Last updated on July 1st, 2026 at 03:28 pm
ಕುಡ್ಲ, ಜು. 01: ಕರಿನ ರಡ್ಡ್ ದಿನೊರ್ದಿಂಚಿ ತುಳುನಾಡೊರ್ಮೆ ಬರೊಂದುಪ್ಪುನ ಭಾರೀ ಬರ್ಸೊಗು ಕುಡ್ಲ ತಾಲೂಕ್ದ ಕೆರೆಬೈಲ್ ಗುಡ್ಡೆ ಜಾಗೆಡ್, ಇನಿ ಬುಧವಾರ (ಜುಲೈ 01) ಭೀಕರ ನಡಪು ಒಂಜಿ ನಡತ್ದ್ಂಡ್. ಗುಡ್ಡೆದ ಕೊಡಿಟ್ ಇಪ್ಪುನ ಪ್ರೈವೇಟ್ ಗೆಸ್ಟ್ ಹೌಸ್ದ ನೇಲ್ಯ ಕಾಂಪೌಂಡ್ ವಾಲ್ ತಿರ್ತ್ ಇತ್ತಿನ ಒಂಜಿ ಇಲ್ಲ್ದ ಮಿತ್ತ್ ಜರಿದ್ ಬೂರ್ದಿನೆರ್ದಾವರ ಇಲ್ಲ್ ಅಲಕ್ಕ್ ಪೊಡಿ ಆತ್ಂಡ್. ಆಂಡ, ಇಲ್ಲಡ್ ಇತ್ತಿನಕುಲು ವಾರೊಗು ದುಂಬಾತೇ ಸುರಕ್ಷಿತ ಜಾಗೆಗ್ ಒಕ್ಕೆಲ್ ಪೋತಿನೆರ್ದಾವರ ಮಲ್ಲ ಒಂಜಿ ದುರಂತ ತತ್ತ್ದ್ಂಡ್.
ಮುಲ್ಪದ ಕಿಶೋರ್ ಪನ್ಪಿನಾರೆಗ್ ಸೇರ್ದಿನ ಇಲ್ಲ ಅಲಕ್ಕ ಪೊಡಿ ಆತ್ಂಡ್. ಕೆರೆಬೈಲ್ ಗುಡ್ಡೆ ಜಾಗೆಡ್ ಸುಮಾರ್ 40 ರ್ದ್ಲಾ ಎಚ್ಚ ಇಲ್ಲ್ಲ್ ಇತ್ತ್ದ್, ಗುಡ್ಡೆದ ಕೊಡಿಟ್ ಕುಡ್ಲದ ಪುಗರ್ತೆದ ಸಂಸ್ಥೆ ಒಂಜೆಕ್ ಸೇರ್ದಿನ ಗೆಸ್ಟ್ ಹೌಸ್ ಉಂಡು. ಉಂದೆತ ಅವೈಜ್ಞಾನಿಕ ಕಂಪೌಂಡೇ ಇನಿತ ದುರಂತೊಗು ನೆವನ ಪನ್ದ್ ಪನೊಂದುಲ್ಲೆರ್.
ಕಿಶೋರ್ ಮರೆನ ಇಲ್ಲದ ಮಿತ್ತಮೆಯಿಟ್ ಇತ್ತಿನ ಗೆಸ್ಟ್ ಹೌಸ್ದ ಕಂಪೌಂಡ್ ಕರಿನ ವಾರೊಡು ಮಲ್ಲೆಟ್ ಸಿಲೆ ಬುಡ್ದಿತ್ತ್ಂಡ್. ಉಂಬರೊನು ದುಂಬೇ ತೆರಿನ ಕಿಶೋರ್ ಬೊಕ್ಕ ಆರೆನ ಇಲ್ಲದಕುಲು ಕರಿನ ವಾರೊನೇ ಸಂಬಂಧಿಕೆರೆ ಇಲ್ಲಗ್ ಪೋತೆರ್. ಕರಿನ ಮರ್ಯಾಲೊಡ್ಲಾ ಇಂಚೆನೇ ಸಿಲೆ ಬುಡ್ನಗ ಅಕುಲು ಬಾಡಾಯಿದ ಇಲ್ಲಗ್ ಪೋದು ಕುಲ್ದಿತ್ತೆರ್. ಈ ಸರ್ತಿಲಾ ಸಮಯಪ್ರಜ್ಞೆ ತೋಜಾದ್ ವಾರೊಗು ದುಂಬೇ ಇಲ್ಲ್ ಕಾಲಿ ಮಲ್ದಿನೆರ್ದಾವರ ಇಡೀ ಕುಟುಮೊದ ಜೂವ ಒರಿದ್ಂಡ್.
“ಎಂಕ್ಲ ಕರಿನ 40 ವರ್ಸೊರ್ದಿಂಚಿ ಈ ಗುಡ್ಡೆ ಜಾಗೆಡ್ ಒವ್ವೇ ಪೋಡಿಗೆ ಇಜ್ಜಂದೆ ಬದ್ಕೊಂದಿತ್ತ. ಆಂಡ, ಕುಡ್ಲದ ಸಂಸ್ಥೆ ಗೆಸ್ಟ್ ಹೌಸ್ ಕಟ್ಟ್ದ್, ಐತ ಸುತ್ತ ಎತ್ತರೊದ ಕಂಪೌಂಡ್ ಕಟ್ಟಿ ಬೊಕ್ಕ ಕರಿನ ನಾಲೈನ್ ರ್ಸೊರ್ದಿಂಚಿ ಈ ಮಣ್ಣ್ ಜರಿಪುನ ಸಮಸ್ಯೆ ಉಂಡಾತ್ಂಡ್” ಪನ್ದ್ ಮುಲ್ಪದಕುಲು ಬಾರೀ ಆಕ್ರೋಶ ತೂಪಾದೆರ್. ಈ ಬರ್ಸಗ್ ಒರಿನ ಕಂಪೌಂಡ್ ಲಾ ಜರಿಯೆರೆ ಆದಿತ್ತ್ದ್ ಜಿಲ್ಲಾಡಳಿತ ಈ ಬಗೆಟ್ ನಡುಕು ಬರೊಡು ಪನ್ದ್ ಕೇನೊನ್ದುಲ್ಲೆರ್.