Last updated on May 7th, 2026 at 08:42 am
ಕೋಲ್ಕತ್ತಾ, ಮೇ 7: ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆರ್ದ್ ಬೊಕ್ಕ ಕುಡ ಹಿಂಸಾಚಾರ ನಡತೊಂದುಂಡು. ಬುಧವಾರ ರಾತ್ರೆ ಉತ್ತರ 24 ಪರಗಣ ಜಿಲ್ಲೆದ ಮಧ್ಯಮ್ಗ್ರಾಮೊದ ದೋಹಾರಿಯಾ ಪ್ರದೇಶೊಡು ಬಿಜೆಪಿ ನಾಯಕೆ ಬೊಕ್ಕ ನನದ ಮುಖ್ಯಮಂತ್ರಿ ಅಭ್ಯರ್ಥಿ ಸುವೇಂದು ಅಧಿಕಾರಿ ಮೆರೆನ ಆಪ್ತ ಸಹಾಯಕೆ ಚಂದ್ರನಾಥ್ ರಥ್ ಮೆರೆನ್ ಕೆಂಗುಡೆರ್ ಶೂಟ್ ಮಲ್ತ್ದ್ ಕೆರ್ತೆರ್. ಈ ನಡಕೆ ರಾಜ್ಯೊದ ಕಾನೂನ್ ಸುವ್ಯವಸ್ಥೆದ ಬಗೆಟ್ ಮಲ್ಲ ಪ್ರಶ್ನೆಲೆನ್ ಲಕ್ಕಾದ್ ಪಾಡ್ದ್ಂಡ್.
ಪೊಲೀಸ್ ಮೂಲೊಲೆನ ಪ್ರಕಾರ, ಬುಧವಾರ ರಾತ್ರೆ ಸುಮಾರ್ 10.20 ಗ್ ಚಂದ್ರನಾಥ್ ರಥ್ ಮೇರ್ ಬಾರಾಸಾತ್ಡ್ ಇಪ್ಪುನ ತನ್ನ ಇಲ್ಲಗ್ ಕಾರ್ಡ್ ಪಿರಬರೊಂದಿತ್ತೆರ್. ದೋಹಾರಿಯಾ ಪ್ರದೇಶೊಡು ಬೈಕ್ಲೆಡ್ ಬತ್ತಿನ ಕೆಂಗುಡೆರ್ ಆರೆನ ಕಾರ್ನ್ ಅಡ್ಡಕಟ್ಟ್ದೆರ್. ಒರಿ ಕಾರ್ದ ಕಂಡಿದ ಬರಿಕ್ ಬತ್ತ್ದ್ ಚಂದ್ರನಾಥ್ನ ಮಿತ್ತ್ ಮೂಜಿ ರೌಂಡ್ ಶೂಟ್ ಮಲ್ತ್ದೆ. ಡ್ರೈವರ್ನ ಬರಿತ ಸೀಟ್ಡ್ ಕುಲ್ಲುದಿತ್ತಿನ ರಥ್ ಅಲ್ಪನೇ ತೀರ್ದೆರ್. ಈ ದಾಳಿಡ್ ಗಾತಿದ ಗಡಿಕುಲಾತಿನ ಕಾರ್ ಡ್ರೈವರ್ನ್ ಕೋಲ್ಕತ್ತಾದ ಎಸ್ಎಸ್ಕೆಎಂ ಆಸ್ಪತ್ರೆಗ್ ದಾಕಲ್ತ್ದೆರ್.
ಆಪ್ತನ್ ಕೆರ್ತಿನ ಸುದ್ದಿ ಕೇನ್ಡಿನೇ ಸುವೇಂದು ಅಧಿಕಾರಿ ಆಸ್ಪತ್ರೆಗ್ ಬಲ್ತೊಂದು ಬತ್ತ್ದೆರ್. ರಾಜ್ಯ ಬಿಜೆಪಿ ಅಧ್ಯಕ್ಷೆ ಸಮಿಕ್ ಭಟ್ಟಾಚಾರ್ಯ ಪಾತೆರ್ದ್, ‘ಇಂಚಿನ ದಾಲ ಮಲ್ಪೆರ್ ಪನ್ದ್ ಎನ್ನೊಂದಿತ್ತ, ಆಂಡ ಟಿಎಂಸಿ ಈತ್ ನೀಚ ಮಟ್ಟ್ಗ್ ಜಪ್ಪುಂಡು ಪನ್ದ್ ಎಂಕ್ಲ ಎನ್ನ್ದಿಜ್ಜಂಡ್. ವಿರೋಧ ಪಕ್ಷೊದ ನಾಯಕನ ಆಪ್ತ ಸಹಾಯಕನೇ ಕೆರ್ಪುನ ಮುಕೇನ ದಾದ ತೋಜಾಯೆರ ಪಿದಡ್ದೆರ್? ಎಂಕ್ಲ ಕಾನೂನು ಕ್ರಮ ಗೆತೊನುವ’ ಪನ್ದ್ ಆಕ್ರೋಶ ಪಿದಯಿ ಪಾಡ್ದೆರ್. ಚಂದ್ರನಾಥ್ 2018 ರ್ದ್ ಸುವೇಂದು ಅಧಿಕಾರಿನ ಒಟ್ಟುಗು ಇತ್ತೆರ್, ಮೇರ್ ದುಂಬು ಭಾರತೀಯ ವಾಯುಪಡೆ ಟ್ಲಾ ಸೇವೆ ಸಂದಾದೆರ್.