Last updated on May 6th, 2026 at 12:58 pm
ತೊರತ್ತಲ್, ಮೇ 06: ಕಾನ -MRPL ಚತುಷ್ಪಥ ಸಾದಿದ ಅರ್ದಂಬರ್ದ ಬೇಲೆರ್ದಾವರ ದಿನೊಲಾ ಎಡ್ತೆಲು ನಡತೊಂದಿತ್ತ್ದ್ ಇತ್ತೆನೇ ಸಾದಿದ ಬೇಲೆ ಮುಗಿಪೆರೆ ಒತ್ತಾಯ ಮಲ್ತ್ದ್ ಇನಿ ಕಾನ ಜಂಕ್ಷನ್ದ ಕೈತಲ್ ಡಿವೈಎಫ್ಐ ಕಾನ ಘಟಕ, ಆಟೋ ರಿಕ್ಷಾ ಚಾಲಕೆರೆ ಸಂಘ (ಸಿಐಟಿಯು) ನಾಗರಿಕ ಹೋರಾಟ ಸಮಿತಿ ಕಾನ ಮುತಾಲಿಕೆಡ್ ಇನಿ ಸಾದಿ ಅಡ್ಡ ಕಟ್ಟ್ದ್ ಪೊರ್ಮ್ಬಾಟ ನಡತ್ಂಡ್.
ಪೊರ್ಮ್ಬಾಟೊನು ಉದ್ದೇಶಿತ್ದ್ ಪಾತೆರ್ನ ಡಿವೈಎಫ್ಐ ಜಿಲ್ಲಾಧ್ಯಕ್ಷೆ ಬಿ.ಕೆ ಇಮ್ತಿಯಾಜ್, ನಾಗರಿಕೆರೆ ಪೊರ್ಮ್ಬಾಟೊರ್ದು ಬೊಕ್ಕ ಚತುಷ್ಪಥ ಸಾದಿದ ಬೇಲೆ ಮಲ್ಪೆರೆ ಸರಕಾರ ಅನುದಾನ ಬುಡುಗಡೆ ಮಲ್ತಿತ್ತ್ಂಡ್ ಆಂಡ ನಗರಪಾಲಿಕೆ ಬೊಕ್ಕ ಲೋಕೋಪಯೋಗಿ ಇಲಾಖೆದ ಮಚ್ಮಚ್ರ್ದಾವರ ಸಾದಿಗ್ ವಾರಿಸ್ದಾರೆರ್ ಇಜ್ಜಂದಿಲೆಕ ಆತ್ಂಡ್, ದಿನೊಲಾ ಟೂವೀಲರ್ಡ್ ಪೋಪಿನಕಲೆಗ್ ಉಪದ್ರ ಆವೊಂದಿತ್ತ್ಂಡಲಾ ಸಂಬಂಧಿತಿನ ಅಧಿಕಾರಿಲು ಕ್ರಮ ಗೆತೊನೊಂದಿಜ್ಜೆರ್, ಜನಪ್ರತಿನಿಧಿಲು ಬಾಯಿ ಬರಂದಿನಕಲೆ ಲೆಕ ಮಲ್ತೊಂದುಲ್ಲೆರ್ ಪನ್ದ್ ಆರೋಪ ಮಲ್ತಿನ ಆರ್ ಇತ್ತೆನೇ ಕಾಮಗಾರಿ ಮುಗಿತಿಜಿಂಡ ನಗರಪಾಲಿಕೆಗ್ ಮುತ್ತಿಗೆ ಪಾಡುನ ಎಚ್ಚರ್ಗೆ ಕೊರ್ಯೆರ್. ಡಿವೈಎಫ್ಐ ಸುರತ್ಕಲ್ ವಲಯ ಕಾರ್ಯದರ್ಶಿ ಶ್ರೀನಾಥ್ ಕುಲಾಲ್, ಆಟೋ ರಿಕ್ಷಾ ಚಾಲಕರ ಸಂಘದ ಅಧ್ಯಕ್ಷೆ ಅಬ್ದುಲ್ ಬಷೀರ್ ಪಾತೆರ್ಯೆರ್.
ಬೇತೆ ಡೇತೆ ಸಂಘಟನೆಲೆನ ಪ್ರಮುಖೆರಾಯಿನ ಬಿ.ಕೆ ಮಸೂದ್, ಅಜ್ಮಾಲ್ ಅಹ್ಮದ್, ಮೆಹಬೂಬ್ ಖಾನ್, ಜಗದೀಶ್, ಅಬ್ದುಲ್ ರಹೀಮ್, ಶರೀಫ್ ಜನತಾ ಕಾಲನಿ, ಅಬೂಬಕ್ಕರ್ ಕೆ.ಪಿ, ಫ್ರಾನ್ಸಿಸ್ ಡಿಸೋಜಾ, ಮುಸ್ತಫಾ ಒಟ್ಟೆಕಾಯರ್, ಲಕ್ಷ್ಮೀಶ ಅಂಚನ್, ಹಂಝ ಮೈಂದಗುರಿ, ಸುಧೀರ್ ಕೋಡಿಕೆರೆ, ಐ ಮೊಹಮ್ಮದ್, ಇಬ್ರಾಹಿಂ ಹಳೆಮನೆ, ಅಶ್ರಫ್, ಬಷೀರ್ ಕುಳಾಯಿ ಇಂಚ ಪಾಕ ಜನ ಒತ್ತುಪಾಲ್ ಇತ್ತೆರ್.