ಕುಡ್ಲ ಕೆ.ಎಸ್.ಆರ್.ಟಿ.ಸಿ ಬಸ್ ಉಂತಡೆದ ಪೊಸ ಪುದರ್‌ಪಲವೆಡ್ ತುಳು ಲಿಪಿ ಗಲಸೆರೆ ಶಾಸಕೆ ವೇದವ್ಯಾಸ ಕಾಮತೆರೆರ್ದ್ ಓಲೆ

Last updated on July 9th, 2026 at 03:44 pm

ಕುಡ್ಲ, ಜು. 09: ತುಳುಭಾಷೆಗೊಂಜಿ ಲಿಪಿ ಇತ್ತ್ಂಡಲಾ, ಲಿಪಿ ಉಂಡು ಪನ್ಪಿ ಗೇನ ಎಚ್ಚಿಗೆ ತುಳುವೆರೆಗ್ ನನಲಾ ಇಜ್ಜಿ, ಅಂಚಾದ್ ತುಳುಲಿಪಿತ ಸಾರ್ವಜನಿಕ ಗಲಕೆ ಎಚ್ಚ ಮಲ್ತ್‌ದ್ ಜನೊಕ್ಲೆಗ್ ಈ ಬಗೆಟ್ ಅರಿಮೆ ಪುಟ್ಟಾದ್, ತುಳು ಪರಂಪರೆನ್ ಲೋಕೊಗು ತೋಜಾಯೆರೆ ತೆನ್ಕಾಯಿ ಕುಡ್ಲ ಶಾಸಕೆರಾಯಿನ ಶ್ರೀ ವೇದವ್ಯಾಸ ಕಾಮತೆರ್ ಕುಡ್ಲದ ಕೆ.ಎಸ್‌ಆರ್‌ಟಿ.ಸಿ ಬಸ್ ಉಂತಡೆಡ್ ಪಾಡ್ಪಾವೊಂದುಪ್ಪುನ ಪೊಸ ಪುದರ್ ಪಲವೆಡ್ ತುಳು ಲಿಪಿನ್ಲಾ ಗಲಸೆರೆ ಕ್ರಮ ಗೆತೊನ್ಲೆ ಪನ್ದ್ KSRTC  ಕುಡ್ಲ ವಿಭಾಗೊದ ನಿಯಂತ್ರಣಾಧಿಕಾರಿಗ್ ಓಲೆ ಬರೆತೆರ್.

ಕೆ.ಎಸ್‌.ಆರ್.ಟಿ.ಸಿ ಬಸ್ ಉಂತಡೆದ ಎದುರು ಪೊಸ ಪುದರ್ ಪಲವೆ ಪಾಡ್ಪಾವುನ ಬೇಲೆ ನಡತೊಂದಿತ್ತ್‌ದ್, ಈ ಸ್ವಾಗತ ಗೋಪುರಡ್ ಇಂಗ್ಲಿಷ್ ಬೊಕ್ಕ ಕನ್ನಡ ಭಾಷೆದ ಒಟ್ಟುಗು ಕುಡ್ಲ ಅಂಚೆನೇ ತುಳುನಾಡ ಪೆರ್ಮೆದ ಭಾಷೆ ಆಯಿನ ತುಳು ಭಾಷೆದ ಸಾಂಸ್ಕೃತಿಕ ಪರಂಪರೆನ್ ತೋಜಾವುನ ದಿಟ್ಟಿಡ್ ಎದುಕೊನ್ಮೆದ ಪುದರ್ ಪಲವೆಡ್ ತುಳು ಲಿಪಿಟ್ ಪುದರ್ ಪಾಡುನವು ಒಂಜಿ ಅರ್ಥಪೂರ್ಣ ಪಜ್ಜೆ ಆದುಂಡು. ತುಳು ಲಿಪಿ ಗಲಸುನೆರ್ದ್ ತುಳು ಭಾಷೆ, ಸಂಸ್ಕೃತಿ ಬೊಕ್ಕ ಈ ಮಣ್ಣ್‌ದ ಜನೊಕ್ಲೆಗ್ ಗೌರವ ಸಂದಾಯಿಲೆಕ ಆಪುನತ್ತಂದೆ, ಸ್ಥಳೀಯ ಭಾಷೆದ ಒರಿಪುಗು ಉಮೇದ್ ಕೊರ್ಪುನ ಬೇಲೆ ಆಪುಂಡು, ಅಂಚಾದ್ ಪ್ರಜಾಸೌಧ ಬೊಕ್ಕ ಮಂಗಳೂರು ಮಹಾನಗರ ಪಾಲಿಕೆದ ಪುದರ್ ಪಲವೆಡ್ ಇತ್ತೆನೇ ತುಳು ಲಿಪಿ ಗಲಸ್‌ದೆರ್.
ಅಂಚೆನೇ ಕೆ.ಎಸ್‌.ಆರ್.ಟಿ.ಸಿ ಬಸ್ ಉಂತಡೆದ ಎದುಕೊನ್ಮೆದ ಹೋರ್ಡಿಂಗ್‌ಡ್ ತುಳು ಲಿಪಿ ಪಾಡ್ಪಾದ್, ತುಳು ಭಾಷೆನ್ ಒರಿಪುನಂಚಿ ಅಗತ್ಯ ಕ್ರಮ ಗೆತೊನ್ಲೆ ಪನ್ದ್ ಶಾಸಕೆರ್ ವಿಭಾಗೀಯ ನಿಯಂತ್ರಣಾಧಿಕಾರಿಗ್ ಬರೆತಿನ ಓಲೆಡ್ ತೆರಿಪಾದೆರ್.