Last updated on May 3rd, 2026 at 10:26 am
ಕುಡ್ಲ, ಮೇ. 03: ಶನಿವಾರ ಬಯ್ಯಡ್ ಮುಲ್ಕಿದ ಹಳೆಯಂಗಡಿ ಜಂಕ್ಷನ್ಡ್ ನಡತಿನ ರಡ್ಡ್ ಬೇತೆ ಬೇತೆ ಎಡ್ತೆಲೆರ್ದಾವರ ಪೆರ್ಸಾದಿಡ್ ಅರ್ಧ ಗಂಟೆರ್ದ್ಲಾ ಎಚ್ಚ ಪೊರ್ತು ಭಾರಿ ಟ್ರಾಫಿಕ್ ಜಾಮ್ ಉಂಡಾದಿತ್ತ್ಂಡ್.
ಕುಡ್ಲರ್ದ್ ಬಳ್ಳಾರಿದಂಚಿ ಕೆಮಿಕಲ್ ಕೊನೊವೊಂದಿತ್ತಿನ ಟ್ಯಾಂಕರ್, ಜಂಕ್ಷನ್ಡ್ ದೀತೀನ ಬ್ಯಾರಿಕೇಡ್ರ್ದಾವರ ಒರರ್ದ್ ಒರಾನೆ ಬ್ರೇಕ್ ಪಾಡ್ದ್ಂಡ್. ಈ ಪೊರ್ತುಡು ಕಾಸ್ರೋಡ್ರ್ದ್ ಕೊಲ್ಲೂರು ಮೂಕಾಂಬಿಕಾ ದೇಲಂತಡೆಗ್ ಪೋವೊಂದಿತ್ತಿನ ಕಾರ್, ಟ್ಯಾಂಕರ್ದ ಪಿರವುಗು ಎಡ್ತ್ದ್ಂಡ್. ಈ ಎಡ್ತೆಡ್ ಕಾರ್ಜ ಎದುರು ಮೆಯಿ ಞಕ್ಕೆ ಆದಿತ್ತ್ದ್, ದೇಬೆರೆ ದಯೆಟ್ ಕಾರ್ಡಿತ್ತಿನಕಲೆಗ್ ದಾಲ ಆತಿಜಿ.
ಸುರುತ ಎಡ್ತೆದ ಬೆರಿಟೆ, ಕುಡ್ಲರ್ದ್ ಒಡಿಪುದಂಚಿ ಪೋವೊಂದಿತ್ತಿನ ಒಂಜಿ ಕಾರ್ ಡಿವೈಡರ್ ದಲ್ಪ ತಿರ್ಗೆರೆ ತೂನಗ, ಪಿರವುರ್ದ್ ಬತ್ತಿನ ಟ್ಯಾಂಕರ್ ಕಾರ್ಗ್ ಬಲತ ಮರ್ಗಿಲ್ರ್ದ್ ಎಡ್ತ್ದ್ಂಡ್.
ಈ ಬೆರಿಬೆರಿ ಎಡ್ತೆಲೆರ್ದಾವರ ಪೆರ್ಸಾದಿಡ್ ಗಾಡಿಲು ಪಾವಂಜೆ ದೇಲಂತಡೆ ಮುಟ್ಟ ದಾರೆಕಟ್ಟ್ದ್ ಉಂತುದಿತ್ತ. ಅಂಚಾದ್ ಹಳೆಯಂಗಡಿದ ಉಲತಾದಿಲೆಡ್ಲಾ ಭಾರಿ ಟ್ರಾಫಿಕ್ ಜಾಮ್ ಆದಿತ್ತ್ಂಡ್.
ವಿಷಯ ತೆರಿನನೇ ಕುಡ್ಲ ಸಂಚಾರ ಪೊಲೀಸ್ ಅಧಿಕಾರಿಲು ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಎಡ್ತಿನ ಗಾಡಿಲೆನ್ ಸಾದಿರ್ದ್ ದೆಪ್ಪಾದ್ ಸುಗಮ ಸಂಚಾರೊಗು ಅನು ಮಲ್ತ್ ಕೊರ್ಯೆರ್.
ಉಂದೆಕ್ ದುಂಬು ಬೈಕಂಪಾಡಿದಲ್ಪಲಾ ಒಂಜಿ ಪಿಕಪ್ ಗಾಡಿ ಸಾದಿ ಬರಿತ ರೇಲಿಂಗ್ಗ್ ಎಡ್ತ್ದ್ ಸಂಚಾರೊಗು ಒಂತೆ ತಲೆಪಾದಿತ್ತ್ಂಡ್.