ಲೆತ್ತ್ದ್ ಚಿಕನ್ ಪಾರ್ಟಿದ ಪುದರ್ಡ್ ಸಮ ಪರ್ಪಾದೆರ್. ಬೊಕ್ಕ ಅಮರ್ ಬೊಕ್ಕ ನಂದೀಶ್ ಆಯನ್ ರಿಕ್ಷಾಡ್ ಏರ್ಲಾ ಇಜ್ಜಂದಿನ ಜಾಗೆಗ್ ಲೆತೊಂದು ಪೋದು ಬಲ್ಲ್ಡ್ ಕೆಕ್ಕಿಲ್ ಕಯ್ತ್ದ್ ಕೆರ್ತೆರ್. ಬೊಕ್ಕ ಗ್ರಾಮೊದ ಕೈತಲ್ ಸಾದಿ ಬರಿಟ್ ಸುಜಾತಾನ ಫ್ಲೆಕ್ಸ್ ಇತ್ತಿನ ಜಾಗೆಡೇ ಪುನೊನು ದಕ್ಕ್ದೆರ್. ಬೊಡೆದಿನ ನೆಂಪುಡು ಪರ್ದ್ ಸೈತ್ದೆ ಪನ್ದ್ ತೂಪಾಯೆರ ತೂತೆರ್.