Last updated on July 13th, 2026 at 09:44 am
ಸಕಲೇಶಪುರ, ಜು. 13: ಹಲಸುಲಿಗೆ ಗ್ರಾಮೊಡು ಐತಾರ ಎತ್ತಿನಹೊಳೆ ಯೋಜನೆದ ಮುಖ್ಯ ಪೈಪ್ಲೈನ್ ಒರರ್ದ್ ಒರಾನೆ ಭೀಕರವಾದ್ ಪುಡದ್ಂಡ್. ಪುಡದಿನ ತೀವ್ರತೆಗ್ ಪೈಪ್ಲೈನ್ರ್ದ್ ಮಲ್ಲ ಪ್ರಮಾಣೊಡು ನೀರ್ ಸುಮಾರ್ ನೂದು ಫೀಟ್ಗ್ಲಾ ಎತ್ತರಗ್ ರಟ್ಟ್ದಿತ್ತ್ದ್, ಸುತ್ತಮುತ್ತೊದ ಕೃಷಿ ಜಾಗೆಗ್ ನೀರ್ ಒಡ್ಡಿದ್ ಬುಲೆ ಹಾಲಾತ್ಂಡ್. ಈ ನಡಪು ಗ್ರಾಮಸ್ಥೆರ್ ಬೊಕ್ಕ ರೈತೆರೆನ್ ಒಂತೆ ಪೊರ್ತು ಬಾರೀ ಮಂಡೆಬೆಚ್ಚಗ್ ನೂಕುದಿತ್ತ್ಂಡ್.
ಐತಾರ ಮಧ್ಯಾಹ್ನ ಹಲಸುಲಿಗೆ ಗ್ರಾಮೊಡೆ ಆದ್ ಪೋಪುನ ಎತ್ತಿನಹೊಳೆ ಪೈಪ್ಲೈನ್ಡ್ ಭಾರಿ ಪ್ರೆಶರ್ ತೋಜಿದ್ ಬತ್ತ್ದ್ ಈ ದುರಂತ ನಡತ್ದ್ಂಡ್ಗೆ. ಪೈಪ್ ಪುಡದಿನ ಭೀಕರ ಶಬ್ದ ಕೇನ್ದಿತ್ತ್ದ್, ಬಾಂಬ್ ಪುಡಯಿಲೆಕ ಆದಿತ್ತ್ಂಡ್ ಪನ್ದ್ ತೂಯಿನಕುಲು ತೆರಿಪಾದೆರ್. ಬರಸ್ಡ್ ರಟ್ಟಿನ ನೀರ್ ಕಾರಂಜಿದ ಲೆಕ ಬಾನೊಗು ರಟ್ಟ್ದಿತ್ತ್ದ್, ಸುತ್ತಮುತ್ತೊದ ಎಕ್ರೆಗಟ್ಲೆ ತೋಟ ಬೊಕ್ಕ ಕಂಡೊಗು ನೀರ್ ಪೊಗ್ಗುದುಂಡು.
ಪೈಪ್ಲೈನ್ರ್ದ್ ಬಾರೀ ಬೀಸಡ್ ಬತ್ತಿನ ನೀರ್ದ ಬರಸ್ಗ್ ಕೃಷಿ ಭೂಮಿದ ಎಡ್ಡೇನ ಮಿತ್ತ್ದಮಣ್ಣ್ ಅಲಕ್ಕ ಬೊಲ್ಲಡ್ ಪೋತುಂಡು. ಕೈತಲ್ದ ಕಾಫಿ, ಕಂಗ್ ತೋಟ ಬೊಕ್ಕ ಜಾಗೆಲು ನೀರ್ಡ್ ಮುರ್ಕುದಿತ್ತ್ದ್, ಕೈಕ್ ಬತ್ತಿನ ಬುಲೆ ನಾಶ ಆಪಿನ ಪೋಡಿಗೆಡ್ ರೈತೆರ್ ಉಲ್ಲೆರ್. “ಯೋಜನೆದ ಅಧಿಕಾರಿಲೆನ ಬೇಜವಾಬ್ದಾರಿರ್ದ್ ಎಂಕ್ಲೆನ ಬುಲೆ, ಜಾಗೆ ಹಾಲಾತ್ಂಡ್. ಇತ್ತೆನೇ ಮಿತ್ತ್ದ ಅಧಿಕಾರಿಲು ಜಾಗೆಗ್ ಬತ್ತ್ದ್ ಹಾನಿ ಪರಿಶೀಲನೆ ಮಲ್ತ್ದ್, ಬೋಡಾಪಿನ ಪಿರಿಕಟ್ಟ್ ಮಲ್ತ್ ಕೊರೊಡು” ಪನ್ದ್ ಹಲಸುಲಿಗೆ ಗ್ರಾಮಸ್ಥೆರ್ ಒತ್ತಾಯ ಮಲ್ತ್ದೆರ್. ಎತ್ತಿನಹೊಳೆ ಯೋಜನೆದ ಬೇಲೆ ನನಲಾ ಮುಗಿದಿಜಿ, ಪ್ರಾಯೋಗಿಕ ಬೊಕ್ಕ ಸುರುತ ನಿಲವುಡೇ ಇಂಚಿನ ಭೀಕರ ಸ್ಫೋಟ ಆತಿನವು ಬೇಲೆದ ತಾಂತ್ರಿಕ ಗುಣಮಟ್ಟ ಬೊಕ್ಕ ಪೈಪ್ಲೈನ್ದ ಬಾಲ್ತರದ ಬಗೆಟ್ ಸಾರ್ವಜನಿಕ ವಲಯೊಡು ಬಾರೀ ಅನುಮಾನೊಲೆನ್ ಉಂಡು ಮಲ್ದ್ಂಡ್. ತೆಟ್ಟ್ ಕಾಮಗಾರಿದ ಬಗೆಟ್ ಸಮ ಜಡ್ತೆ ಆವೊಡು ಪನ್ದ್ ಸಾರ್ವಜನಿಕೆರ್ ಒತ್ತಾಯ ಮಲ್ತ್ದೆರ್.