Last updated on July 3rd, 2026 at 12:14 pm
ಬೆಂಗಳೂರ್, ಜು. 03: ಬೆಂಗಳೂರ್ದ ಬ್ರೂಕ್ಫೀಲ್ಡ್ಡ್ ಇಪ್ಪುನ ಸೊಸೈಟಿ ಜನರಲ್ ಬೇಬಿ ಡೇ ಕೇರ್ (Day care case) ಸೆಂಟರ್ಡ್ ಜೋಕುಲೆನ ಮಿತ್ತ್ ಮಲ್ದಿನ ದೌರ್ಜನ್ಯೊದ ಪ್ರಕರಣ ಇಡೀ ಕರ್ನಾಟಕ ರಾಜ್ಯೊನೇ ಪೋಡಿಕಟ್ಟಾದ್ಂಡ್. ಈ ಗಾತಿದ ಪ್ರಕರಣೊಗು ಸಂಬಂಧಿತ್ದ್ ಹೆಚ್ಎಎಲ್ (HAL) ಸ್ಟೇಶನ್ ಪೊಲೀಸೆರ್ ಜಡ್ತೆ ಮಲ್ತೊಂದಿತ್ತ್ದ್, ಪ್ರಮುಖ ಆರೋಪಿ ವಿಜಯಲಕ್ಷ್ಮೀ ಸೇರ್ದ್ ಇರ್ವೆರೆನ್ ಕೈದ್ ಮಲ್ತ್ದೆರ್. ಕೈದಾತಿನಕಲೆನ್ ಇನಿ ನ್ಯಾಯಂತಡೆದ ಎದುರು ಲೆತೊಂದು ಪೋಪೆರ್.
ಡೇ ಕೇರ್ಡ್ ಜೋಕುಲೆಗ್ ಆಕುನ ಸಿಸಿಟಿವಿ ವಿಡಿಯೋ ವೈರಲ್ ಆಯಿನ ಬೆರಿಟೇ ಪೊಲೀಸೆರ್ ಕಾರ್ಯಾಚರಣೆ ಮಲ್ತ್ದೆರ್. ವಿಡಿಯೋಡ್ ಇತ್ತಿನ ಮೂವೆರ್ ಸಿಬ್ಬಂದಿಗ್ ನೋಟಿಸ್ ಕೊರ್ದು ವಿಚಾರಣೆ ಮಲ್ತಿತ್ತ್ದ್, ಜಡ್ತೆದ ಪೊರ್ತುಡು ಎಂಕ್ಲೆಗ್ ದಾಲಾ ಗೊತ್ತುಜ್ಜಿ ಪನ್ದ್ ಆರೋಪಿಲು ಪನ್ತೆರ್ಗೆ. ಆಂಡ, ಇಂದೆನ್ ಗಾತಿಡ್ ಗೆತೊನ್ದಿನ ಪೊಲೀಸೆರ್ ಜುವೆನೈಲ್ ಜಸ್ಟೀಸ್ ಕಾಯ್ದೆದ ಅಡಿಟ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್. ಕೋಡೆ ಮೂವೆರ್ ಪೋಷಕೆರೆರ್ದ್ಲಾ ಪೊಲೀಸೆರ್ ಒಯಿಲ್ಗ್ ಬೋಡಾಪಿನ ಒಲವು ಬೊಕ್ಕ ಪುರಾಪುನು ಒಟ್ಟು ಮಲ್ತೊಂದೆರ್. ನಡಪು ನಡತಿನ ಪೊರ್ತುಡು ಒರಿನ ಸಿಬ್ಬಂದಿಲು ಅಲ್ಪ ಇತ್ತೆರಾ ಬೊಕ್ಕ ಅಕಲೆನ ಕೈ ಉಂಡಾ ಪನ್ಪಿ ಬಗೆಟ್ಲಾ ಜಡ್ತೆ ಮಲ್ತೊಂದುಲ್ಲೆರ್.
ನಡತಿನಿ ದಾದ?
ಬೆಂಗಳೂರ್ದ ಪ್ರತಿಷ್ಠಿತ ಸಂಸ್ಥೆದ ಮದೆಲ್ಡ್ ಇಪ್ಪುನ ಡೇ ಕೇರ್ ಸೆಂಟರ್ಡ್ ರಡ್ಡ್ ವರ್ಸ ಪ್ರಾಯೊದ ಕಿನ್ನಿ ಜೋಕುಲೆನ ಮಿತ್ತ್ ನಡತಿನ ಕ್ರೌರ್ಯ ಇಡೀ ಬೆಂಗಳೂರ್ನೇ ಅಲ್ಕ್ದ್ ಬೂರುಲೆಕ ಮಲ್ದ್ಂಡ್. ಬುಲ್ಪುನ ಜೋಕುಲೆನ್ ವಾಷಿಂಗ್ ಮೆಷಿನ್ದ ಉಲಯಿ ಕುಲ್ಲಾದ್ ವಾಟರ್ ಜೆಟ್ ಸ್ಪ್ರೇ ಮಲ್ಪುನು ಅಂಚೆನೇ ಬಾತ್ರೂಮ್ಡ್ ಪತ್ತ್ರ್ದ್ ಪಾಡ್ದ್ ವಿಕೃತ ಕುಸಿ ಪಡೆಪುನಂಚಿನ ಅಮಾನವೀಯ ದೌರ್ಜನ್ಯ ಮುಲ್ಪ ಪಾಕ ಸಮೆರ್ದ್ ನಡತೊಂದುಂಡು. ಈ ಬಗೆಟ್ ದುಂಬೊರ ಪ್ರಶ್ನೆ ಮಲ್ತಿನ ಸಿಬ್ಬಂದಿನೇ ಬೇಲೆರ್ದ್ ದೆತ್ತ್ದ್ ಸತ್ಯೊನು ದೆಂಗಾಯೆರೆ ತೂತೆರ್ ಪನ್ಪಿ ಆಘಾತಕಾರಿ ವಿಷಯ ಜಿಲ್ಲಾ ಜೋಕುಲೆನ ರಕ್ಷಣಾಧಿಕಾರಿಲೆನ ಜಡ್ತೆಡ್ ತೆರಿದ್ ಬೈದ್ಂಡ್. ಇತ್ತೆ ಐನ್ ಜನ ಕೇರ್ಟೇಕರ್ಲೆನ ಮಿತ್ತ ಕೇಸ್ ದಾಕಲಾದಿತ್ತ್ದ್, ಸೆಂಟರ್ ನ್ ಮುಚ್ಚಿದೆರ್. ಜೋಕುಲೆನ ಹಕ್ಕ್ಲೆನ ರಕ್ಷಣಾ ಆಯೋಗ ಈ ಬಗೆಟ್ ಸಿಎಂಗ್ ಓಲೆ ಬರೆದ್ ಕಠಿಣ ಕ್ರಮ ಗೆತೊನ್ರ ಒತ್ತಾಯ ಮಲ್ದ್ಂಡ್.