Last updated on June 5th, 2026 at 03:10 pm
ಬೆದ್ರ, ಜೂ. 05: ರಾಷ್ಟ್ರೀಯ ಪೆರ್ಸಾದಿ 169ದ ಬುಲೆಚ್ಚಿಲ್ದ ಬೇಲೆ ಬಜೀ ಸಾಮಾನ್ಯ ಗುಣಮಟ್ಟೊದವು ಆಯಿನೆರ್ದಾವರ ಮಿಜಾರ್ ದೈಟೆ ಮುಂಗಾರ್ದ ಸುರುತ ಬರ್ಸೊಗೇ ರೋಡ್ದ ಒಂಜಿ ಮೆಯಿ ಬೊಲ್ಲಗ್ ಪೋತುಂಡು.
ಎಚ್ಚ ನೀರ್ ಪರತ್ ಪೋಪುನ ಜಾಗೆಡ್ ಮಲ್ಲ ಮೋರಿ ಮಲ್ಪುನ ಬುಡ್ದು ಬಜೀ ಎಲ್ಯ ಮೋರಿ ಕಟ್ಟ್ದೆರ್. ಅಂಚಾದ್ ಬರ್ಸದ ನೀರ್ ಸಮ ಪೋಯೆರ ಆವಂದೆ ಸಾದಿಬರಿತ ಜಲ್ಲಿ ಬೊಕ್ಕ ಕಲ್ಲ್ ಮಾತಾ ಲಕ್ಕೊಂದು ಪೋದಿತ್ತ್ದ್ ಸಾದಿ ಜರಿಯೆರ ನೆವನ ಆತ್ಂಡ್.
ಡಾಮಾರ್ದ ಅಡಿತ ಮಣ್ಣ್ ಕೊಚ್ಚಿದ್ ಪೋತಿನೆರ್ದಾವರ ಡಾಮಾರ್ಲಾ ಬೊಲ್ಲಗ್ ಪೋದಿತ್ತ್ದ್ ಸಾದಿ ಉಂಬರೊಡು ದಿಂಜಿದ್ ಪೋತುಂಡು. ಮಲ್ಲ ಗಾಡಿಲುಲಾ ಈ ಸಾದಿಯೆ ಪೋಪಿನೆರ್ದಾವರ ನನಲಾತ್ ಜರಿಪುನ ಪೋಡಿಗೆ ಉಂಡು. ಇಂಚೆನೇ ಮಣ್ಣ್ ಕರವೊಂದು ಪೋಂಡ ಇಡೀಯ ರೋಡ್ಗ್ ರೋಡೇ ಮಾಯ ಆಂಡಲಾ ಸೋದ್ಯ ಇಜ್ಜಿ.
ಅಂಚಾದ್ ಈ ಬೇಲೆ ಮಲ್ತೊಂದುಪ್ಪುನ ಡಿಬಿಎಲ್ ಕಂಪೆನಿದ ವಿರುದ್ಧ ಸಾರ್ವಜನಿಕೆರ್ ಪಿಸ್ರಾದಿತ್ತ್ದ್, ಮರ್ಯಾಲೊಡು ನಡಪುನ ಅನಾಹುತೊಲೆನ್ ತಡೆಯೆರ ಅಧಿಕಾರಿಲು ಕ್ರಮ ಗೆತೊನೊಡು ಪನ್ದ್ ಆಗ್ರಹ ಮಲ್ತ್ದೆರ್.