Last updated on April 29th, 2026 at 08:43 am
ಕುಡ್ಲ, ಏ. 29: ಕುಡ್ಲ ದೇಶೊಡೇ ಮಾತೆರ್ದ್ ಸುರಕ್ಷಿತ ನಗರೊನಾ?
ಇಂಚ ಒಂಜಿ ಜಿಜ್ಞಾಸೆ ಪುಟ್ಟೊನರೆ ನೆವನ ಬೇತೆ ಬೇತೆ ಸಂಗತಿಲೆನ ಆಧಾರೊಡು ಅಂಕಿ ಅಂಶೊಲೆನ್ ತೂದು ಪ್ರಕಟ ಮಲ್ಪುನ ‘ವರ್ಲ್ಡ್ ಆಫ್ ಸ್ಟೇಟ್ ಹಿಸ್ಟಿಕ್ಸ್’ ಸಂಸ್ಥೆ ಪ್ರಕಟ ಮಲ್ದಿನ ಭಾರತೊದ 50 ಸುರಕ್ಷಿತ ನಗರೊಲೆನ ಪಟ್ಟಿಡ್ ನಮ್ಮ ಕುಡ್ಲಗ್ ಕಡೀರ ತಾನ ತಿಕ್ಕ್ದಿನ.
ಸಂಸ್ಥೆ ತನ್ನ ಸಾಮಾಜಿಕ ಮಾಧ್ಯಮ (ಎಕ್ಸ್)ಡ್ 2026 ತ ಭಾರತೊದ ಸುರಕ್ಷಿತ 50 ನಗರೊಲೆನ ಪಟ್ಟಿಡ್ ಕುಡ್ಲನ್ ಸುರೂತ ತಾನೊಡು ದೀತ್ಂಡ್.
ರಡ್ಡ್ ದಿನೊಕು ದುಂಬು ಪ್ರಕಟ ಆತಿನ ಈ ವರದಿಡ್ ದಾದ ಮಾತ ಅಂಶೊಲೆನ್ ತೂದು ನಗರೊಲೆನ ಪಟ್ಟಿ ಮಲ್ತ್ದ್ಂಡ್ ಪನ್ಪಿ ಒಲವುನು ಸಂಸ್ಥೆ ತೆರಿಪಾದಿಜಿ. ಅಂಚಾದ್ ಇತ್ತೆದ ಇಂದು ಚರ್ಚೆದ ಕೇಂದ್ರ ಆತ್ಂಡ್.
ಅಂಚೆನೇ ಕುಡೊಂಜಿ ಪೋಸ್ಟ್ ಪ್ರಕಟ ಮಲ್ತಿತ್ತ್ದ್, ಅಸುರಕ್ಷಿತ 20 ನಗರೊಲೆನ ಪಟ್ಟಿಡ್ ದಿಲ್ಲಿಗ್ ಕಡೀರ ತಾನ ತಿಕ್ಕ್ದಿತ್ತ್ಂಡ, ಬೆಂಗಳೂರು 5ನೇ ಜಾಗೆಡ್ ಉಂಡು. ಈತೇ ಅತ್ತಂದೆ, ವಿಶ್ವೊದ ಬೇತೆ ಬೇತೆ ರಾಷ್ಟ್ರೊಲೆನ ಸುರಕ್ಷಿತ ಬೊಕ್ಕ ಅಸುರಕ್ಷಿತ ನಗರೊಲೆನ ಪಟ್ಟಿನ್ಲಾ ಪಟ್ಟೊಂದುಂಡು.