Last updated on June 3rd, 2026 at 08:06 am
ಸುಳ್ಯ, ಮೇ 02: ಮೊಬೈಲ್ ತೂವೊರ್ಚಿ ಪನ್ದ್ ಅಪ್ಪೆ ನೆರ್ದ್ ಬುದ್ಧಿಪಾತೆರ ಪನ್ಡಿನೆಕ್ ಪಿಸ್ರ್ಡ್ 16 ವರ್ಸ ಪ್ರಾಯೊದ ಅಪ್ರಾಪ್ತೆ ಆಣ್ ಒರಿ ಇಲ್ಲರ್ದ್ ಪಿದಯಿ ಪೋದು ನಿಗೂಢವಾದ್ ನಾಪತ್ತೆ ಆತಿನ ನಡಕೆ ಸುಳ್ಯ ಕಸಬಾ ಗ್ರಾಮೊದ ಬೋರುಗುಡ್ಡೆ ಪನ್ಪಿನಲ್ಪ ನಡತ್ದ್ಂಡ್.
ನಾಪತ್ತೆ ಆತಿನ ಆಣನ್ ಮೂಲತಃ ಉತ್ತರ ಕನ್ನಡ ಜಿಲ್ಲೆದ ಶಿರಸಿ ನಿವಾಸಿ ಆದಿತ್ತ್ದ್, ಇತ್ತೆ ಸುಳ್ಯದ ಬೋರುಗುಡ್ಡೆಡ್ ಅಪ್ಪೆಅಮ್ಮನ ಒಟ್ಟುಗು ಇತ್ತಿನ ಸೈಯದ್ ಆಲಿ ಸೈಯದ್ ಗೌಸ್ (16) ಪನ್ದ್ ಗುರ್ತ ಪತ್ತ್ದೆರ್. ಈ ಬಗೆಟ್ ಆಣನ ಅಪ್ಪೆ ಸಲ್ಮಾ ಮೇರ್ ಸುಳ್ಯ ಪೊಲೀಸ್ ಸ್ಟೇಶನ್ಡ್ ಅಧಿಕೃತ ಒಯಿಲ್ ಬರೆಪಾದೆರ್. ಸಲ್ಮಾ ಮೇರ್ ಆರೆನ ಕಂಡನೆ ಬೊಕ್ಕ ಮಗೆ ಸೈಯದ್ ಆಲಿ ಸೈಯದ್ ಗೌಸ್ನೊಟ್ಟುಗು ಸುಳ್ಯ ಕಸಬಾ ಗ್ರಾಮೊದ ಬೋರುಗುಡ್ಡೆಡ್ ಒಕ್ಕೆಲ್ ಕುಲ್ಲುದೆರ್. ಮೇ 30, 2026 ತಾನಿ ಕಾಂಡೆ ಆಣ್ ಸೈಯದ್ ಆಲಿ ಮೊಬೈಲ್ ತೂವೊಂದೇ ಕುಲ್ಲುದಿತ್ತೆಗೆ. ಈ ವಿಚಾರೊಡು ಅಪ್ಪೆ ಸಲ್ಮಾ ಮಗಕ್ ನೆರ್ದ್, ಮೊಬೈಲ್ ತೂಪುನ ಉಂತಾಲ ಪನ್ದ್ ಬುದ್ಧಿಪಾತೆರ ಪನ್ತೆರ್. ಇಂದೆರ್ದ್ ಬೆಸರಾಯಿನ ಆಣ್, ಒಂತೆ ಪೊರ್ತು ತೈರ್ದ್ ಏರೆಡಲಾ ಪನಂದೆ ಇಲ್ಲರ್ದ್ ಪೋತೆ.
ಮಗೆ ಏತ್ ಪೊರ್ತಾಂಡಲಾ ಇಲ್ಲಗ್ ಪಿರಬರಂದಿನೆನ್ ತೂದು ಪೋಡಿನ ಅಪ್ಪೆಅಮ್ಮೆ, ಆಯನ ದೋಸ್ತಿಯರ್ಲೆಡ, ಸಂಬಂಧಿಕೆರೆ ಇಲ್ಲಡ್ ಅಂಚೆನೇ ಸುತ್ತಮುತ್ತ ಒರ್ಮೆಲಾ ನಾಡ್ದೆರ್. ಆಂಡ ಆಣನ ಬಗೆಟ್ ಒವ್ವೇ ಒಲವು ತಿಕ್ಕ್ದಿಜಿ. ಅಂಚಾದ್ ಅಪ್ಪೆ ಸಲ್ಮಾ ಸುಳ್ಯ ಪೊಲೀಸ್ ಸ್ಟೇಶನ್ಗ್ ಬತ್ತ್ದ್ ಮಗನ್ ನಾಡ್ದ್ ಕೊರ್ಲೆ ಪನ್ದ್ ಒಯಿಲ್ ಬರೆಪಾದೆರ್. ಇತ್ತೆ ಸುಳ್ಯ ಪೊಲೀಸೆರ್ ಅಪರಾಧ ಕ್ರಮಾಂಕ: 73/2026, ಕಲಂ: 137 (2) BNS 2023 (ಭಾರತೀಯ ನ್ಯಾಯ ಸಂಹಿತೆ) ದ ಅಡಿಟ್ ಪ್ರಕರಣ ದಾಕಲ್ತೊಂದು, ನಾಪತ್ತೆ ಆತಿನ ಆಣನ್ ನಾಡೆರೆ ಜಡ್ತೆ ಮಲ್ತೊಂದುಲ್ಲೆರ್.