Last updated on May 4th, 2026 at 11:07 am
ಬೆದ್ರ: ಕಾರ್ಲ-ಬೆದ್ರ ರಾಷ್ಟ್ರೀಯ ಪೆರ್ಸಾದಿದ ಬನ್ನಡ್ಕದ ಕೈತಲ್ ಆ್ಯಂಬುಲೆನ್ಸ್ ಬೊಕ್ಕ ರಿಕ್ಷಾದ ನಡುಟು ನಡತಿನ ಎಡ್ತೆಡ್ ರಿಕ್ಷಾ ಡ್ರೈವರ್ ಜಾನ್ ಕೊರೆಯಾ (75) ಅಲ್ಪನೇ ತೀರ್ದೆರ್.
ಬನ್ನಡ್ಕದ ಕೈತಲ್ ನಡತೊಂದಿತ್ತಿನ ಒಂಜಿ ಲೇಸ್ಗ್ ಜನೊಕ್ಲೆನ್ ಬುಡ್ದು ರಿಕ್ಷಾನ್ ಪಿರ ದೆತ್ತೊಂದುಪ್ಪುನಗ ಬೆದ್ರದಂಚಿರ್ದ್ ಕಾರ್ಲಗ್ ಪೋವೊಂದಿತ್ತಿನ ಆ್ಯಂಬುಲೆನ್ಸ್ ಎಡ್ತ್ದ್ಂಡ್.
ಎಡ್ತೆದ ಬರಸ್ಗ್ ರಿಕ್ಷಾದ ಮಿತ್ತಮೆಯಿ ಅಲಕ್ಕ ಞಕ್ಕೆ ಆತ್ಂಡ್. ಆ್ಯಂಬುಲೆನ್ಸ್ದ ಎದುರು ಮೆಯಿ ಞಕ್ಕೆ ಆತ್ಂಡ್.
ಮೇರ್ ಬೊಡೆದಿ ಬೊಕ್ಕ ಇರ್ವೆರ್ ಮಗನಕ್ಲೆನ್ ಅಗತ್ದೆರ್.
18 ವರ್ಸ ಪ್ರಾಯೊರ್ದೇ ರಿಕ್ಷಾ ಡ್ರೈವರ್ ಆದಿತ್ತೆರ್:
ಜಾನ್ ಕೊರೆಯಾ ಇಂಚಿಪ ಮಹಾವೀರ ಕಾಲೇಜ್ದ ಕೈತಲ್ ನಡತಿನ ಎಡ್ತೆ ಒಂಜೆಟ್ ಆರೆನ ತಪ್ಪಿಜ್ಜಿಂಡಲಾ ಒಂಜಿ ಲಕ್ಷ ರೂಪಾಯಿರ್ದ್ಲಾ ಎಚ್ಚ ಕಾಸ್ ಕಲೆಯೊಂದೆರ್. ಈ ಬಗೆಟ್ ಐತಾರ ಕಾಂಡೆ ಅಲಂಗಾರ್ಡ್ ಇಪ್ಪುನ ಆರೆನ ದೋಸ್ತಿಡ ಬೆಸರ್ಡ್ ಪನೊಂದಿತ್ತೆರ್ಗೆ. ಜೂವನೊನೇ ಬೊಡಿದ್ ಪೋತುಂಡು ಪನ್ಪಿ ಅರ್ಥೊಡು ಪಾತೆರ್ದಿತ್ತಿನ ಆರ್, ಅವ್ವಾದ್ ಒಂತೆ ಪೊರ್ತುಡೇ ಬನ್ನಡ್ಕಡ್ ನಡತಿನ ಭೀಕರ ಎಡ್ತೆಡ್ ತೀರ್ದೆರ್. ತನ್ನ 18ನೇ ವರ್ಸ ಪ್ರಾಯೊರ್ದೇ ರಿಕ್ಷಾ ಡ್ರೈವರ್ ಆದ್ ವೃತ್ತಿ ಸುರು ಮಲ್ತಿತ್ತಿನ ಜಾನ್ ಶ್ರಮಜೀವಿ ಬೊಕ್ಕ ಸ್ನೇಹಜೀವಿ ಆದಿತ್ತೆರ್.