Last updated on April 21st, 2026 at 10:46 am
ಕುಡ್ಲ, ಎ. 20: ಪೇಂಟೆದ ನಂತೂರು ಜಂಕ್ಷನ್ಡ್ ಟ್ರಾಫಿಕ್ ಕಂಟ್ರೋಲ್ ಡ್ಯೂಟಿಡ್ ಇತ್ತಿನ ಪೊಲೀಸ್ ಸಿಬ್ಬಂದಿಗ್ ಬೈಕ್ಡ್ ಬತ್ತಿನಾಯೆ ಒರಿ ಆಕ್ದ್, ಸರ್ಕಾರಿ ಬೇಲೆಗ್ ಅಡ್ಡಬೈದಿನ ನಡಕೆ ಏಪ್ರಿಲ್ 18ದಾನಿ ನಡತ್ದ್ಂಡ್. ಆಕಿನೆರ್ದಾನರ ಗಡಿಕುಲಾತಿನ ಸಿಪಿಸಿ ಪ್ರವೀಣ್ ಮೇರ್ ಪೇಂಟೆದ ಪ್ರೈವೇಟ್ ಆಸ್ಪತ್ರೆಗ್ ದಾಕಲಾತೆರ್.
ಎಪ್ರಿಲ್ 18 ದಾನಿ ಮಧ್ಯಾಹ್ನ 12:37ತ ಅಂದಾಜಿಗ್ ಸಂಚಾರ ಪೂರ್ವ ಪೊಲೀಸ್ ಸ್ಟೇಷನ್ದ ಹಲೇಷಾ, ಪ್ರವೀಣ್ ಬೊಕ್ಕ ಚಂಪಾ ಪನ್ಪಿನಕುಲು ನಂತೂರು ಜಂಕ್ಷನ್ಡ್ ಡ್ಯೂಟಿಡ್ ಇತ್ತೆರ್. ಈ ಪೊರ್ತುಡು ಪದವು ದಂಚಿರ್ದ್ ಬೈಕ್ಡ್ ಪೊಂಜೊವುನೊಟ್ಟುಗು ಬತ್ತಿನಾಯೆ ಒರಿ, ‘ಫ್ರೀ ಲೆಫ್ಟ್’ (Free Left) ಸಾದಿಡ್ ಗಾಡಿನ್ ಅಡ್ಡ ಉಂತಾದಿತ್ತೆ. ಉಂದೆರ್ದಾವರ ಬೇತೆ ಗಾಡಿಲೆಗ್ ಉಪದ್ರ ಆವೊಂದುಪ್ಪುನೆನ್ ತೂಯಿನ ಹಲೇಷಾ ಮೇರ್ ಬೈಕ್ನ್ ಎದುರು ಕೊನೊಯೆರ ಪನ್ತೆರ್.
ಉಂದೆಕ್ ಪಿಸ್ರಾಯಿನ ಆಯೆ ಪೊಲೀಸೆರೆಗ್ “ಬೇವರ್ಸಿ”, “ನಾಯಿಲು” ಪನ್ದ್ ಪೆದಂಬು ನೆರ್ತೆ. ಉಂದೆನ್ ಪ್ರಶ್ನೆ ಮಲ್ತಿನ ಸಿಪಿಸಿ ಪ್ರವೀಣ್ ಮೆರೆನ ಮೋನೆಗ್ ಆಕ್ದ್ ಗಡಿ ಮಲ್ತ್ದೆ. ಆತೇ ಅತ್ತಂದೆ, ಆರೆನ ಕೈಟ್ ಇತ್ತಿನ ಸುಮಾರ್ ₹28,000 ಮೌಲ್ಯೊದ ಮೊಬೈಲ್ನ್ ಒಯ್ತೊಂದು ನೆಲಕ್ಕ್ ದಕ್ಕ್ದ್ ಪೊಡಿಮಲ್ತ್ದೆ. ಒಟ್ಟುಗು ಇತ್ತಿನ ಪೊಂಜೊವುಲಾ ಪೊಲೀಸೆರೆಗ್ ಜೋಡುಡು ಆಕುವೆ ಪನ್ದ್ ಪೋಡಿಕಟ್ಟಾದಲ್ ಪನ್ದ್ ಒಯಿಲ್ಡ್ ಬರೆಪಾದೆರ್. ಸಾರ್ವಜನಿಕೆರ್ ಸಮಾಧಾನ ಮಲ್ಪೆರ ತೂಂಡಲಾ ಆರೋಪಿಲು ಕಲ್ಕುನ ಉಂತಾದಿಜೆರ್. ಈ ಬಗೆಟ್ ಮೂಡಾಯಿ ಕುಡ್ಲ ಟ್ರಾಫಿಕ್ ಪೊಲೀಸ್ ಸ್ಟೇಷನ್ಡ್ ಪ್ರಕರಣ ದಾಕಲಾತ್ಂಡ್.