ರಾಜ್ಯೊಡು ಹಿಜಾಬ್ ನಿಷೇಧೊದ ಆದೇಶ ವಾಪಸ್: ಪೊಸ ವಸ್ತ್ರಸಂಹಿತೆ ಜಾರಿ; ಸಾಂಪ್ರದಾಯಿಕ ಸಙ್ಕೇತೊಲೆನ್ ಪಾಡೊನರೆ ಮುಕ್ತ ಅವಕಾಶ

Last updated on May 14th, 2026 at 08:25 am

ಬೆಂಗಳೂರ್, ಮೇ 13: ರಾಜ್ಯೊದ ಶಾಲೆ ಬೊಕ್ಕ ಕಾಲೇಜ್‌ಲೆಡ್ ವಿವಾದೊಗು ನೆವನ ಆದಿತ್ತಿನ ವಸ್ತ್ರಸಂಹಿತೆದ ನಿಯಮೊಲೆನ್ ರಾಜ್ಯ ಸರ್ಕಾರ ಪಗತ್‌ದ್ಂಡ್. ಸಿದ್ದರಾಮಯ್ಯ ಸರ್ಕಾರ ಬುಧವಾರ ಪೊಸ ಆದೇಶ ಪಿದಡ್ಪಾದಿತ್ತ್‌ದ್, ವಿದ್ಯಾರ್ಥಿಲು ಸಮವಸ್ತ್ರೊದ ಒಟ್ಟುಗು ಹಿಜಾಬ್, ಜನಿವಾರ ಸೇರ್ದ್ ಅಕಲೆನ ಧಾರ್ಮಿಕ ಪದ್ಧತಿಗ್ ತಕ್ಕ ಸಙ್ಕೇತೊಲೆನ್ ಪಾಡೊನರೆ ಮುಕ್ತ ಅವಕಾಶ ಮಲ್ತ್ ಕೊರ್ತುಂಡು.

1ನೇ ಕ್ಲಾಸ್‌ರ್ದ್ 12ನೇ ಕ್ಲಾಸ್‌ ಮುಟ್ಟದ ಜೋಕುಲೆಗ್ ಈ ಪೊಸ ನಿಯಮ ಅನ್ವಯ ಆವರೆ ಇತ್ತ್‌ದ್, ಈ ಶೈಕ್ಷಣಿಕ ವರ್ಸೊರ್ದೇ ಜಾರಿಗ್ ಬರ್ಪುಂಡು. ಸರ್ಕಾರೊದ ಆದೇಶೊದ ಮುಖ್ಯಾಂಶೊಲು ಇಂಚ ಉಲ್ಲ:

ಸಮವಸ್ತ್ರೊದ ವಿಚಾರವಾದ್ 2022ತ ಆದೇಶ ಪಿರ ಗೆತೊಂದು ಪೊಸ ಆದೇಶ.

ಸಾಂಪ್ರದಾಯಿಕ ಬೊಕ್ಕ ಪದ್ಧತಿ ಆಧಾರಿತವಾಯಿನ ಸಙ್ಕೇತೊಲೆನ ತುತ್ತೈತೊಗು ಅವಕಾಶ ಕೊರ್ದು ಆದೇಶೊಡು ಉಲ್ಲೇಖ.

ಬಿಜೆಪಿ ಸರಕಾರ ಪಿದಡ್ಪಾದಿತ್ತಿನ ಹಿಜಾಬ್‌ ನಿಷೇಧ ಆದೇಶ ವಾಪಸ್ ಗೆತೊಂಡಿನ ಸಿದ್ದರಾಮಯ್ಯ ಸರ್ಕಾರ.

ಹಿಜಾಬ್, ಜನಿವಾರ, ರುದ್ರಾಕ್ಷಿಗ್ಲಾ ಅವಕಾಶ

ಸರ್ಕಾರೊದ ಪೊಸ ಆದೇಶೊದ ಪ್ರಕಾರ, ಶಾಲೆ-ಕಾಲೇಜ್‌ಲು ಗೊತ್ತು ಮಲ್ದಿನ ಸಮವಸ್ತ್ರೊಗು ತಕ್ಕ ಅಂಚೆನೇ ಅವೆಕ್ ಒಂಬುಲೆಕ ಸೀಮಿತ ಸಾಂಪ್ರದಾಯಿಕ ಸಙ್ಕೇತೊಲೆನ್ ಪಾಡೊನರೆ ಅನು ಕೊರ್ತೆರ್. ಹಿಜಾಬ್ (Headscarf), ಪೇಟ ಅತ್ತ್ಂಡ ಟರ್ಬನ್ (Turban), ಜನಿವಾರ ಅತ್ತ್ಂಡ ಪವಿತ್ರ ದಾರ, ಶಿವದಾರ ಬೊಕ್ಕ ರುದ್ರಾಕ್ಷಿ ಪಾಡುನೆರ್ದ್ ಶಾಲೆದ ಶಿಸ್ತು ಬೊಕ್ಕ ಕಲ್ಪಾವುನ ಪ್ರಕ್ರಿಯೆಗ್ ತೆಟ್ಟಾವಂದಿಲೆಕ ತೂವೊನೊಡು. ಆತೇ ಅತ್ತಂದೆ ಸಾಂಪ್ರದಾಯಿಕ ಬೊಕ್ಕ ಪದ್ಧತಿ ಆಧಾರಿತ ಸಙ್ಕೇತ ಸಮವಸ್ತ್ರೊಗು ತಕ್ಕ ಇಪ್ಪೊಡು ಪನ್ದ್ ಆದೇಶೊಡು ಉಲ್ಲೇಖ ಮಲ್ತ್‌ದೆರ್.