Last updated on June 15th, 2026 at 04:43 pm
ಪುತ್ತೂರ್, ಜೂನ್ 15: ಪುತ್ತೂರ್ದ ಸ್ನೇಹ ಸಂಗಮ ಆಟೋ ಚಾಲಕ-ಮಾಲಕೆರೆ ಸಂಘೊದ ಪೆರಿಯ ಪದುಕೆ ಅಂಚೆನೇ ಸಕ್ರಿಯ ಕಾರ್ಯಕರ್ತೆರಾಯಿನ ಮಹಾಬಲ ರೈ ಇರ್ದೆ ಮೆರೆಗ್ ಸಂಘೊದ ತುರ್ತು ಪರಿಹಾರ ನಿಧಿರ್ದ್ ಪಣವುದ ಬೆರಿಸಾಯ ಮಲ್ತೆರ್.
ಮಹಾಬಲ ರೈ ಮೇರ್ ಕರಿನ 15-16 ವರ್ಸೊರ್ದಿಂಚಿ ಸಂಘೊದ ಬೇಲೆಲೆಡ್ ಸಕ್ರಿಯೆರಾದ್ ಪಾಲ್ಪಡೆಯೊಂದಿತ್ತ್ದ್, ಇತ್ತೆ ಪುತ್ತೂರ್ ಮಾರ್ಕೆಟ್ದ ಕೈತಲ್ ಲೈನ್ ಬಾಡಾಯಿಗ್ ಉಂತುವೆರ್. ಇಂಚಿಪ ಆರೆನ ಬಾಯಿದ ಉಲಮೆಯಿತ ಕೂಲಿಡ್ ಅಸಹಜವಾದ್ ಬುಲೆಯೊಂದಿತ್ತಿನ ಮಾಸದ ಗಡ್ಡೆರ್ದ್ ಆರೋಗ್ಯ ಸಮಸ್ಯೆ ಬತ್ತ್ದ್, ಕರಿನ ತಿಂಗೊಲು ಆಪರೇಶನ್ ಆದಿತ್ತ್ಂಡ್.
ಡಾಕ್ಟ್ರೆನ ಸಲಹೆ ಬೊಕ್ಕ ಪರೀಕ್ಷೆಲೆನ ಪ್ರಕಾರ, ಈ ಸಮಸ್ಯೆ ಕ್ಯಾನ್ಸರ್ದ ನಿಲವುಗು ಎತ್ತ್ದ್ಂಡ್ ಪನ್ದ್ ತೆರಿದ್ ಬೈದಿತ್ತ್ದ್, ಆಪರೇಷನ್ ಆಯಿ ಬೊಕ್ಕ ಆರ್ ಇಲ್ಲಡೇ ವಿಶ್ರಾಂತಿ ಗೆತೊನೊಂದುಲ್ಲೆರ್.
ಅಂಚಾದ್ ಸಂಘೊದ ಅಧ್ಯಕ್ಷೆರೆ ಸೂಚನೆದ ಪ್ರಕಾರ ಜೂನ್ 14 ತಾನಿ ಮಧ್ಯಾಹ್ನ 3 ಗಂಟೆಗ್ ಸಂಘೊದ ಪದಾಧಿಕಾರಿಲು ಬೊಕ್ಕ ಪದುಕೆರ್ ಮಹಾಬಲ ರೈಕ್ಲೆನ ಇಲ್ಲಗ್ ಪೋದು ಆರೋಗ್ಯ ವಿಚಾರಣೆ ಮಲ್ತೆರ್. ಈ ಪೊರ್ತುಡು ಸ್ನೇಹ ಸಂಗಮೊದ ತುರ್ತು ಪರಿಹಾರ ನಿಧಿರ್ದ್ ₹5,000 ಕಾಸ್ನ್ ಪಣವುದ ಬೆರಿಸಾಯೊದ ರೂಪೊಡು ಆರೆಗ್ ಕೊರ್ಯೆರ್.
ಈ ಪೊರ್ತುಡು ಸಂಘೊದ ಅಧ್ಯಕ್ಷೆ ತಾರಾನಾಥ ಗೌಡ ಬನ್ನೂರು, ಪ್ರಧಾನ ಕಾರ್ಯದರ್ಶಿ ಹರೀಶ್ ಕುಮಾರ್ ತೆಂಕಿಲ, ಪದಾಧಿಕಾರಿಲಾಯಿನ ಅರವಿಂದ್ ಪೆರಿಗೇರಿ, ಚನಿಯಪ್ಪ ಉಪ್ಪಳ್ಳಿಗೆ ಬೊಕ್ ಲೋಕೇಶ್ ತೆಂಕಿಲ ಒತ್ತುಪಾಲ್ ಇತ್ತೆರ್.
ಸಂಘೊದ ಈ ಮಾನವೀಯ ಬೇಲೆನ್ ಪದುಕೆರ್ ಪುಗರ್ದ್, ಮಹಾಬಲ ರೈ ಮೇರ್ ಬೇಗೊಡು ಉಸಾರಾದ್ ಕುಡ ಬೇಲೆಗ್ ಪೋಪಿಲೆಕ ಆವಡ್ ಪನ್ದ್ ಬಾಮಿತೆರ್.