Last updated on May 12th, 2026 at 09:29 am
ಕಾಸ್ರೋಡ್, ಮೇ. 12: ಮದಿಮೆ ನಿಗಂಟ್ ಆದಿತ್ತಿನ ಆಣ್ ಆ್ಯಕ್ಸಿಡೆಂಟ್ಡ್ ತೀರಿನೆರ್ದಾವರ ಬೆಸರ್ಡ್ ಜವನ್ದಿ ಒರ್ತಿ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಕುಂಬ್ಳೆ ಗ್ ಕೈತಲ್ದ ಕುಂಟಗೇರಡ್ಕ ಡ್ ನಡತ್ದ್ಂಡ್.
ತೀರ್ದಿನ ಪೊಣ್ಣನ್ ಕುಂಟಗೇರಡ್ಕದ ಜನಾರ್ದನ್ ಮೆರೆನ ಮಗಲ್ ಪ್ರಫುಲ್ಲಾ (26) ಪನ್ದ್ ಗುರ್ತ ಪತ್ತ್ದೆರ್.
ಪ್ರಫುಲ್ಲಗ್ ನಾಲ್ ತಿಂಗೊಲುಗ್ ದುಂಬು ತಮಿಳ್ನಾಡ್ ಮೂಲೊದ ಮಣಿ ಪನ್ಪಿನ ಆಣನೊಟ್ಟುಗು ನಿಶ್ಚಯ ಆದಿತ್ತ್ಂಡ್. ಸುಮಾರ್ ಒಂಜಿ ತಿಂಗೊಲುಗು ದುಂಬು, ಮಣಿನ ಬೈಕ್ಗ್ ಬೇತೆ ಒಂಜಿ ಬೈಕ್ ಎಡ್ತಿನೆರ್ದಾವರ ಆರೆಗ್ ಗಾತಿದ ಗಡಿಕುಲಾದಿತ್ತ. ಆರೆಗ್ ಪಾಕ ದಿನ ಆಸ್ಪತ್ರೆಡ್ ಮರ್ದ್ ನಡತೊಂದಿತ್ತ್ದ್, ಬೊಕ್ಕ ಮರ್ದ್ ಪಲಿಪಂದೆ ಆರ್ ತೀರ್ದೆರ್.
ಮಣಿ ತೀರಿಬೊಕ್ಕ, ಪ್ರಫುಲ್ಲ ಖಿನ್ನತೆ ಗ್ ಬೂರ್ದಿತ್ತೆರ್ ಪನ್ದ್ ವರದಿ ಆತ್ಂಡ್. ಐತಾರ ಇಲ್ಲದಕುಲು ಮದಿಮೆಗ್ ಪೋದುಪ್ಪುನಗ ಪ್ರಫುಲ್ಲಾ ಇಲ್ಲಡ್ ಸೀಲಿಂಗ್ ಫ್ಯಾನ್ಗ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಇಲ್ಲದಕುಲು ಪಿರ ಬನ್ನಗ ಈ ಬಗೆಟ್ ತೆರಿದ್ಂಡ್.
ಆರ್ ಬರೆತಿನ ಪನ್ದ್ ನಂಬುದಿನ ಒಂಜಿ ಓಲೆನ್ ಪೊಲೀಸೆರ್ ಉಲಕೈ ಮಲ್ತೊಂದೆರ್. ಆ ಓಲೆಡ್, ಮಣಿನ ಅಂತ್ಯಕ್ರಿಯೆ ನಡತಿನ ಜಾಗೆಡೇ ಆರೆನಲಾ ಅಂತ್ಯಕ್ರಿಯೆ ಮಲ್ಪೊಡು ಪನ್ದ್ ಆರ್ ಬಯಕ್ದೆರ್ ಪನ್ದ್ ವರದಿ ಆತ್ಂಡ್.
ಪೊಲೀಸೆರ್ ಮಹಜರ್ ಮಲ್ತ್ದ್, ಕಾಸ್ರೋಡ್ ಜನರಲ್ ಆಸ್ಪತ್ರೆಡ್ ಮರಣೋತ್ತರ ಪರೀಕ್ಷೆಗ್ ಕಡಪುಡ್ದೆರ್. ತಮಿಳುನಾಡ್ ಮೂಲೊದ ಮಣಿ ಬ್ಯಾಂಕ್ಡ್ ಬೇಲೆ ಮಲ್ತೊಂದಿತ್ತೆರ್. ನವೆಂಬರ್ ರ್ದ್ ಬೊಕ್ಕ ಮದಿಮೆ ಮಲ್ಪೆರೆ ರಡ್ಡ್ ಇಲ್ಲದಕುಲ್ಲಾ ಅಟ್ಟನೆ ಮಲ್ತೊಂದಿತ್ತೆರ್ ಪನ್ದ್ ವರದಿ ಆತ್ಂಡ್.