Last updated on June 20th, 2026 at 02:20 pm
ಕುಡ್ಲ, ಜೂ. 20: ಕಡಲ ಕರೆತ ಜಿಲ್ಲೆಲೆಡ್ ಪ್ರವಾಸೋದ್ಯಮ ಬುಲೆಚ್ಚಿಲ್ದ ಬಗೆಟ್ ಕೋಡೆ ವಿಧಾನಸೌಧೊಡು ಸಿಎಂ ಡಿಕೆ ಶಿವಕುಮಾರ್ ಮುತಾಲಿಕೆಡ್ ಪಾಕ ಗಣ್ಯೆರ್ ಬೊಕ್ಕ ಪೆರಿಯ ಅಧಿಕಾರಿಲೆನ ಇನಯ ನಡತ್ಂಡ್. ಬೇಗೊಡೇ ಕುಡ್ಲಡ್ ಸಚಿವ ಸಂಪುಟ ನಡಪಾಯೆರ ಚಿಂತನೆ ನಡತೊಂದಿತ್ತ್ದ್, ಈ ಪೊರ್ತುಡು ಕಡಲ ಕರೆ ಬೊಕ್ಕ ಮಲೆನಾಡ್ ಪ್ರವಾಸೋದ್ಯಮ ಅಭಿವೃದ್ಧಿಗ್ ಬೇತೆನೇ ನೀತಿದ ಬಗೆಟ್ ಸಚಿವ ಸಂಪುಟ ಇನಯೊಡು ಒತ್ತೊನುನ ಸಾಧ್ಯತೆ ಉಂಡು.
ಕಡೀರ ಸರ್ತಿ ಕರಾವಳಿ ನೀತಿಗ್ ಸರ್ಕಾರ ಚಿಂತನೆ
ಇಂದೇ ಕಡೀರ ಸರ್ತಿ ಕರಾವಳಿ ನೀತಿಗ್ ಸರ್ಕಾರ ಚಿಂತನೆ ಮಲ್ದ್ಂಡ್. ಅಂಚೆನೇ ಕರಾವಳಿ ಆಪರೇಷನ್ ಬೊಕ್ಕ ಬ್ಯುಸಿನೆಸ್ ಎಂಚ ಇಪ್ಪೊಡು ಪನ್ಪಿ ಬಗೆಟ್ಲಾ ಚಿಂತನೆ ಆತ್ಂಡ್. ಗೋವಾಡ್ ಕರಾವಳಿ ರಿಲ್ಯಾಕ್ಸೇಶನ್ ಉಂಡು. ಆಂಡ ಕರ್ನಾಟಕೊದ ಕರಾವಳಿಡ್ ರಿಲ್ಯಾಕ್ಷನ್ ಟೈಟ್ ಉಂಡು. ಅಂಚಾದ್ ಕೇಂದ್ರೊಗು ಸಿಎಂ ಡಿಕೆ ಶಿವಕುಮಾರ್ ನಿಯೋಗರ್ದ್ ಬಿನ್ನಪು ಮಲ್ಪುನ ಬಗೆಟ್ ಪಾತೆರಕತೆ ಆತ್ಂಡ್. ಕರಾವಳಿ ಭಾಗೊಡು ಶೂಟಿಂಗ್ ಪ್ರಚಾರ ಮಲ್ಪರೆಲಾ ತೀರ್ಮಾನ ಮಲ್ತ್ದೆರ್.
ಇನಯೊಡು ಪಾತೆರ್ನ ಸಿಎಂ ಡಿಕೆ ಶಿವಕುಮಾರ್, ಕರ್ನಾಟಕೊನು ಜಾಗತಿಕ ಮಟ್ಟೊದ ಪ್ರಮುಖ ಕರಾವಳಿ ಪ್ರವಾಸಿ ತಾಣ ಮಲ್ಪುನ ಉದ್ದೇಶೊಡು, ವಿಶ್ವದರ್ಜೆದ ಸುಸ್ಥಿರ ಪ್ರವಾಸೋದ್ಯಮ ಮೂಲಸೌಕರ್ಯೊಲೆನ್ ಬುಲೆಪಾವುನ ಅಂಚೆನೇ ಕರಾವಳಿ ಕರ್ನಾಟಕೊದ ಶ್ರೀಮಂತ ಸಾಂಸ್ಕೃತಿಕ ಬೊಕ್ಕ ನೈಸರ್ಗಿಕ ಪೊರ್ಲುನು ಲೋಕೊಗು ತೆರಿಪಾವುನ ಮುಕೇನ ಪ್ರವಾಸೋದ್ಯಮನ್ ನನಲಾತ್ ಗಟ್ಟಿ ಮಲ್ಪುನ ಎಂಕ್ಲೆನ ಮುಖ್ಯ ಈಡ್ ಪನ್ದ್ ಪನ್ಡೆರ್.
ಕುಡ್ಲಡ್ ಕ್ಯಾಬಿನೆಟ್ ಮಲ್ಪುವ. ಅವೆತ ಉಲಯಿ ತಾಂತ್ರಿಕ ಸಮಸ್ಯೆಲೆಗ್ ಪಿರಿಕಟ್ಟ್ ಆವೊಡು. ಸಿಆರ್ಝಡ್ ಬೊಕ್ಕ ಅರಣ್ಯ ಇಲಾಖೆರ್ದ್ ಆವೊಂದುಪ್ಪುನ ತಾಂತ್ರಿಕ, ತಕರಾರ್ಲೆನ ಬಗೆಟ್ 15 ರ್ದ್ 20 ದಿನೊತುಲಯಿ ಸಮಸ್ಯೆಲು ಬೊಕ್ಕ ಪಿರಿಕಟ್ಟ್ದ ವರದಿ ರೆಡಿ ಮಲ್ಪೆರೆ ಅಧಿಕಾರಿಲೆಗ್ ಸಿಎಂ ಡಿಕೆ ಶಿವಕುಮಾರ್ ಸೂಚನೆ ಕೊರ್ತೆರ್.