Last updated on May 7th, 2026 at 10:10 am
ಪುತ್ತೂರ್, ಮೇ. 7: ಪುತ್ತೂರ್ದ ಬೊಳ್ವಾರ್ಡ್ ಇಪ್ಪುನ ಮಹಿಳಾ ಪ್ರಥಮ ದರ್ಜೆ ಕಾಲೇಜ್ಡ್ ಈ ವರ್ಸೊರ್ದೇ ಸೈನ್ಸ್ ( ಪದವಿ ವಿಜ್ಞಾನ) ವಿಭಾಗ ಸುರು ಆಯೆರೆ ಉಂಡು ಪನ್ದ್ ಶಾಸಕೆ ಅಶೋಕ್ ರೈ ತೆರಿಪಾದೆರ್.
ಬುಧವಾರ ಬೆಂಗಳೂರ್ಡ್ ಉನ್ನತ ಶಿಕ್ಷಣ ಸಚಿವೆ ಎಂ. ಸಿ. ಸುಧಾಕರ್ ಮೆರೆನ್ ತಿಕ್ಕ್ದ್ ಬಿನ್ನಪು ಸಂದಾಯಿನ ಶಾಸಕೆರ್, ಪುತ್ತೂರ್ದ ಮಹಿಳಾ ಪ್ರಥಮ ದರ್ಜೆ ಕಾಲೇಜಿಡ್ ವಿಜ್ಞಾನ ವಿಭಾಗದಾಂತೆ ವಿದ್ಯಾರ್ಥಿನಿಯೆರೆಗ್ ಬಾರೀ ಬಂಙ ಆತ್ಂಡ್. ಪೊಸ ಕಾಲೇಜ್ ಕಟ್ವಾನ ಕಟ್ಟಾದಿತ್ತ್ದ್ ಅದೆಕ್ಲೆನ ಕುಂದೆಲ್ನ್ ಸಮ ಮಲ್ತ್ದ. ನನ ವಿದ್ಯಾರ್ಥಿನಿಯೆರೇಗ್ ಅನುಕೂಲ ಆಪಿಲೆಕ ವಿಜ್ಞಾನ ವಿಭಾಗೊನು ಸುರು ಮಲ್ಪೆರೆ ಬಿನ್ನಪು ಮಲ್ತೆರ್. ಇಂದೆಕ್ ಸ್ಪಂದನೆ ಕೊರ್ನ ಸಚಿವೆರ್ ಈ ವರ್ಸೊರ್ದೇ ವಿಜ್ಞಾನ ವಿಭಾಗ ಸುರು ಮಲ್ಪೆರೆ ಸೂಚನೆ ಕೊರ್ತೆರ್. ಇಂದೆತ ಒಟ್ಟುಗು ಪೊಣ್ಣುಲೆನ ಬೊಕ್ಕ ಪೋಷಕೆರೆನ ಪಾಕ ವರ್ಸೊದ ಕಾಯೆಸ್ ಈಡೆತ್ತ್ದ್ಂಡ್.
ಪೀಠೋಪಕರಣೊಗು 1 ಕೋಟಿ ಅನುದಾನೊನು ಬಿನ್ನಪು
ಮಹಿಳಾ ಪ್ರಥಮ ದರ್ಜೆ ಕಾಲೇಜಿಗ್ ಪೀಠೋಪಕರಣೊಗು ಒಂಜಿ ಕೋಟಿ ಅನುದಾನ ಕೊರ್ಪುಲೆಕಲಾ ಈ ಪೊರ್ತುಡು ಶಾಸಕೆರ್ ಸಚಿವೆರೆಡ ಕೇನ್ಡೊನ್ಡೆರ್. ವಿಜ್ಞಾನ ವಿಭಾಗ ಸುರು ಆವರೆ ಪ್ರಯೋಗಾಲಯೊದ ಅಗತ್ಯ ಇತ್ತ್ದ್ ಅವೆಕ್ ಬೋಡಾಪಿನ ಅಗತ್ಯ ಸೊತ್ತುಲೆನ್ ಒದಗಾಯೆರೆ ಶಾಸಕೆರ್ ಬಿನ್ನಪು ಮಲ್ತಿತ್ತ್ದ್ ಸಚಿವೆರ್ ಅನುದಾನ ಕೊರ್ಪುನ ಪಾತೆರ ಕೊರ್ತೆರ್ ಪನ್ದ್ ಶಾಸಕೆರ್ ತೆರಿಪಾದೆರ್.