Last updated on June 17th, 2026 at 08:32 am
ಬೋಲ್ತೇರ್, ಜೂ. 16: ಧರ್ಮಸ್ಥಳ ಗ್ರಾಮೊದ ವಿವಾದಿತ ಪುನ ಕೌಂತಿನ ಪ್ರಕರಣೊದ ಜಡ್ತೆ ಮಲ್ತೊಂದುಪ್ಪುನ ವಿಶೇಷ ಜಡ್ತೆ ಕೂಟೊಡ ಅಧಿಕಾರಿಲು ಪೋವೊಂದಿತ್ತಿನ ಇನ್ನೋವಾ ಕಾರ್ ಚಾರ್ಮಾಡಿ ಘಾಟಿಡ್ ಅಂಕೆ ತತ್ತ್ದ್ ಕಬ್ಬೆ ಬೂರ್ದಿನ ನಡಕೆ ಅಂಗಾರೆ ನಡತ್ದ್ಂಡ್.
ನಡಕೆಡ್ ಎಸ್ಐಟಿ ಎಸ್ಪಿ ಸಿ.ಎ. ಸೈಮನ್, ಇನ್ಸ್ಪೆಕ್ಟರ್ ಕುಸುಮಾಧರ್, ಪೊಲೀಸ್ ಸಿಬ್ಬಂದಿ (ಪಿಸಿ) ಮಂಜುನಾಥ್ ಬೊಕ್ಕ ಕಾರ್ದ ಡ್ರೈವರ್ ಸೇರ್ದ್ ಒಟ್ಟು ನಾಲ್ವೆರೆಗ್ ಗಡಿಕುಲಾತ.
ಧರ್ಮಸ್ಥಳ ಪ್ರಕರಣೊದ ಜಡ್ತೆಗ್ ಸಂಬಂಧಿತ್ದ್ ಬೋಲ್ತೇರ್ದ ಎಸ್ಐಟಿ ಕಚೇರಿರ್ದ್ ಅಧಿಕಾರಿಲೆನ ಕೂಟ ಚಿಕ್ಕಮಗಳೂರ್ಗ್ ಪಿದಡ್ದಿತ್ತ್ಂಡ್. ಚಿಕ್ಕಮಗಳೂರ್ ಜಿಲ್ಲಾ ಎಸ್ಪಿ ಬೊಕ್ಕ ಎಸ್ಐಟಿ ತನಿಖಾಧಿಕಾರಿ ಜಿತೇಂದ್ರ ಕುಮಾರ್ ದಯಾಮ ಮೆರೆನ್ ತಿಕ್ಕ್ದ್, ಜಡ್ತೆದ ಪ್ರಗತಿದ ಬಗೆಟ್ ಚರ್ಚೆ ಮಲ್ಪೆರೆ ಅಧಿಕಾರಿಲು ಪೋವೊಂದಿತ್ತೆರ್ಗೆ.
ಈ ಪೊರ್ತುಡು ಚಾರ್ಮಾಡಿ ಘಾಟಿದ ಸಾದಿದ ತಿರ್ಗೆಲ್ಡ್ ಡ್ರೈವರ್ನ ಅಂಕೆ ತತ್ತಿನ ಇನ್ನೋವಾ ಕಾರ್ ಸಾದಿಡೇ ಕಬ್ಬೆ ಬೂರ್ದುಂಡು. ಉಲಯಿ ಇತ್ತಿನ ಅಧಿಕಾರಿಲೆಗ್ ಗಡಿಕುಲಾತ. ಕಾರ್ ಕಬ್ಬೆ ಬೂರಿನೆಟ್ಟಿಗೇ ಕೈತಲ್ದಕುಲು ಬೊಕ್ಕ ಬೇತೆ ಗಾಡಿದಕುಲು ಬತ್ತ್ದ್, ಕಾರ್ಡ್ ಇತ್ತಿನಕಲೆನ್ ಪಿದಯಿ ದೆತ್ತ್ದೆರ್.
ಗಡಿಕುಲಾತಿನಕಲೆನ್ ಅಪಗನೇ ಕೈತಲ್ದ ಆಸ್ಪತ್ರೆಗ್ ದಾಕಲ್ತ್ದಿತ್ತ್ದ್, ಪ್ರಾಣಾಪಾಯೊರ್ದು ಬಚಾವಾತೆರ್ ಪನ್ದ್ ತೆರಿದ್ ಬೈದ್ಂಡ್. ಜಾಗೆಗ್ ಕೈತಲ್ದ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.