Last updated on May 4th, 2026 at 12:05 pm
ಪುತ್ತೂರ್, ಮೇ. 04: ಸುರುತ ಮದಿಮೆನ್ ದೆಂಗದ್ ದೀದ್ 2ನೇ ಮದಿಮೆ ಆತಿನ ಆಂಜೊವು ಒರಿಯನ್ 2ನೇ ಬೊಡೆದಿನ ಅಪ್ಪೆ ಬೊಕ್ಕ ಒಂತೆ ಜನ ಜೆತ್ತಿತ್ತನಲ್ಪರ್ದ್ ಕಿಡ್ನಾಪ್ ಮಲ್ತ್ದ್ ಒಂಜಿ ಇಲ್ಲಡ್ ಪತ್ತ್ರ್ದ್ ಪಾಡ್ದ್ ಆಕ್ದಿನ ನಡಕೆ ಪುತ್ತೂರ್ಡ್ ನಡತ್ದ್ಂಡ್.
ಕೆಮ್ಮಿಂಜೆ ಗ್ರಾಮೊದ ಬೊಳ್ಳಗುಡ್ಡೆ ನಿವಾಸಿ ಮಹಮ್ಮದ್ ಅಶ್ರಫ್ (35) ಕಿಡ್ನಾಪ್ ಆದ್ ಪೆಟ್ಟ್ ತಿನ್ತಿನ ಆಂಜೊವು. ಇಂಬ್ಯೆ ಬೆದ್ರದ ಐಸಮ್ಮ ಪನ್ಪಿನಾರೆನ ಮಗಲ್ ರುಬಿಯಾ ಪನ್ಪಿನಾಲೆನ್ ಮೋಕೆ ಮಲ್ತ್ದ್ ಮದಿಮೆ ಆದಿತ್ತೆ. ಆಂಡ ಮಹಮ್ಮದ್ ಅಶ್ರಫ್ಗ್ ಅವೆಕ್ ದುಂಬೇ ಖತೀಜಾ ಪನ್ಪಿನಾಲೆನ ಒಟ್ಟುಗು ಮದಿಮೆ ಆದಿತ್ತ್ಂಡ್. ಮಹಮ್ಮದ್ ಆಶ್ರಫ್ನ 2ನೇ ಮದಿಮೆದ ಬಗೆಟ್ ಸುರುತ ಬೊಡೆದಿ ಖತೀಜಾ ಪುತ್ತೂರ್ ಮಹಿಳಾ ಪೊಲೀಸ್ ಸ್ಟೇಶನ್ಡ್ ಬರೆಪಾದಿನ ಒಯಿಲ್ದ ಪ್ರಕಾರ ನ್ಯಾಯಾಂತಡೆಡ್ ವಿಚಾರಣೆ ನಡತೊಂದುಂಡು. ಈ ಮಾತ ಬುಲೆಚ್ಚಿಲ್ಲೆನ ನಡುಟು ಮೇ 1ತಾನಿ ನಡೀರ್ 1.30 ಗಂಟೆದ ಅಂದಾಜಿಗ್ ರುಬಿಯಾ ಮೆರೆನ ಅಪ್ಪೆ ಐಸಮ್ಮ ಮೇರ್ ಮಹಮ್ಮದ್ ಅಶ್ರಫ್ನ್ ರುಬಿಯಾ ರ್ದ್ ದೂರ ಮಲ್ಪುನ ಉದ್ದೇಶೊಡು ತನ್ನ ಐವೆರ್ ಪಾಸಾಡಿಲೆನ್ ಲೆಪ್ಪುಡಾದ್ ನಿದ್ರೆಡ್ ಇತ್ತಿನ ಆಶ್ರಫ್ ನ್ ಬಲಾತ್ಕಾರೊಡು ಇಲ್ಲರ್ದ್ ಪಿದಯಿ ಲೆತೊಂದು ಬತ್ತ್ದ್ ಕಾರ್ದುಲಯಿ ಕುಲ್ಲಾದ್ ಕಿಡ್ನಾಪ್ ಮಲ್ತ್ದ್ ಇಟ್ಟೆಲ್ದ ಸಾರಡ್ಕಡ್ ರುಬಿಯಾನ ಪಲಯೆ ಇತ್ತಿನ ಇಲ್ಲಗ್ ಲೆತೊಂದು ಪೋದು ಅಲ್ಪ ಪತ್ತ್ರ್ದ್ ದೀದ್ ಮ ಆಕ್ದೆರ್. ಬೊಕ್ಕ ಮಧ್ಯಾಹ್ನ 12 ಗಂಟೆಗ್ ನೆಹರುನಗರಡ್ ಕನತ್ ಬುಡ್ದು ಪೋಡಿಕಟ್ಟಾದ್ ಪೋತೆರ್ ಪನ್ದ್ ಆರೋಪ ಮಲ್ತ್ದೆರ್.
ನಡಕೆಗ್ ಸಂಬಂಧಿತ್ದ್ ಬೆದ್ರ ನಿವಾಸಿ ಮಹಮ್ಮದ್ ಆಶ್ರಫ್ ಬರೆಪಾದಿನ ಒಯಿಲ್ದ ಪ್ರಕಾರ ಆರೆನ 2ನೇ ಬೊಡೆದಿನ ಅಪ್ಪೆ ಐಸಮ್ಮ, ಅಮ್ಮೆ ಅಬ್ಬಾಸ್, ಸುರುತ ಬೊಡೆದಿ ಖತೀಜ, ಅನ್ಸಲ್, ಸಾಗರ್, ಸಾಹದ್, ಆರೀಫ್ ಬೆದ್ರ, ಸಮೀರ್ ಸೇರ್ದ್ ಬೇತೆ ಮೂವೆರೆ ಮಿತ್ತ್ ಪುತ್ತೂರ್ ನಗರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.