Last updated on October 27th, 2022 at 01:18 pm
ಇಂಚಿಪ್ಪೊಗು ರಿಷಿ ಸುನಾಕ್ ಯು.ಕೆ(ಇಂಗ್ಲೆಂಡ್) ದ ಪ್ರಧಾನಿ ಆತೆರ್. ಭಾರತೊ ಮೂಲೊದ ಮೇರ್ ಭಾರತೊನು ಒಂಜಿ ಪೊರ್ತುಡ್ ಆಲ್ಯೊಂದಿತ್ತಿನಕಲೆನ್ ಆಲ್ಯುನ ಪಟ್ಟೊಗು ಏರಿನವು ಮಾತ ಭಾರತೀಯೆರೆಗ್ ಬಾರಿ ಕುಸಿ ಬೊಕ್ಕ ಪೆರ್ಮೆದ ಇಸಯೊ.
ರಿಷಿ ಸುನಾಕ್ ಅತ್ತಂದೆ ಸುಮಾರ್ 200 ಭಾರತೊ ಮೂಲೊದ ನಾಯಕೆರ್ ಇಸ್ವೊದ ಬೇತೆ ಬೇತೆ ದೇಸೊಲೆನ ರಾಜಕಾರಣೊಡು ಮಲ್ಲ ಮಲ್ಲ ಕೈ ಇತ್ತಿನಕುಲಾದುಲ್ಲೆರ್. ಅವೆಟ್ಲಾ 60 ಜನ 15 ದೇಸೊಲೆನ ಕ್ಯಾಬಿನೆಟ್ ಲೆವೆಲ್‌ದ ಪಟ್ಟೊಡುಲ್ಲೆರ್.
ಇನಿ ನಮ ರಿಷಿ ಸುನಾಕ್ ಸೇರ್ದ್ 9 ಜನ ಭಾರತ ಮೂಲೊದ ಬೇತೆ ದೇಶೊಲೆನ ಗುರ್ಕಾರ್ಮೆದ ಪಟ್ಟೊಡುಪ್ಪಿನಕ್ಲೆನ ಬಗ್ಗೆ ತೆರಿಯೊನುಗ.
- ಕಮಲಾ ಹ್ಯಾರಿಸ್
ಕಮಲಾದೇವಿ ಹ್ಯಾರಿಸ್ ಯುಎಸ್‌ಎ ದ ಸುರೂತ ಪೊಂಜೊವು ಒತ್ತು ಗುರ್ಕಾರ್ದಿ. ಮೆರೆನ ಅಪ್ಪೆ ತಮಿಳ್‌ನಾಡ್‌ದಾರ್. ಕಮಲಾ ಹ್ಯಾರಿಸ್ ಅಪಗಪಗ ತನ್ನ ಜೀವನೊಡು ಭಾರತೊರ್ದ್ ಕಲ್ತಿನ ಪಾಠ ಮಸ್ತ್ ಉಂಡುಂದ್ ಪನೊಂದುಪ್ಪುವೆರ್.
- ಮಹ್ಮದ್ ಇರ್ಫಾನ್ ಆಲಿ
ಇಂಡೋ-ಗಯಾನೀ ಕುಟುಮೊಡು ಡೆಮರಾರಾಡ್ ಪುಟ್ಟುದಿನ ಮೇರ್ ಗಯಾನಾ ದೇಸೊದ 9ನೇ ಅಧ್ಯಕ್ಷೆರಾದ್ 2020ರ್ದ್ ಬೆನೊಂದುಲ್ಲೆರ್.
- ಆ್ಯಂಟೋನಿಯೋ ಕೋಸ್ಟಾ
ಆ್ಯಂಟೋನಿಯೋ ಲೂಯೀಸ್ ಸ್ಯಾಂಟೋಸ್ ಡ ಕೋಸ್ಟಾ 2015ರ್ದ್ ಪೋರ್ಚುಗಲ್‌ದ ಪ್ರಧಾನಮಂತಿರ್ಲಾದುಲ್ಲೆರ್.
ಮೇರ್ ಗೋವಾ ಮೂಲೊದಾರ್. ಮೆರೆಗ್ ‘ಬಾಬುಷ್’ ಪನ್ಪಿ ಕೊಂಕಣಿ ಅಡ್ಡಪುದರ್‌ಲಾ ಉಂಡು.
- ಚಾನ್ ಸಂತೋಖಿ(ಚಂದ್ರಿಕಾಪ್ರಸಾದ್ ಸಂತೋಖಿ)
2020ರ್ದ್ ಸುರಿನಾಮ್ ದೇಸೊದ ರಾಷ್ಟ್ರಪತಿಲಾದುಪ್ಪುನ ‘ಚಾನ್’ ಸಂತೋಖಿ ಇಂಡೋ-ಸುರಿನಾಮೀ ಹಿಂದೂ ಕುಟುಮೊಗು ಸೇರ್ದಿನಾರ್.
ಮೇರ್ ಪ್ರಮಾಣವಚನೊನು ಸಂಸ್ಕೃತ ಬಾಸೆಡ್ ದೆತೊಂದಿತ್ತೆರ್.
- ಪ್ರವಿಂದ್ ಜಗ್ನಾಥ್
ಉತ್ತರ ಪ್ರದೇಶೊದ ಮೂಲೊದಾರಾಯಿನ ಪ್ರವಿಂದ್ ಜಗ್ನಾಥ್ 2017ರ್ದ್ ಮಾರಿಷಸ್ ದೇಸೊದ ಪ್ರಧಾನ ಮಂತಿರ್ಲಾದುಲ್ಲೆರ್.
ಮಾರಿಷಸ್ ದೇಸೊಡ್ ಭಾರತ ಮೂಲೊದ ಜನ ಎಚ್ಚಾದ್ ತೂಯೆರ ತಿಕ್ಕುವೆರ್.
- ಲಿಯೋ ವರಡ್ಕರ್
ಮುಂಬೈ ಮೂಲೊದ ಮೇರ್ ಐರ್ಲೆಂಡ್ ಸರ್ಕಾರೊಡು ರಡ್ಡನೇ ಮಲ್ಲ ತಾನೊಡು ಉಲ್ಲೆರ್. ಉಪಪ್ರಧಾನಿ ತಾನೋ ಅತ್ತಂದೆ ಮೇರ್ ವೈವಾಟ್ ಬೊಕ್ಕ ಬೇಲೆದ ಮಂತಿರ್ಲಾ ಆದುಲ್ಲೆರ್. ನೆಕ್ಕ್ ದುಂಬು ರಕ್ಷಣಾ ಮಂತ್ರಿಲಾ ಆದಿತ್ತೆರ್.
- ಪೃಥ್ವಿರಾಜ್‌ಸಿಂಗ್ ರೂಪನ್
ಭಾರತ ಮೂಲೊದಾರ್ ಆಯಿನ ಮೇರ್ 2019ರ್ದ್ ಮಾರಿಷಸ್ ದೇಸೊದ ರಾಷ್ಟ್ರಪತಿ ಆದುಲ್ಲೆರ್.
- ಹಲಿಮಾ ಯಾಕೂಬ್
2017ರ್ದ್ ಸಿಂಗಾಪುರ್‌ದ ರಾಷ್ಟ್ರಪತಿ ಆದಿಪ್ಪುನ ಮೇರೆನ ಅಮ್ಮೆರ್ ಒರಿ ಭಾರತೀಯೆ.
- ರಿಷಿ ಸುನಾಕ್
ಯುನೈಟೆಡ್ ಕಿಂಗ್ಡಮ್ (ಯುಕೆ) ದ ಪೊಸ ಪ್ರಧಾನಿಲಾದ್ ಅಜತ್ ಬೈದಿನ ರಿಷಿ ಸುನಾಕ್ ಭಾರತ ಮೂಲೊದಾರ್. ಮೇರ್ ಇನ್ಫೋಸಿಸ್ ನಾರಾಯಣಮೂರ್ತಿಲೆನ ಮಗಲ್ ಅಕ್ಷತಾ ಮೂರ್ತಿ ಮೆರೆನ್ ಮದಿಮೆ ಆತೆರ್.