Last updated on May 23rd, 2026 at 11:11 am
ಮಣಿಪಾಲ, ಮೇ. 23: ಮಣಿಪಾಲದ RSB ಸರ್ಕಲ್ಡ್ ಒವ್ವಾ ಬೇಲೆಗ್ ರೋಡ್ ಗರ್ತ್ ಪಾಡ್ದಿತ್ತ್ದ್ ಬೇಲೆದಕುಲು ಅವೆನ್ ಸಮ ಮುಚ್ಚಂದೆ ಪೋತೆರ್. ರೋಡ್ಡ್ ನೆನೆಪಂದೆ ತಿಕ್ಕುನ ಈ ಗುಂಡಿಗ್ ಟೂವೀಲರ್ಲ್ ಬೂರ್ದು ಅಂಕೆ ತತ್ತ್ದ್ ರೋಡ್ಗ್ ರಟ್ಟೊಂದುಲ್ಲ, ಕಾರ್ಲೆನ ಅಡಿಮೆಯಿ ರೋಡ್ಗ್ ಒರೆಸ್ಸೊಂದು ಪೋವೊಂದುಂಡು.
ಒರರ್ದ್ ಒರಾನೆ ಎಡ್ಡೇನ ರೋಡ್ಡ್ ಇಂಚ ಗರ್ತ್ ಪಾಡ್ದ್, ಅವೆನ್ ಮುಚ್ಚಂದೆ, ತೋಜುಲೆಕ ಎಚ್ಚರ್ಗೆದ ಪಲವೆಲಾ ಪಾಡಂದೆ ಜನೊಕ್ಲೆನ ಜೂವೊಡು ಗೊಬ್ಬೊಂದುಪ್ಪುನ ಕಾಂಟ್ರಾಕ್ಟರ್ನ ಮಿತ್ತ್, ಇಲಾಖೆದ ಮಿತ್ತ್ ಜನೊಕುಲು ಪಿಸ್ರಾತೆರ್. ಈ ಬಗೆಟ್ ಸಾರ್ವಜನಿಕೆರೆ ಪರವಾದ್ ವೀಡಿಯೋ ಮಲ್ತೊಂದುಪ್ಪುನಗನೇ, ಒರಿ ಸ್ಕೂಟರ್ಡ್ ಬರೊಂದಿತ್ತಿನಾರ್ ನಡುರೋಡ್ಡ್ ಒಕ್ಕ್ದ್ ದೀತಿನ ಈ ಮರಣಗುಂಡಿಗ್ ಬೂರ್ದ್ ರೋಡ್ಗ್ ರಟ್ಟ್ದೆರ್. ಈ ವೀಡಿಯೋ ಎಂಚ ವ್ಯವಸ್ಥೆ ಜನೊಕ್ಲೆನ ಜೂವೊಡು ಗೊಬ್ಬೊಂದುಂಡು ಪನ್ಪಿನೆಕ್ ಒಂಜಿ ಉದಾರ್ಮೆ. ಮೇರ್ ಒರಿಯೇ ಅತ್ತ್, ಈ ಅರ್ದಂಬರ್ದ, ಎಲಿ ತಿನ್ತಿಲೆಕಂದಿನ ಬೇಲೆರ್ದಾವರ ಪಾಕ ಜನ ಬೈಕ್ ಸ್ಕೂಟರ್ಡ್ ಪೋಪುನಕಲೆಗ್ ಬಂಙ ಆವೊಂದಿತ್ತ್ದ್, ಕೇನುನಕುಲು ಏರ್ಲಾ ಇಜ್ಜಂದಿಲೆಕ ಆತ್ಂಡ್. ಕಡೇಕ್ ಈ ಜಾಗೆಡ್ ಒಂಜಿ ಸ್ಟ್ರೀಟ್ಲೈಟ್ಲಾ ಇಜ್ಜಂದಿನ ಮಣಿಪಾಲ ಒಡಿಪುದ ಆಡಳಿತ ವ್ಯವಸ್ಥೆ ಓಡೆ ಎತ್ತ್ದ್ಂಡ್ ಪನ್ದ್ ತೂಪಾವೊಂದುಂಡು!
ನನ Mr. Manipal ಪನ್ಪಿ ಅಕೌಂಟ್ಡ್ ಪೋಸ್ಟ್ ಮಲ್ದಿನ ಈ ವೀಡಿಯೋದ ಕಮೆಂಟ್ಡ್ ಕೆಲವೆರ್ ಕಾಂಟ್ರಾಕ್ಟರ್ನ್ ಕೌಂಪೆರ ಗುಂಡಿ ಒಕ್ಕುದಿನ, ಮುಲ್ಪದ ರಾಜಕಾರಣಿಲೆನೆ ಮೂಲು ಕೌಂಪೊಡು ಪನ್ದ್ ಅಕ್ಲೆನ ಪಿಸ್ರ್ ತೋಜಾದೆರ್. ಹೈವೇಡ್ ಮಲ್ಲ ಮಲ್ಲ ರಾಡಾರ್ ಕ್ಯಾಮರಾ ದೀದ್ ಫೈನ್ ಪಾಡುನಕ್ಲೆಗ್ ಈತ್ ಎಲ್ಯ ಬೇಲೆನೊಂಜೆನ್ ಸಮ ಮಲ್ಪೆರಾಪುಜಾ ಪನ್ದ್ ಜನ ಪ್ರಶ್ನೆ ಮಲ್ತೊಂದುಲ್ಲೆರ್.