Last updated on May 8th, 2026 at 09:06 am
ಕುಡ್ಲ, ಮೇ 07: ಸೈಡ್ ಕೊರ್ತಿಜೆರ್ ಪನ್ಪಿ ನೆವನೊಗು ಕಾರ್ ಡ್ರೈವರ್ ಒರಿ ಕೆಎಸ್ಆರ್ಟಿಸಿ ಬಸ್ ಡ್ರೈವರ್ ಬೊಕ್ಕ ಕಂಡಕ್ಟರ್ಗ್ ಆಕ್ದ್ ಕರ್ತವ್ಯಗ್ ಅಡ್ಡಮಲ್ದಿನ ನಡಕೆ ಬುಧವಾರ ಕಾಂಡೆ ವಳಚ್ಚಿಲ್ ಜಂಕ್ಷನ್ ದಲ್ಪ ನಡತ್ದ್ಂಡ್.
ರಾಜಶೇಖರ್ ಪನ್ಪಿನಾರ್ ಕೆಎಸ್ಆರ್ಟಿಸಿ ಪುತ್ತೂರು ವಿಭಾಗೊದ ಬಿ.ಸಿ ರೋಡ್ ಘಟಕೊಡು ಕಂಡಕ್ಟರ್ ಆದುಲ್ಲೆರ್. ಮೇ 6 ತಾನಿ ಕಾಂಡೆ ಮೇರ್ ಡ್ರೈವರ್ ಪಿ. ಜಯರಾಮ ಪನ್ಪಿನಾರೆನ ಒಟ್ಟುಗು ಕುಡ್ಲರ್ದ್ ಪುತ್ತೂರ್ಗ್ ಬಸ್ಸ್ಡ್ ಪ್ರಯಾಣಿಕೆರೆನ್ ಲೆತೊಂದು ಪೋವೊಂದಿತ್ತೆರ್. ಕಾಂಡೆ 10 ಗಂಟೆದ ಅಂದಾಜಿಗ್ ವಳಚ್ಚಿಲ್ ಜಂಕ್ಷನ್ಡ್ ಬ್ಯಾರಿಕೇಡ್ ಇತ್ತಿನೆರ್ದಾವರ ಬಸ್ ಡ್ರೈವರ್ಗ್ ಪಿರವುರ್ದ್ ಬತ್ತಿನ ಕಾರ್ಗ್ ಸೈಡ್ ಕೊರ್ಯೆರ ಆತಿಜಿಗೆ.
ಬೊಕ್ಕ ಬಸ್ಸ್ ಉಂತಡೆಡ್ ಪ್ರಯಾಣಿಕೆರೆನ್ ಜಪ್ಪಾಯೆರ ಉಂತಾನಗ, ಕಾರ್ ಡ್ರೈವರ್ ಬಸ್ಸ್ಗ್ ಅಡ್ಡ ಕಾರ್ ಉಂತಾದ್ ಬ್ಲಾಕ್ ಮಲ್ತ್ದೆ. ಬಸ್ ಡ್ರೈವರ್ ಜಯರಾಮ ಮೆರೆಗ್ ಪೆದಂಬು ನೆರ್ದ್, ಪೋಡಿಕಟ್ಟಾದೆ. ಈ ದೃಶ್ಯೊನು ಕಂಡಕ್ಟರ್ ರಾಜಶೇಖರ್ ಮೇರ್ ಮೊಬೈಲ್ಡ್ ರೆಕಾರ್ಡ್ ಮಲ್ಪೆರೆ ತೂನಗ, ಆರೋಪಿ ಆರೆನ ಕೆಪ್ಪೆಗ್ ಆಕ್ದ್, ಯೂನಿಫಾರ್ಮ್ ಒಯ್ತ್ದ್ ಪರ್ತ್ ಪಾಡ್ದೆ. ಗಡಿಕುಲಾತಿನ ರಾಜಶೇಖರ್ ಮೆರ್ ವೆನ್ಲಾಕ್ ಆಸ್ಪತ್ರೆಡ್ ಮರ್ದ್ ಗೆತೊಂದೆರ್. ಈ ಬಗೆಟ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದೆರ್.