Last updated on June 30th, 2026 at 11:07 am
ಬೆಂಗಳೂರ್, ಜೂ. 30: ಭಾರತೊದ ಚುನಾವಣಾ ಆಯೋಗ ಕರ್ನಾಟಕೊಡು ಇನಿರ್ದ್ 1 ತಿಂಗೊಲು ಮತದಾರೆರೆ ಪಟ್ಟಿದ ವಿಶೇಷ ತೀವ್ರ ಪರಿಷ್ಕರಣೆ(ಎಸ್ಐಆರ್) ಮಲ್ಪರೆ ಉಂಡು. ಇತ್ತೆಗ್ ಮ್ಯಾಪಿಂಗ್ ಮುಗಿದಿತ್ತ್ದ್, ಚುನಾವಣಾಧಿಕಾರಿಲು, ಬಿಎಲ್ಓ ನಕುಲು ಇಲ್ಲ್ ಇಲ್ಲಗ್ ಬರ್ಯೆರೆ ಉಲ್ಲೆರ್.
ರಾಜ್ಯೊಡು 91.61% ಮ್ಯಾಪಿಂಗ್ ಆದಿತ್ತ್ದ್, 5,54,32,314 ಮತದಾರೆರೆಡ್ 5,07,79,810 ಮತದಾರೆರೆನ ಮ್ಯಾಪಿಂಗ್ ನಡತ್ದ್ಂಡ್. 46,52,504 ಮತದಾರೆರೆನ ಮ್ಯಾಪಿಂಗ್ ಆವೊಡಾತೆ. ಈ 5.55 ಕೋಟಿ ಮತದಾರೆರೆಡ್ ಅಸಲಿ ಏರ್? ನಕಲಿ ಏರ್? ಪನ್ಪಿನೆನ್ ಪರಿಶೀಲನೆ ಮಲ್ಪೆರ್.
ನಕಲಿ, ಅನರ್ಹ ಮತದಾರೆರೆನ್ ಪಟ್ಟಿರ್ದ್ ದೆಪ್ಪೆರೆ ಉಂಡು. ಮತದಾರೆರೆಅ ಅರ್ಜಿ ದಿಂಜಾದ್ ಅರ್ಜಿಗ್ ಸೈನ್ ಪಾಡ್ದ್ ಕೆಲ ದಾಕಲೆಲೆನ್ ಕೊರೊಡಾಪುಂಡು. ಮತದಾರೆಎ ಪಟ್ಟಿಡ್ ಇಪ್ಪುನ ಪುದರ್ಲೆನ ಪರಿಶೀಲನೆ, ತಿದ್ದುಪಡಿ, ಪೊಸ ಪುದರ್ ಗೋಡ್ಯಾವುನ ತೀರ್ದಿನಕಲೆನ, ಒಕ್ಕೆಲ್ ಪೋತಿನಕಲೆನ ಪುದರ್ನ್ ಪಟ್ಟಿರ್ದ್ ದೆಪ್ಪುವೆರ್.
ಬಿಎಲ್ಓ ನಕುಲು ಇಲ್ಲಗ್ ಬತ್ತ್ದ್ ಎಸ್ಐಆರ್ ಅರ್ಜಿ ಕೊರ್ಪೆರ್. ಎಸ್ಐಆರ್ ಅರ್ಜಿಗ್ ಒಲವು ಕೊರ್ದು ಮತದಾರೆರ್ ಸೈನ್ ಮಲ್ಪೊಡು. ಎಸ್ಐಆರ್ಡ್ ಪಾಲ್ಪಡೆದ್ ಒಲವು ಕೊರ್ನ್ಡ ಮಾತ್ರ ಮತದಾನೊದ ಹಕ್ಕ್, ಇಜ್ಜಿಂಡ ವೋಟ್ ಪಾಡರೆ ತಿಕ್ಕಂದಿನ ಸಾಧ್ಯತೆ ಉಂಡು. ಅಕ್ಟೋಬರ್ 7, 2026 ಕ್ 18 ವರ್ಸ ದಿಂಜುನಕುಲು ಅರ್ಜಿ ಪಾಡೊಲಿ. ರಾಜ್ಯ ಚುನಾವಣಾ ಆಯೋಗ, ಜಿಲ್ಲಾಡಳಿತೊಲು ಬೋಡಾಪಿನ ಅಟ್ಟನೆಲೆನ್ ಮಲ್ತೊಂದ.