Last updated on July 6th, 2026 at 12:31 pm
ಕಡಬ, ಜು. 06: ಆಭರಣೊಲೆಗ್ ಎಚ್ಚ ತೂಕ ಬರ್ಪಿಲೆಕ ಮಲ್ತ್ದ್ ಬ್ಯಾಂಕ್ಡ್ ಅಡವು ದೀದ್ ಮಂಗೆ ಮಲ್ತ್ದ್ ಕಾಸ್ ಮಲ್ಪುನ ಪ್ಲಾನ್ ಪಾಡ್ದಿತ್ತಿನ ಇರ್ವೆರೆನ್ ಕಡಬ ಸ್ಟೇಶನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಜುಲೈ 3 ತಾನಿ ಬಯ್ಯಡ್, ಕಡಬ ಪೇಂಟೆಡ್ ಇರ್ವೆರ್ ಆಂಜೊವುನಕುಲು ಸಂಶಯಾಸ್ಪದವಾದ್ ನಡತೊಂದುಪ್ಪುನ ಬಗೆಟ್ ಕಡಬ ಪೊಲೀಸೆರೆಗ್ ಒಲವು ತಿಕ್ಕ್ದ್ಂಡ್. ಅಂಚ, ಅಡೆ ಪೋದು ಆ ಇರ್ವೆರೆನ್ ಪೊಲಿಸೆರ್ ವಿಚಾರಣೆ ಮಲ್ತ್ದೆರ್. ಆ ಪೊರ್ತುಡು ಬ್ಯಾಂಕ್ಡ್ ಸುಮಾರ್ 120 ಗ್ರಾಂ ಬಂಗಾರ್ ಅಡವು ದೀಯೆರೆ ಬತ್ತ್ದ ಪನ್ದ್ ಅಕುಲು ತೆರಿಪಾದೆರ್.
ಮೊಕಲೆನ ವರ್ತನೆರ್ದಾವರ ಡೌಟ್ ಬತ್ತ್ದ್ ಪೊಲೀಸೆರ್ ಎಚ್ಚಿಗೆ ವಿಚಾರಣೆಗ್ ಸ್ಟೇಶನ್ಗ್ ಲೆತೊಂದು ಪೋತೆರ್. ಅಪಗ ಅಕುಲು ಉಬಾರ್ದ ಮಹಮ್ಮದ್ ಫಾಯಿಝ್ (20) ಬೊಕ್ಕ ಬಂಟ್ವಾಳ ಕಸಬಾ ನಿವಾಸಿ ಮೊಹಮ್ಮದ್ ಮುರ್ಷೀದ್ (45) ಪನ್ದ್ ಪೊಲಬು ಪಟ್ಟೊನ್ದೆರ್.
ಪೊಲೀಸೆರ್ ಅಕಲೆ ಕೈಟ್ ಇಪ್ಪುನ ಬಂಗಾರ್ದ ಬಗೆಟ್ ವಿಚಾರಿಪುನಗ, ಅವೆತ ದಾಲ ದಾಖಲಾತಿ ತೋಜಾದಿಜೆರ್. ಎಚ್ಚಿಗೆ ವಿಚಾರಣೆ ಮಲ್ಪುನಗ ಈ ಬಂಗಾರ್ಲೆನ್ ಎಚ್ಚ ತೂಕ ಬರ್ಪಿಲೆಕ ಮಲ್ತ್ದ್ ಬ್ಯಾಂಕ್ಡ್ ಅಡವು ದೀದ್ ಬ್ಯಾಂಕ್ದಕಲೆಗ್ ದಗೆ ಮಲ್ತ್ದ್ ಕಾಸ್ ಮಲ್ಪುನ ಉದ್ದೇಶೊಡು ಬತ್ತ್ದ ಪನ್ದ್ ಒತ್ತೊಂದೆರ್. ಈ ಬಗೆಟ್ ಕಡಬ ಪೊಲೀಸ್ ಸ್ಟೇಶನ್ ಅ.ಕ್ರ: 83/2026, ಕಲಂ: 318(4), 62 BNS-2023 ದ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.