Last updated on May 19th, 2026 at 11:47 am
ಬೆಂಗಳೂರ್, ಮೇ 19: ರಾಜ್ಯೊಡೊರ್ಮೆ ಎಲ್ಲೆ (ಮೇ 20) ಸಾರಿಗೆ ನೌಕರೆರೆನ ಮುಷ್ಕರೊರ್ದಾವರ ಬಸ್ ಸಂಚಾರ ಉಂತುನ ಪೋಡಿಗೆದ ಬೆರಿಟೇ, ಜನಸಾಮಾನ್ಯೆರೆಗ್ ಕುಡೊಂಜಿ ಮಲ್ಲ ಶಾಕ್ ಕಾತೊಂದುಂಡು. ಬೇತೆ ಬೇತೆ ಕಾಯೆಸ್ಲೆನ್ ಈಡೆತ್ತಾಯೆರ ಆಗ್ರಹ ಮಲ್ತ್ದ್ ಎಲ್ಲೆ ದೇಶೊಡೊರ್ಮೆ ಪ್ರೈವೇಟ್ ಮೆಡಿಕಲ್ ಶಾಪ್ (Medical Shop Bandh) ಬಂದ್ಗ್ ಲೆಪ್ಪು ಕೊರ್ದಿತ್ತ್ದ್, ಕರ್ನಾಟಕೊಡ್ಲಾ ಇಂದೆಕ್ ಬಾರೀ ಬೆರಿತಾಂಗ್ ತೋಜಿದ್ ಬೈದ್ಂಡ್. ಅಂಚಾದ್ ಎಲ್ಲೆ ಬಸ್ ಸೌಲಭ್ಯ ಮಾತ್ರ ಅತ್ತಂದೇ, ತುರ್ತ ಪೊರ್ತುಡು ಬೋಡಾಪಿನ ಮರ್ದ್ಲು ತಿಕ್ಕುನಲಾ ಬಂಙ ಆಪಿನ ಲಕ್ಷಣ ತೋಜೊಂದುಂಡು.
ಮುಖ್ಯಾಂಶೊಲು
- ಇ-ಫಾರ್ಮಸಿ, ಭಾರಿ ಡಿಸ್ಕೌಂಟ್ನ್ ವಿರೋಧ ಮಲ್ತ್ದ್ ಎಲ್ಲೆ ದೇಶೊಡೊರ್ಮೆ ಮೆಡಿಕಲ್ ಶಾಪ್ ಬಂದ್.
- ರಾಜ್ಯೊಡು ಕೆಸಿಡಿಎ ಸಂಘಟನೆ ಬಂದ್ಗ್ ಬೆರಿತಾಂಗ್ ಘೋಷಣೆ ಮಲ್ತ್ದ್ಂಡ್.
- ಕರ್ನಾಟಕ ಫಾರ್ಮಾ ರಿಟೇಲರ್ಸ್ ಬೊಕ್ಕ ಡಿಸ್ಟ್ರಿಬ್ಯೂಟರ್ಸ್ ಆರ್ಗನೈಸೇಷನ್ (KPRDO) ಸೇರ್ದ್ ಪಾಕ ಒಕ್ಕೂಟೊಲು ಪೊರ್ಮ್ಬಾಟೊಗು ನೈತಿಕ ಬೆರಿತಾಂಗ್ ಕೊರ್ತ.
ಆನ್ಲೈನ್ಡ್ ಮರ್ದ್ ಮಾರುನೆಕ್ ಬಾರೀ ವಿರೋಧ
ಪ್ರೈವೇಟ್ ಮೆಡಿಕಲ್ ಶಾಪ್ದಕುಲು ಬೊಕ್ಕ ಡಿಸ್ಟ್ರಿಬ್ಯೂಟರ್ನಕುಲೆಗ್ ಆವೊಂದುಪ್ಪುನ ಬೇತೆ ಬೇತೆ ಸಮಸ್ಯೆಲೆನ್ ಕೇಂದ್ರ ಸರ್ಕಾರೊದ ಗೇನೊಗು ಕನಯೆರ ಈ ಪೊರ್ಮ್ಬಾಟ ಮಲ್ತೊಂದುಲ್ಲೆರ್. ಪ್ರಮುಖವಾದ್, ಒವ್ವೇ ಸಮಗಟ್ಟ್ದ ಪ್ರಿಸ್ಕ್ರಿಪ್ಷನ್ ದಾಂತೆ ಆನ್ಲೈನ್ ಪ್ಲಾಟ್ಫಾರ್ಮ್ಲೆಡ್ ರಾಜಾರೋಷವಾದ್ ನಿಯಮಬಾಹಿರವಾದ್ ಮರ್ದ್ಲೆನ್ ಮಾರೊಂದುಪ್ಪುನೆರ್ದಾವರ ಸಾರ್ವಜನಿಕೆರೆ ಆರೋಗ್ಯದ ಮಿತ್ತ್ ದುಷ್ಪರಿಣಾಮ ಆವೊಂದುಂಡು ಅಂಚೆನೇ ಎಲ್ಯ ಬೇರದಕಲೆನ ಬದ್ಕ್ ಸಾದಿಗ್ ಬೂರೊಂದುಂಡು ಪನ್ದ್ ಸಂಘಟನೆಲು ಆಕ್ರೋಶ ತೂಪಾದ.
ಮಲ್ಲ ಕಾರ್ಪೊರೇಟ್ ಕಂಪೆನಿಲು ಭಾರಿ ರಿಯಾಯಿತಿ (ಡೀಪ್ ಡಿಸ್ಕೌಂಟ್) ಕೊರ್ದು ಗ್ರಾಹಕೆರೆನ್ ಒಯ್ತೊಂದುಪ್ಪುನೆರ್ದಾವರ ಸಾಂಪ್ರದಾಯಿಕ ಮೆಡಿಕಲ್ ಶಾಪ್ಲೆಗ್ ನಷ್ಟ ಆವೊಂದುಂಡು. ಅಂಚಾದ್ ಎಲ್ಲೆ ಇಡೀ ದಿನ ಪ್ರೈವೇಟ್ ಮೆಡಿಕಲ್ ಶಾಪ್ಲೆನ್ ಮುಚ್ಚಿದ್ ಪೊರ್ಮ್ಬಾಟ ಮಲ್ಪೆರ ನಿರ್ಧಾರ ಮಲ್ತ್ದೆರ್. ಆಸ್ಪತ್ರೆದ ಫಾರ್ಮಸಿಲು ಏಪೊಲ್ದ ಲೆಕ ಓಪನ್ ಇಪ್ಪುವ ಆಂಡಲಾ, ಜನಸಾಮಾನ್ಯೆರ್ ಒವ್ವೇ ತುರ್ತ ಪರಿಸ್ಥಿತಿಗ್ ಬೋಡಾದ್ ಇನಿಯೇ ಬೋಡಾಪಿನ ಮರ್ದ್ಲೆನ್ ಗೆತೊಂದು ದೀಪಿನ ಎಡ್ಡೆ.