Last updated on June 18th, 2026 at 10:53 am
ಮಡಿಕೇರಿ, ಜೂ. 18: ಅಕ್ರಮವಾದ್ ನಕ್ಷತ್ರ ಏಮೆನ್ ಮಾರ್ಯೆರ ತೂವೊಂದಿತ್ತಿನ ಕಾಸ್ರೋಡ್ ಮೂಲೊದ ಇರ್ವೆರೆನ್ ಮಡಿಕೇರಿದ ಸಿಐಡಿ ಅರಣ್ಯ ಸಂಚಾರ ದಳೊದ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕಾಸ್ರೋಡ್ದ ಮಡಿ ನಿವಾಸಿ ಶ್ರೀಧರನ್ ಸಿ.ಕೆ. (70) ಬೊಕ್ಕ ವಿಷ್ಣು ಆಚಾರ್ಯ (68) ಕೈದಾತಿನ ಆರೋಪಿಲು. ಮೊಕಲೆನ ಕೈರ್ದ್ ಒಂಜಿ ನಕ್ಷತ್ರ ಏಮೆನ್ ಉಲಕೈ ಮಲ್ತಿತ್ತ್ದ್, ಆರೋಪಿಲೆನ್ ನ್ಯಾಯಾಂಗ ಕೈದ್ಗ್ ಒಪ್ಯಾದೆರ್.
ಪೇಂಟೆದ ಕನ್ನಂಡ ಪಡುಬೀರ ಸರ್ಕಲ್ದ ಕೈತಲ್ ಇಪ್ಪುನ ಬಸ್ ಉಂತಡೆಡ್ ಇರ್ವೆರ್ ಆಂಜೊವುಲು ನಕ್ಷತ್ರ ಏಮೆನ್ ಮಾರ್ಯೆರ ಕಾತೊಂದುಲ್ಲೆರ್ ಪನ್ಪಿ ಪತ್ತ ಒಲವು ಪೊಲೀಸೆರೆಗ್ ತಿಕ್ಕ್ದ್ಂಡ್. ಅಪಗನೇ ಕಾರ್ಯಪ್ರವೃತ್ತೆರಾಯಿನ ಅರಣ್ಯ ಸಂಚಾರ ದಳೊದ ಕೂಟ ದಾಳಿ ಮಲ್ತ್ದ್ ಆರೋಪಿಲೆನ್ ರೆಡ್ಹ್ಯಾಂಡ್ ಆದ್ ಪತ್ತ್ದೆರ್.
ಸಿಐಡಿ ಅರಣ್ಯ ಘಟಕೊದ ಡಿಐಜಿ ಸಂಗೀತಾ ಜಿ ಬೊಕ್ಕ ಎಸ್ಪಿ ಪವನ್ ನೆಟ್ಟೂರು ಮೊಕಲೆನ ಮಾರ್ಗದರ್ಶನೊಡು ಈ ಯಶಸ್ವಿ ಕಾರ್ಯಾಚರಣೆ ನಡತ್ಂಡ್. ಕೂಟೊಡು ಪೊಲೀಸ್ ಉಪನಿರೀಕ್ಷಕೆ ಶಿವಶಂಕರ್, ಸಿಬ್ಬಂದಿಲಾಯಿನ ಉಮೇಶ್ ಎನ್.ಕೆ., ಶನಂತ ಕೆ.ಪಿ, ದಿವ್ಯಶ್ರೀ ಎಚ್. ಎಸ್. ಬೊಕ್ಕ ಸ್ವಾಮಿ ಎಂ. ಪಾಲ್ಪಡೆದಿತ್ತೆರ್.