Last updated on May 13th, 2026 at 08:55 am
ಮುಲ್ಕಿ, ಮೇ. 13: ಮುಲ್ಕಿ ರೈಲ್ವೇ ಸ್ಟೇಷನ್ ಸಾದಿಡ್ ‘ಹೈಡ್ರೋ ವೀಡ್’ ಗಾಂಜಾ ಮಾರ್ಯೆರ ತೂವೊಂದಿತ್ತಿನ ಒರ್ತಿ ಜವನ್ದಿನ್ ಮುಲ್ಕಿ ಪೋಲಿಸೆರ್ ಕೈದ್ ಮಲ್ತ್ದೆರ್. ಕೈದಾತಿನಾಲೆನ್ ಶಿವಮೊಗ್ಗ ಜಿಲ್ಲೆದ ಸಾಗರ ತಾಲೂಕ್ದ ಹುಲಿದೇವರ ಬನದ ಸುಹಾನಾ (21) ಪನ್ದ್ ಗುರ್ತ ಪತ್ತ್ದೆರ್.
ಮೋಲು ಕುಂದಾಪುರೊದ ಒಂಜಿ ಕಾಲೇಜ್ಡ್ ಕಡೇತ ವರ್ಸೊದ ಬಿಸಿಎ (BCA) ಕಲ್ತೊಂದುಲ್ಲಲ್.
ಪೋಲಿಸೆರ್ ಮೋಲೆನ ಕೈರ್ದ್ ಸುಮಾರ್ 35 ಲಕ್ಷ ರೂಪಾಯಿ ಬಿಲೆತ 1 ಕೆಜಿ 42 ಗ್ರಾಂ ‘ಹೈಡ್ರೋ ವೀಡ್’ ಗಾಂಜಾ, ಮೊಬೈಲ್ ಫೋನ್ ಬೊಕ್ಕ ಅಪರಾಧೊಗು ಗಲಸ್ದಿನ ಬೇತೆ ಸೊತ್ತುಲೆನ್ ಉಲಕೈ ಮಲ್ತೊಂದೆರ್.
ಒಲವುದ ಪ್ರಕಾರ, ಮೋಲು ಚೆನ್ನೈಡ್ದ್ ಈ ಗಾಂಜಾನ್ ಕನತ್ದ್ ಕುಡ್ಲಡ್ ಮಾರ್ದ್ ಕಾಸ್ ಮಲ್ಪುನ ಉದ್ದೇಶೊಡು ಇತ್ತಲ್.
ಈ ಬಗೆಟ್ ಮುಲ್ಕಿ ಪೊಲೀಸ್ ಸ್ಟೇಷನ್ಡ್ ಎನ್ಡಿಪಿಎಸ್ ಕಾಯ್ದೆದ ಕಲಂ 8(ಸಿ) ಬೊಕ್ಕ 20(ಬಿ)ದ ಅಡಿಟ್ ಪ್ರಕರಣ ದಾಕಲಾತ್ಂಡ್. ಪಣಂಬೂರು ಎಸಿಪಿ ಕೂಟ ಬೊಕ್ಕ ಮುಲ್ಕಿ ಸ್ಟೇಶನ್ ಪೊಲೀಸೆರ್ ಈ ಕಾರ್ಯಾಚರಣೆ ಮಲ್ತೆರ್.
ಆರೋಪಿನ ಮಿತ್ತ್ ದುಂಬು ಕಾವೂರು ಪೊಲೀಸ್ ಸ್ಟೇಶನ್ಡ್ ಎನ್ಡಿಪಿಎಸ್ ಪ್ರಕರಣ ದಾಕಲಾದಿತ್ತ್ದ್, ಬೆಂಗಳೂರು ಅಂತರಾಷ್ಟ್ರೀಯ ವಿಮಾನ ಉಂತಡೆದ ಕಸ್ಟಮ್ಸ್ ವಿಭಾಗೊಡ್ಲಾ ಪ್ರಕರಣ ದಾಕಲಾದುಂಡು ಪನ್ದ್ ಪೊಲೀಸೆರ್ ತೆರಿಪಾದೆರ್.