Last updated on June 6th, 2026 at 09:02 am
ಕಾಪು, ಜೂ. 06: ಕಿಞ್ಞ ಕಿಞ್ಞ ನೆವನೊಲೆಗ್ ದೈಹಿಕ ಬೊಕ್ಕ ಮಾನಸಿಕ ಹಿಂಸೆ ಕೊರ್ದು, ಬೀಸತ್ತಿಡ್ ಕುತ್ತ್ದ್, ಅಕ್ರಮವಾದ್ ಕೈದ್ ಮಲ್ದಿನತ್ತಂದೆ, ಕೆರ್ಪ ಪನ್ದ್ ಪೋಡಿಕಟ್ಟಾದಿನ ಆರೋಪಡ್ ಒರ್ತಿ ಪೊಂಜೊವುನ ಕಂಡನೆ ಬೊಕ್ಕ ಮೈತ್ದಿನ ಮಿತ್ತ್ ಕಾಪು ಪೊಲೀಸ್ ಸ್ಟೇಶನ್ಡ್ ಕ್ರಿಮಿನಲ್ ಕೇಸ್ ದಾಕಲಾತ್ಂಡ್. ಉದಿಯಾರ್ ನಿವಾಸಿ ಫಿರ್ದೋಸ್ ಬಾನು (44) ಪನ್ಪಿನಾರ್ ಬರೆಪಾದಿನ ಒಯಿಲ್ದ ಪ್ರಕಾರ ಆರೆನ ಕಂಡನೆ ಬೊಕ್ಕ ಮೈತ್ದಿನ ಮಿತ್ತ್ ಪೊಲೀಸೆರ್ ಎಫ್ಐಆರ್ ಪಾಡ್ದೆರ್.
ಫಿರ್ದೋಸ್ ಬಾನು ಮೆರೆನ್ 2000 ದ ಜೂನ್ 25 ತಾನಿ ಮೊಹಮ್ಮದ್ ಆದಿಲ್ ಪನ್ಪಿನಾರೆಗ್ ಮದಿಮೆ ಮಲ್ತ್ ಕೊರ್ದಿತ್ತೆರ್. ಪಿದಯಿ ದೇಶೊಡು ಎ.ಸಿ. ಮೆಕಾನಿಕ್ ಆದಿತ್ತಿನ ಆದಿಲ್, ಆಯೆ ಬೆನ್ದಿನ ಕಾಸ್ನ್ ಮಾತಾ ಅಪ್ಪೆನ ಅಕೌಂಟ್ಗೇ ಪಾಡೋಂದಿತ್ತ್ದ್, ಬೊಡೆದಿನ ಕರ್ಚಿಗ್ ಕಾಸ್ ಕೊರೊಂದಿತ್ತಿಜೆಗೆ. ಮದಿಮೆದ ಸುರುರ್ದಿಂಚಿಲಾ ಮಾಮಿ ಬೊಕ್ಕ ಮೈತ್ದಿ ಕಿಞ್ಞ ಕಿಞ್ಞ ನೆವನೊಲೆಗ್ಲಾ ಫಿರ್ದೋಸ್ ಬಾನುಗ್ ಆಕೊಂದಿತ್ತೆರ್ಗೆ. ಮಾಮಿ ತೀರಿಬೊಕ್ಕ ಇಲ್ಲದ ಮಾತಾ ಜಬದರಿ ಮೈತ್ದಿನ ಕೈಕ್ ಪೋತುಂಡು.
2026ತ ಫೆಬ್ರವರಿ 18 ದಾನಿ ಮೈತ್ದಿ ಫಿರ್ದೋಸ್ ಬಾನು ಡ ಲಡಯಿ ಮಲ್ತ್ದ್ ಬೀಸತ್ತಿ ಪಾಡ್ದಲ್. ಉಂದೆರ್ದಾವರ ಆರೆನ ಎಡತ ಕೈಬಿರೆಲ್ಗ್ ಗಡಿಕುಲಾದಿತ್ತ್ಂಡ್. ಬೊಕ್ಕ ಕಂಡನೆ ಬೊಕ್ಕ ಮೈತ್ದಿ ಕೂಡೊಂದು ಫಿರ್ದೋಸ್ ರೆನ್ ಅಕ್ರಮವಾದ್ ಇಲ್ಲದುಲಯಿ ಪತ್ತ್ರ್ದ್ ಪಾಡ್ದ್ ಹಿಂಸೆ ಕೊರ್ತಿನತ್ತಂದೆ, ಇಲ್ಲಗ್ ಬೀಗ ಪಾಡ್ದ್ ಪೋದಿತ್ತೆರ್. ಆತೇ ಅತ್ತಂದೆ, ಕಂಡನೆ ಆದಿಲ್ ಆಲೆನ ಮೊಬೈಲ್ ಒಯ್ತೊಂದು ಅವೆಟ್ ಇತ್ತಿನ ಮಾತಾ ಡೇಟಾನ್ಲಾ ಡಿಲೀಟ್ ಮಲ್ತ್ದೆಗೆ. ಅವೆನ್ ಪ್ರಶ್ನೆ ಮಲ್ತಿನೆಕ್ ಸಮ ಆಕ್ದ್, ಇಲ್ಲ್ ಬುಡ್ದು ಪೋಯೆರ ಪೋಡಿಕಟ್ಟಾದೆ ಪನ್ದ್ ಒಯಿಲ್ಡ್ ಬರೆಪಾದೆರ್.
ಮದಿಮೆದ ಪೊರ್ತುಡು ಅಪ್ಪೆ ಅಮ್ಮೆ ಪಾಡ್ದಿತ್ತಿನ 40 ಪವನ್ ಬಂಗಾರ್ನ್ ಕಂಡನೆ ಬೊಕ್ಕ ಆಯನ ಇಲ್ಲದಕುಲು ಮಾರ್ದ್ ಸ್ವಂತಗ್ ಗಲಸೊಂದೆರ್ ಪನ್ದ್ ಸಂತ್ರಸ್ತೆದಿ ಒಯಿಲ್ಡ್ ಬರೆಪಾದೆರ್. ಆರೆಗ್ ನಿರಂತರ ಮಾನಸಿಕ, ದೈಹಿಕ ಹಿಂಸೆ ಕೊರ್ದು, ಅಕ್ರಮ ಕೈದ್ಡ್ ದೀದ್ ಪೋಡಿಕಟ್ಟಾದಿನ ಆರೋಪಿಲೆನ ಮಿತ್ತ್ ಕಾಪು ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ದ್, ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.