Last updated on June 20th, 2026 at 05:28 am
ಬೆಂಗಳೂರ್, ಜೂ. 20: ನಡತೊಂದು ಪೋವೊಂದಿತ್ತಿನ ಒರಿಯನ ಮೊಬೈಲ್ ಫೋನ್ನ್ ಒಯ್ತ್ದ್ ಸ್ಕೂಟರ್ಡ್ ಪದ್ರಾಡಾಯೆರ ತೂತಿನ ಕಲ್ವೆ, ಸಾರ್ವಜನಿಕೆರೆರ್ದ್ ತಪ್ಪಾಯೆರ ಬಲಿಪುನಗ ಫುಟ್ಪಾತ್ಡೇ ಕುಸ್ಕ್ದ್ ಬೂರ್ದು ತೀರ್ದಿನ ಅಪರೂಪದ ನಡಪು ಬೆಂಗಳೂರ್ದ ಕಬ್ಬನ್ಪೇಂಟೆ ಕೈತಲ್ ನಡತಿತ್ತ್ದ್, ಒಂತೆ ಕಡೆಸ್ಸ್ದ್ ಬೊಲ್ಪುಗು ಬೈದ್ಂಡ್.
ತೀರ್ದಿನ ಕಲ್ವನ್ ಜುನೈದ್ ಪನ್ದ್ ಗುರ್ತ ಪತ್ತ್ದೆರ್. ನಡಪುಗು ಸಂಬಂಧಿತ್ದ್ ಕುಡೊರಿ ಆರೋಪಿ ಅರ್ಬಾಜ್ ಪನ್ಪಿನಾಯನ್ ಹಲಸೂರು ಗೇಟ್ ಪೊಲೀಸೆರ್ ಉಲಕೈ ಮಲ್ತ್ದ್ ಜಡ್ತೆ ಮಲ್ತೊಂದುಲ್ಲೆರ್.
ಮೇ 15 ತ ಬಯ್ಯ ಕಬ್ಬನ್ಪೇಂಟೆದ 14ನೇ ಕ್ರಾಸ್ಡ್ ಒರಿ ಮೊಬೈಲ್ ತೂವೊಂದು ನಡತೊಂದು ಪೋವೊಂದಿತ್ತೆರ್. ಈ ಪೊರ್ತುಡು ಸ್ಕೂಟರ್ಡ್ ಬತ್ತಿನ ಜುನೈದ್ ಬೊಕ್ಕ ಅರ್ಬಾಜ್ ರಪಕ್ಕ ಆ ಜನತ ಕೈಟ್ ಇತ್ತಿನ ಫೋನ್ ಒಯ್ತ್ದ್ ಬೀಸೊಡೇ ಪದ್ರಾಡಾಯೆರ ತೂತೆರ್. ಅಪಗನೇ ಸಂತ್ರಸ್ತೆ ಆಂಜೊವು “ಕಲ್ವೆರ್.. ಕಲ್ವೆರ್..” ಪನ್ದ್ ಜೋರು ಕಲ್ಕ್ದೆರ್.
ಈ ಕಲ್ಕಟಿಗೆ ಕೇನ್ದ್ ಎದುರುರ್ದ್ ಬರೊಂದಿತ್ತಿನ ಕಾರ್ಮಿಕೆ ಒರಿ, ಮಂಡೆಕರ್ಚಿ ಮಲ್ತ್ದ್ ಆರ್ ತುಂಬೊಂದಿತ್ತಿನ ದಿನ್ನೊದ ಕಟ್ಟ್ನ್ ಬೀಸ ಬರೊಂದಿತ್ತಿನ ಕಲ್ವೆರೆ ಸ್ಕೂಟರ್ದ ಮಿತ್ತ್ಗೇ ದಕ್ಕ್ದೆರ್. ಕಟ್ಟ್ ಬೂರ್ನ ಬರಸ್ಗ್ ಅಂಕೆ ತತ್ತಿನ ಕಲ್ವೆರಿರ್ವೆರ್ಲಾ ಸ್ಕೂಟರ್ದೊಟ್ಟುಗು ಬೂರ್ದೆರ್. ಸುತ್ತಮುತ್ತದ ಸಾರ್ವಜನಿಕೆರ್ ಅಕ್ಲೆನ್ ಪತ್ತೆರ ಬಲಿತೊಂದು ಬರ್ಪಿನೆನ್ ತೂದು ಪೋಡಿನ ಕಲ್ವೆರ್, ಅಕುಲು ಕನ್ಡಿನ ಮೊಬೈಲ್ ಬೊಕ್ಕ ಅಕ್ಲೆನನೇ ಸ್ಕೂಟರ್ನ್ ಅಲ್ಪನೇ ಬುಡ್ದು ಬಲ್ಪೆರ ಪತ್ತ್ದೆರ್. ಈ ಇಡೀ ದೃಶ್ಯ ಸಿಸಿಟಿವಿಡ್ ಕೈದಾತ್ಂಡ್.
ಆಂಡ, ಸಾರ್ವಜನಿಕೆರೆ ಕೈಕ್ ತಿಕ್ಯೆರ ಬಲ್ಲಿ ಪನ್ದ್ ಪೋಡಿದ್ ಬೀಸ ಪಾರುನ ಪೊರ್ತುಡು ಜುನೈದ್ ಬಚ್ಚಿದ್ ಫುಟ್ಪಾತ್ಡ್ ಕುಲ್ಲುದೆ. ಕಲ್ಲಿನೇ ಆಯೆ ಅಲ್ಪನೇ ಮತಿ ಕಡಿದ್ ಬೂರ್ದು ತೀರ್ದೆ. ತೀರ್ದಿನ ಜುನೈದ್ಗ್ ದುಂಬುರ್ದೇ ಹೃದಯ ಸಂಬಂಧಿ ಸಮಸ್ಯೆ ಇತ್ತ್ಂಡ್ ಪನ್ದ್ ಪೊಲೀಸೆರೆ ಪ್ರಾಥಮಿಕ ಜಡ್ತೆಡ್ ತೆರಿದ್ ಬೈದ್ಂಡ್.
ನಡಪುಗು ಸಂಬಂಧಿತ್ದ್ ಹಲಸೂರು ಗೇಟ್ ಪೊಲೀಸ್ ಸ್ಟೇಶನ್ಡ್ ಅಸಹಜ ಸಾವು ಪ್ರಕರಣ ದಾಕಲಾದಿತ್ತ್ದ್, ದೆಂಗ್ತಪ್ಪಾದಿತ್ತಿನ ಕುಡೊರಿ ಆರೋಪಿನ್ ಪೊಲೀಸೆರ್ ಪತ್ತ್ದೆರ್.