Last updated on October 23rd, 2022 at 06:32 pm
ಮೆಲ್ಬರ್ನ್‌ಡ್ ನಡತಿನ ಭಾರತ ಬೊಕ್ಕ ಪಾಕಿಸ್ತಾನೊದ ನಡುತ ಟಿ-20 ವಿಶ್ವಕಪ್‌ದ ಕ್ರಿಕೆಟ್ ಗೊಬ್ಬುಡು ರನ್ ಮೆಷಿನ್ ವಿರಾಟ್ ಕೊಹ್ಲಿರೆನ ರಣತ ಲೆಕ್ಕಂದಿ ಬ್ಯಾಟಿಂಗ್‌ರ್ದ್ ಭಾರತ ಗೆಲ್ಮೆ ತೂಪುಲೆಕ್ಕಾಂಡ್.
ಟಾಸ್ ಸೋತ್‌ದ್ ಬ್ಯಾಟಿಂಗ್ ಮಲ್ತಿನ ಪಾಕಿಸ್ತಾನ 20 ಓವರ್‌ಡ್ 8 ವಿಕೆಟ್ ಕೊರ್ದು 159 ರನ್ ಒಟ್ಟು ಮಲ್ತ್ಂಡ್. ಗೆಂದೆರೆ ಬೋಡಿತ್ತಿನ 160 ರನ್‌ನ್ ಭಾರತ 20ನೇ ಓವರ್‌ದ ಅಕೇರಿದ ಚೆಂಡ್‌ಡ್ ಒಟ್ಟು ಮಲ್ತ್ ಗೆಂದ್ಂಡ್.
31 ರನ್ ಮಲ್ತ್‌ದ್ 4 ವಿಕೆಟ್ ಕೊರ್ದು ಮುರ್ಕೊಂದು ಬತ್ತಿ ಓಡೊದಲೆಕ್ಕಾದಿತ್ತಿ ಭಾರತೊಗು ವಿರಾಟ್ ಕೊಹ್ಲಿ ಬೊಕ್ಕ ಆಲ್‌ರೌಂಡರ್ ಹಾರ್ದಿಕ್ ಪಾಂಡ್ಯ ಕರೆ ಮುಟ್ಟಾವುನೆಟ್ ಮಲ್ಲ ಬೆರಿಸಾಯ ಕೊರ್ಯೆರ್. ಕೊಹ್ಲಿ 53 ಚೆಂಡ್‌ಡ್ ಔಟ್ ಆವಂದೆ 82 ರನ್ ಮಲ್ತೆರ್ನ್ಡ ಪಾಂಡ್ಯ 37 ಚೆಂಡ್ ಗೊಬ್ಬುದು 40 ರನ್ ಮಲ್ತೆರ್. ಪಾಕಿಸ್ತಾನೊದ ಬೌಲಿಂಗ್‌ಡ್ ಹ್ಯಾರಿಸ್ ರೌಫ್ ಬೊಕ್ಕ ನವಾಜ್ ರಡ್ಡ್ ರಡ್ಡ್ ವಿಕೆಟ್ ಪಡೆಯೊಂಡೆರ್.
ಸುರುಕ್ ಬ್ಯಾಟಿಂಗ್ ಮಲ್ತಿನ ಪಾಕಿಸ್ತಾನೊದ ಕಡೆರ್ದ್ ಶಾನ್ ಮಸೂದ್ 52(42) ಬೊಕ್ಕ ಇಫ್ತಿಕರ್ ಅಹ್ಮದ್ 51(34) ರನ್ ಮಲ್ತೆರ್. ಬೌಲಿಂಗ್‌ಡ್ ಅರ್ಷದೀಪ್ ಸಿಂಗ್ ಬೊಕ್ಕ ಹಾರ್ದಿಕ್ ಪಾಂಡ್ಯ ಮೂಜಿ ವಿಕೆಡ್ ದೆತ್ತೆರ್ನ್ಡ ಭುವನೇಶ್ವರ್ ಕುಮಾರ್ ಬೊಕ್ಕ ಶಮಿ ಒಂಜೊಂಜಿ ವಿಕೆಟ್ ದೆತೊಂಡೆರ್.
ಕ್ರಿಕೆಟ್ ಅರ್ತಿಕಾರೆರೆಗ್ ಇನಿತ ಗೊಬ್ಬು ಒವ್ವೇ ಗೌಜಿದ ವನಸ್‌ರ್ದ್ ಕಮ್ಮಿ ಇತ್ತಿಜಿ. ಇನಿತ ಗೊಬ್ಬುಡು ಗೆಂದ್‌ದ್ ಭಾರತ ಕರಿನ ಗೊಬ್ಬುದ ಸೋಲ್‌ಗ್ ಸದು ಕೊರ್ಯೆರ್ಂದೇ ಪನೊಲಿ.