Last updated on May 24th, 2026 at 09:41 am
ಬೆಂಗಳೂರ್, ಮೇ 24: ರಾಜ್ಯೊದ ಲಕ್ಷಗಟ್ಲೆ ಕಾರ್ಮಿಕೆರೆ ಪಾಕ ಕಾಲೊದ ಕಾಯೆಸ್ನ್ ಈಡೇತ್ತ್ದಿನ ಕರ್ನಾಟಕ ಸರ್ಕಾರ, ಬೇತೆ ಬೇತೆ 81 ವಲಯೊದ ಕಾರ್ಮಿಕೆರೆನ ಕನಿಷ್ಠ ವೇತನೊನು (Minimum Wage) ಶೇಕಡಾ 60 ದಾತ್ ಭಾರಿ ಪ್ರಮಾಣೊಡು ಪರಿಷ್ಕರಣೆ ಮಲ್ತ್ದ್ ಎಚ್ಚಿಗೆ ಮಲ್ತ್ದ್ಂಡ್. ಈ ಐತಿಹಾಸಿಕ ನಿರ್ಧಾರೊನು ಕಾರ್ಮಿಕ ಸಚಿವೆ ಸಂತೋಷ್ ಲಾಡ್ ಪ್ರಕಟ ಮಲ್ತ್ದೆರ್.
ಕಾರ್ಮಿಕ ಇಲಾಖೆ ಶುಕ್ರವಾರ (ಮೇ 22) ಈ ಪರಿಷ್ಕೃತ ಅಧಿಕೃತ ಆದೇಶ ಮಲ್ತಿತ್ತ್ದ್, ಅಸಂಘಟಿತ ಬೊಕ್ಕ ನಿರ್ದಿಷ್ಟ ವಲಯೊಲೆನ ಕಾರ್ಮಿಕೆರೆಗ್ ಆರ್ಥಿಕ ಭದ್ರತೆ ಒದಗಾವುನ ದಿಟ್ಟಿಡ್ ಸುಪ್ರೀಂ ಕೋರ್ಟ್ ನಿರ್ದೇಶನೊದ ಪ್ರಕಾರ ಈ ಕ್ರಮ ಗೆತೊಂದೆರ್. ಈ ಪೊರ್ತುಡು ದುಂಬು ಇತ್ತಿನ 4 ಪ್ರತ್ಯೇಕ ವಲಯೊಲೆನ ವರ್ಗೀಕರಣ ಪದ್ಧತಿನ್ ದೆತ್ತ್ದ್, ಮಾತಾ ಪರಿಶಿಷ್ಟ ಉದ್ಯೋಗೊಲೆನ್ ಒಂಜೇ ಅಧಿಸೂಚನೆದ ಅಡಿಟ್ ಕನತ್ದೆರ್.
ಪೊಸ ನಿಯಮೊದ ಪ್ರಕಾರ ಇಡೀ ರಾಜ್ಯೊನು ಮೂಜಿ ವೇತನ ವಲಯ (Zones) ಆದ್ ಪಾಲ್ ಮಲ್ತ್ದೆರ್.
- ವಲಯ-1: ಬೃಹತ್ ಬೆಂಗಳೂರು ಪ್ರದೇಶ (Greater Bengaluru Area)
- ವಲಯ-2: ಬೇತೆ ಮಹಾನಗರ ಪಾಲಿಕೆಲು ಬೊಕ್ಕ ಜಿಲ್ಲಾ ಕೇಂದ್ರೊಲು.
- ವಲಯ-3: ಒರಿನ ಗ್ರಾಮೀಣ ಬೊಕ್ಕ ಎಲ್ಯ ಪೇಂಟೆ ಪ್ರದೇಶೊಲು.
ಆತೇ ಅತ್ತಂದೆ, ಕಾರ್ಮಿಕೆರೆನ್ ಅಕಲೆನ ಕೌಶಲ್ಯೊದ ಆಧಾರೊಡು ಅಕುಶಲ (Unskilled), ಅರೆ-ಕುಶಲ (Semi-skilled), ಕುಶಲ (Skilled) ಬೊಕ್ಕ ಉನ್ನತ ಕುಶಲ (Highly skilled) ಪನ್ದ್ ನಾಲ್ ವಿಭಾಗ ಮಲ್ತ್ದೆರ್.
ಏರೆಗ್ ಏತ್ ಸಂಬಳ?
ಬೆಂಗಳೂರ್ (ವಲಯ-1) ಸೀಮೆಡ್ ಉನ್ನತ ಕುಶಲ ಕಾರ್ಮಿಕೆರೆಗ್ 31,114 ರೂ., ಕುಶಲ ಕಾರ್ಮಿಕೆರೆಗ್ 28,285 ರೂ., ಅರೆ-ಕುಶಲ ಕಾರ್ಮಿಕೆರೆಗ್ 25,714 ರೂ. ಬೊಕ್ಕ ಅಕುಶಲ ಕಾರ್ಮಿಕೆರೆಗ್ 23,376 ರೂ. ಮಾಸಿಕ ಕನಿಷ್ಠ ವೇತನ ತಿಕ್ಕೊಡು. ಗ್ರಾಮೀಣ ಬೊಕ್ಕ ಎಲ್ಯ ಪೇಂಟೆಡ್ ಅಕುಶಲ ಕಾರ್ಮಿಕೆರೆಗ್ ಕನಿಷ್ಠ ಮಾಸಿಕ ವೇತನ 19,319 ರೂ. ಬೊಕ್ಕ ಉನ್ನತ ಕುಶಲ ಕಾರ್ಮಿಕೆರೆಗ್ 25,714 ರೂ. ಗೊತ್ತುಮಲ್ತ್ದೆರ್.
ಲಿಂಗ ತಾರತಮ್ಯೊಗು ಬ್ರೇಕ್
ಈ ಅಧಿಸೂಚನೆಡ್ ಲಿಂಗ ತಾರತಮ್ಯೊನು ಅಲಕ್ಕ ದೆತ್ತ್ಪಾಡ್ದೆರ್. ಸಮಾನ ಬೇಲೆಗ್ ಆಂಜೊವು, ಪೊಂಜೊವು, ತೃತೀಯ ಲಿಂಗಿಲು (Transgenders) ಬೊಕ್ಕ ವಿಕಲಚೇತನೆರೆಗ್ ಸಮಾನ ವೇತನ ಕಡ್ಡಾಯ ಮಲ್ತ್ದೆರ್.