Last updated on May 25th, 2026 at 10:00 am
ದೆಲ್ಲಿ, ಮೇ 25: ವಾಹನ ಸವಾರೆರೆಗ್ ಕುಡೊಂಜಿ ಶಾಕ್. ರಡ್ಡೇ ವಾರೊಡು ನಾಲ್ ಸರ್ತಿ ಪೆಟ್ರೋಲ್, ಡೀಸೆಲ್ದ ರೇಟ್ ಎಚ್ಚ ಆತ್ಂಡ್. ಸೋಮವಾರ (ಮೇ 25) ಪೆಟ್ರೋಲ್ 2.61 ರೂ. ಬೊಕ್ಕ ಡೀಸೆಲ್ 2.71 ರೂ. ಎಚ್ಚ ಆತ್ಂಡ್.
ಮೇ 15ರ್ದ್ ರೇಟ್ ಪರಿಷ್ಕರಣೆ ಸುರು ಆಯಿ ಬೊಕ್ಕ ಪೆಟ್ರೋಲ್ ಬೊಕ್ಕ ಡೀಸೆಲ್ದ ರೇಟ್ ಒಟ್ಟು ಸುಮಾರ್ 7.5 ರೂ. ಏರ್ದ್ಂಡ್. ಜಾಗತಿಕ ಮಾರುಕಟ್ಟೆಡ್ ಕಚ್ಚಾ ತೈಲೊದ ಬಿಲೆ ಎಚ್ಚ ಆತಿನ ಅಂಚೆನೇ ರೂಪಾಯಿದ ಮೌಲ್ಯ ಜತ್ತಿನೆರ್ದಾವರ ತೈಲ ಮಾರುಕಟ್ಟೆ ಕಂಪೆನಿಲೆನ ಇಮ್ಪೋರ್ಟ್ ಕರ್ಚಿಲಾ ಎಚ್ಚ ಆತ್ಂಡ್, ಅಂಚಾದ್ ಈ ರೇಟ್ ಏರ್ತ್ದೆರ್. ಈ ಬಗೆಟ್ ಪಾತೆರ್ನ ಸರ್ಕಾರಿ ಸ್ವಾಮ್ಯೊದ ಆಯಿಲ್ ಆ್ಯಂಡ್ ನ್ಯಾಚುರಲ್ ಗ್ಯಾಸ್ ಕಾರ್ಪೊರೇಷನ್ ಬೊಕ್ಕ ಭಾರತ್ ಪೆಟ್ರೋಲಿಯಂ ಕಾರ್ಪೊರೆಷನ್ ಲಿಮಿಟೆಡ್ ಅಧಿಕಾರಿಲು, ಪಶ್ಚಿಮ ಏಷ್ಯಾದ ಭೌಗೋಳಿಕ ರಾಜಕೀಯ ಉದ್ವಿಗ್ನತೆ ಬೊಕ್ಕ ಜಾಗತಿಕ ಕಚ್ಚಾ ತೈಲೊದ ಬಿಲೆ ಎಚ್ಚ ಆತಿನ ಅಂಚೆನೇ ತೈಲ ಕಂಪೆನಿಲೆನ ನಷ್ಟೊನೇ ಇಂಧನ ರೇಟ್ ಏರ್ಯೆರ್ ಪ್ರಮುಖ ನೆವನ ಪನ್ದ್ ಪನ್ಡೆರ್.
ಹಾರ್ಮುಜ್ ಜಲಸಂಧಿ ಕೆಲ ತಿಂಗೊಲುರ್ದ್ ಬಂದ್ ಆದುಪ್ಪುನೆರ್ದಾವರ ಜಾಗತಿಕ ಇಂಧನ ಟ್ರಾನ್ಸ್ಪೋರ್ಟ್ ವ್ಯವಸ್ಥೆದ ಮಿತ್ತ್ ಒತ್ತಮೆ ಎಚ್ಚ ಆದಿತ್ತ್ದ್, ಮಧ್ಯಪ್ರಾಚ್ಯರ್ದ್ ತೈಲ ಬೊಕ್ಕ ಅನಿಲ ಇಮ್ಪೋರ್ಟ್ ಮಲ್ಪನ ದೇಶೊಲೆನ ಆರ್ಥಿಕತೆದ ಮಿತ್ತ್ಲಾ ಪರಿಣಾಮ ಮಲ್ದ್ಂಡ್. ಸಂಘರ್ಷೊದ ಪೊರ್ತುಡು ಕಚ್ಚಾ ತೈಲೊದ ಬಿಲೆ ಬ್ಯಾರೆಲ್ಗೆ 65-70 ಡಾಲರ್ರ್ದ್ 110-115 ಡಾಲರ್ಗ್ ಏರ್ದ್ಂಡ್. ಭಾರತ ತನ್ನ ಅಗತ್ಯೊದ ಸುಮಾರ್ ಶೇಕಡಾ 85 ದಾತ್ ಕಚ್ಚಾ ತೈಲೊನು ಇಮ್ಪೋರ್ಟ್ ಮಲ್ತೊನುನೆರ್ದಾವರ ಆರ್ಥಿಕತೆದ ಮಿತ್ತ್ ಪರಿಣಾಮ ಎಚ್ಚ ಆತ್ಂಡ್ ಪನ್ದ್ ಪನೊಂದುಲ್ಲೆರ್.