Last updated on May 25th, 2026 at 07:10 am
ತೊರ್ತಲ್, ಮೇ 25: ಬೇಲೆ ಮುಗಿತ್ದ್ ಒಂಜೇ ಬೈಕ್ಡ್ ಇಲ್ಲಗ್ ಪಿರಬರೊಂದಿತ್ತಿನ ಮೂವೆರ್ ಕಾರ್ಮಿಕೆರೆ ಬೈಕ್ ಲಾರಿಗ್ ಎಡ್ತಿನೆರ್ದಾವರ, ಬೈಕ್ಡ್ ಇತ್ತಿನಾಯೆ ಒರಿ ಅಲ್ಪನೇ ತೀರ್ದಿತ್ತ್ದ್, ಇರ್ವೆರೆಗ್ ಗಾತಿದ ಗಡಿಕುಲಾತಿನ ನಡಕೆ ರಾಷ್ಟ್ರೀಯ ಪೆರ್ಸಾದಿ 66ತ ಮುಕ್ಕ ಚೆಕ್ ಪೋಸ್ಟ್ ಕೈತಲ್ದ ಖಂಡಿಗೆ ಕ್ರಾಸ್ಡ್ ಕೋಡೆ ಐತಾರ ಬಯ್ಯಡ್ ನಡತ್ದ್ಂಡ್.
ಬಾಗಲಕೋಟೆ ಮೂಲೊದ, ಇತ್ತೆ ಕಾವೂರು ಪಂಜಿಮೊಗೇರ್ದ ಬಾಡಾಯಿದ ಇಲ್ಲಡ್ ಇತ್ತಿನ ಭೀಮೆ ತೀರ್ದಿನಾರ್. ಮೆರೆನ ಒಟ್ಟುಗು ಪೋವೊಂದಿತ್ತಿನ ಬಾಗಲಕೋಟೆ ಮೂಲೊದ ಸಂಗಮೇಶೆ ಬೊಕ್ಕ ಮಂಜುನಾಥಗ್ ಗಡಿಕುಲಾದಿತ್ತ್ದ್, ಅಕಲೆನ್ ಮುಕ್ಕ ಕೈತಲ್ದ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದೆರ್. ತೀರ್ದಿನ ಭೀಮೆ ಬೊಕ್ಕ ಗಡಿಕುಲಾತಿನ ಇರ್ವೆರ್ ಐತಾರ ಬೇಲೆ ಮುಗಿತ್ದ್ ಒಂಜೇ ಬೈಕ್ಡ್ ರಾಷ್ಟ್ರೀಯ ಪೆರ್ಸಾದಿ 66ಟೆ ಆದ್ ಪಂಜಿಮೊಗೇರ್ದ ಇಲ್ಲಗ್ ಪೋವೊಂದಿತ್ತೆರ್. ಈ ಪೊರ್ತುಡು ಮುಕ್ಕ ಖಂಡಿಗೆ ಕ್ರಾಸ್ದಲ್ಪ ಎದುರುಡು ಬಾರೀ ಲೋಡ್ ದಿಂಜಾವೊಂದು ಫೋವೊಂದಿತ್ತಿನ ಲಾರಿನ್ ಮೊಕುಲು ಎಡತ ಮೆಯಿಟೆ ಓವರ್ ಟೇಕ್ ಮಲ್ಪೆರ ತೂತೆರ್.
ಈ ಪೊರ್ತುಡು ಬೈಕ್ಗ್ ಲಾರಿ ಒಂತೆ ಕೊಲ್ತ್ದಿತ್ತ್ದ್, ಅಂಕೆ ತತ್ತಿನ ಬೈಕ್ ಸವಾರೆರ್ ಸಾದಿಗ್ ಬೂರ್ದೆರ್. ದುರದೃಷ್ಟವಶಾತ್ ಸಾದಿಗ್ ಬೂರ್ನ ಭೀಮನ ತರೆತ ಮಿತ್ತ್ಡೇ ಲಾರಿದ ಪಿರವುದ ಟಯರ್ ಪೋತಿನೆರ್ದಾವರ ಆರ್ ಅಲ್ಪನೇ ತೀರ್ದೆರ್. ಬೈಕ್ಡ್ ಇತ್ತಿನ ಬಾಕಿದ ರಡ್ಡ್ ಜನ ಸಾದಿಬರಿಕ್ ಬೂರ್ದ್ ಗಡಿಕುಲಾತ.
ನಡಕೆ ನಡತಿನೇ ಅಲ್ಪದಕುಲು ಗಡಿಕುಲಾತಿನಕಲೆನ್ ಮುಕ್ಕದ ಪ್ರೈವೇಟ್ ಆಸ್ಪತ್ರೆಗ್ ಲೆತೊಂದು ಪೋದು ಮರ್ದ್ ಮಲ್ಪಾದೆರ್. ವಿಷಯ ತೆರಿನನೇ ಬಡಕಾಯಿ ಕುಡ್ಲ ಸಂಚಾರ ಪೊಲೀಸ್ ಸ್ಟೇಶನ್ದ ಅಧಿಕಾರಿಲು ಬತ್ತ್ದ್ ಪರಿಶೀಲನೆ ಮಲ್ತಿತ್ತ್ದ್, ಪುನೊನು ಮರಣೋತ್ತರ ಪರೀಕ್ಷೆಗ್ ಕಡಪುಡ್ದ್ ಬೋಡಾಪಿನ ಕಾನೂನು ಕ್ರಮ ಗೆತೊಂದೆರ್.